2 Hydref 2007

Diwrnod o gerdded ger Afon Tafwys gan fwyaf oedd hi ddoe, a hynny yn y glaw. 'Roedd yn braf cael siarad Cymraeg eto, yng nghwmni Aled, Jeff a Branwen.

Melangell
Palas Lambeth oedd ein man cychwyn yn y bore. Wrth gyrraedd cefais fy nghroesawu gan gerflun o Melangell a'i chwningen, cerflun a wnaethpwyd gan leian Anglicanaidd o Gymru a gafodd ei dylanwadu gan yr Eglwys Geltaidd gynnar.
Gwnaeth imi deimlo'n gartrefol iawn!

Nid oedd yr Archesgob Rowan Williams ddim yno ond cyfarchwyd ni gan Esgob Efrog, Dr John Sentamu a adroddodd straeon difyr am ei fagwraeth yn Affrica.

Galw ar esgobion
Galwodd ein cydgerddwr Geoff, sy'n Esgob yn Ne Affrica ar esgobion i gymryd yr argyfwng newid hinsawdd o ddifri gan ddweud ei bod yn dyletswydd ar Gristnogion i sefyll dros y tlodion a galw am gyfiawnder.

Gwn fod Esgob Bangor wedi bwriadu dod yno yn arbennig i ymuno â ni heddiw yn St Paul's ond oherwydd salwch diweddar ni fu hynny'n bosib.
Danfonwn ein dymuniadau gorau ato.

Yn ddiweddarach 'roedd yr Esgob Geoff a'i wraig Kate yn falch iawn o gael tynnu eu lluniau o flaen y cerflun newydd o Nelson Mandela.

Ymlaen wedyn heibio Tŷ'r Cyffredin ac ar hyd Whitehall i stryd Downing.

Roedd cyflwyno'r ddeiseb i 10 Downing St yn arwyddocaol gan mai dyma'r trydydd tro inni dargedu Gordon Brown yn uniongyrchol - yn y gwasnaeth yng nghynhadledd y Blaid Lafur, yn y cyfarfod ymylol yno a ddoe wrth gyflwyno deiseb iddo.

Etholiad
Gan ein bod ynghanol sibrydion am y posibilrwydd o etholiad cyffredinol ar y gorwel 'rwy'n credu ei bod yn gyfnod tyngedfennol o ran cael ein hachos yn uwch ar yr agenda wleidyddol.

Amser te, y tu allan i Neuadd y Ddinas, ger Pont Tŵr Llundain, fe'n croesawyd yn swyddogol i Lundain gan y Maer, Ken Livingstone, a'i ddirprwy, Nicky Gavron.

Mae Ken Livingstone yn wleidydd diddorol gan ei fod yn cynrychioli safbwynt arbennig yng ngwleidyddiaeth Prydain - ac yn un o'r unigolion hynny sy'n dal i sefyll dros egwyddor.

Does dim amheuaeth iddo osod ei farc ar Lundain o safbwynt yr amgylchedd a thrawsnewid trafnidiaeth y ddinas.

Cyd-ddigwyddiad difyr oedd bod maer Efrog Newydd yn ei gyfarfod ddoe i drafod cyfyngu ar y defnydd o geir yn Efrog Newydd a chodi tâl yno am yrru i ganol y ddinas.

Llofnodi cerdyn
Llofnododd Ken Livingstone ein cerdyn ymgyrchu a rhoi carrai esgid o gwmpas ei arddwrn yn arwydd o'i ymrwymiad i'r ymgyrch.

Tri aelod seneddol a welais i'n arwyddo'r cerdyn hyd yn hyn; Gavin Strang AS o Gaeredin, Paul Flynn AS a Hywel Williams AS.

Dywedodd mai gostwng allyriadau 60% erbyn 2025 yw nod Dinas Llundain ac 80% erbyn 2050.

Mae'r cyngor hefyd wedi ysgrifennu adroddiad i ddangos sut mae hyn yn bosib ac fe ddywedodd hyn yn eglur o lwyfan cynhadledd y Blaid Lafur yr wythnos diwethaf.

Mae heddiw yn benllanw tri mis, ac mae cyffro rhyfeddol yn ein plith fel criw a m innau'n edrych ymlaen yn fawr at y diwrnod, ac at gael gweld wynebau cyfarwydd a baneri Cymru yn chwifio yn y dorf.