Dydd Iau, 6 Medi 2007
Dilyn y gamlas

Cerdded ar hyd y gamlas o Drefynwy i Bontypwl. Bendigedig!

Criw o ddeifwyr sy'n trwsio'r gamlas rhag iddi ollwng yn dangos llawer o ddiddordeb yn ein taith ond yn amau a fyddwn yn cael y maen i'r wal efo'r gwleidyddion.

Roedden nhw'n gweld mwy o obaith inni gael ein neges drosodd wrth gwrdd â phobl gyffredin ar hyd y daith.
Wedyn dyma nhw'n diflannu i'r dyfnderoedd i barhau'r trwsio.

Mwynhau cerdded
Pawb o'r criw yn mwynhau cerdded yng nghysgod y coed a gweld golygfeydd godidog y rhan yma o Gymru. Mae sŵn cerbydau yn y pellter ond yn ddigon pell i beidio â tharfu arnom.

Cerdded yw'r hamdden mwyaf poblogaidd ond mae angen gwella'r cyfleusterau ar gyfer cerddwyr yng ngwledydd Prydain.

Rwy'n teimlo weithiau nad oes unrhyw ystyriaeth i gerddwyr - rydym wedi profi enghreifftiau di-ri o gerddwyr yn wynebu peryglon difrifol iawn oherwydd diffyg cynllunio ar gyfer cerddwyr.

Ac yna, beth am blant sydd eisiau cerdded i'r ysgol?
A phobl sy'n dymuno cerdded i'w gwaith?

Angen ei gwneud hi'n haws
Mae angen hwyluso'r profiad, a sicrhau bod amgylchiadau diogel ar gyfer pobl sy'n dymuno cerdded yn hytrach na rhuthro o amgylch y lle mewn car drwy'r amser.

Mae llwybr y gamlas yma'n enghraifft o rywbeth amgylcheddol gyfeillgar y gellir ei wneud i alluogi pobl i fwynhau'r awyr iach.

Gweddill y daith