Cefais noson o gwsg yn fy ngwely fy hun neithiwr gan fy mod o fewn pellter rhesymol i adref.

Ben bore fe aeth criw ohonom i Ysgol Gymraeg Caerffili i drafod y daith gyda dros 300 o ddisgyblion brwdfrydig.

Roedd cryn edrych ymlaen wedi bod ar gyfer ein hymweliad, gyda'r plant i gyd yn cerdded i'r neuadd yn wên o glust i glust. Yn y gwasanaeth, rhoddwyd cyfle inni egluro pam ein bod wedi ymgymryd â'r her hon

Wrth eu boddau
Mohammed o Kenya, Rosalia o El Salvador a Pierre o Mali ddaeth gyda ni i'r ysgol. Dyma eu hymweliad cyntaf ag ysgol ers dechrau'r daith gan fod plant wedi bod ar eu gwyliau haf tan yr wythnos hon.

Roedd y tramorwyr wrth eu boddau gyda'r croeso tanbaid a diddordeb heintus y plant.

Disgrifodd Mohammed beth mae newid hinsawdd yn ei wneud i Kenya gyda lleihad yn y glaw yn peri sychder a methiant yn y cnydau sy'n golygu bod teuluoedd yn mynd heb fwyd.

Galwodd y ddaear yn 'gartref' i bawb, ac yn un y dylai bawb edrych ar ei ôl drwy gerdded yn amlach i'r ysgol neu wrthod bagiau plastig yn yr archfarchnad.

Ond yn amlwg roedd gan yr ysgol bethau i'w dysgu i ninnau hefyd - mae ganddynt Gyngor Amgylchedd yn yr ysgol, maent yn ailgylchu'n gyson, yn arbed dŵr a lleihau ynni yn yr adeilad ac yn trefnu Bws Cerdded yn wythnosol.

Yn wir, roedd Toby y dyn camera'n cofio dod i'r ysgol dair blynedd yn ôl gyda'r BBC i wneud eitem newyddion am y bws cerdded cyntaf yno.

Colli cartref
Chwaraeodd Rosalia gêm 'cwningod' o El Salvador gyda'r plant, lle'r oedd ambell un yn colli cartref.

Eglurodd sut roedd llifogydd diweddar wedi achosi digartrefedd yn El Salvador.

Roedd yn ffordd hwyliog a dychmygus o gyfathrebu gyda'r plant a hwythau'n ymateb yn wych. O sylwi ar gyffro'r plant synnwn i daten nad hon fydd gêm yr iard ar gyfer y diwrnod!

I Bontllanfraith
Anodd oedd ffarwelio, ond 'roedd rhaid ail ymuno a'n cyd-deithwyr oedd ar eu ffordd i Bontllanfraith.

Darparwyd gwledd ar ein cyfer yn eglwys Anglicanaidd Sant Awgwstin yno a da oedd clywed bod Archesgob Cymru, y Dr Barry Morgan, wedi cefnogi'n taith ni'n gyhoeddus.

Roedd Ymddiriedolaeth 'Groundwork' wedi dod draw ag arddangosfa i'r eglwys o'u gwaith yn lleol a daeth Don Thouig AS i ymuno â ni hefyd amser cinio ond eto ni chafwyd ymrwymiad ganddo i ddim.

Sawl un o'r aelodau seneddol yma tybed rydyn ni yn eu cwrdd ar hyd y daith fydd yn ymgyrchu go iawn i gryfhau'r mesur newid hinsawdd ddaw gerbron y Tŷ'r Cyffredin yn yr hydref?

Troi'r tap
Ond yr ysgol oedd uchafbwynt pendant heddiw, yn enwedig o weld cannoedd o blant yn derbyn addysg cyfrwng Cymraeg yn y de-orllewin.

Ysgol yn sicr sy'n meddwl yn lleol a gweithredu'n fyd-eang.

Diolch i Lynn Griffiths y pennaeth a'r athrawon hefyd am eu cydweithrediad a'u harweiniad amlwg.

Wrth i Pierre ffarwelio â Kier, sy'n 10 oed, ateb Kier oedd; "Peidiwch â gadael y tap dŵr mlaen gan wastraffu dŵr a cherddwch i'r ysgol. Gallwn ni gyd wneud rhywbeth."

Gweddill y daith