Yr ydym bellach wedi cyrraedd carreg filltir bwysig iawn, wrth basio hanner ffordd o ran milltiroedd ac amser.

Mae Gogledd Iwerddon a 14 Gorffennaf yn ymddangos yn bell iawn yn y gorffennol erbyn hyn a phrin bod yr un ohonom wedi dychmygu'r adeg honno y buasem ni'n gweld cyrraedd hanner ffordd!

Dangos Cymru
Bu uchafbwynt arbennig i ddathlu'r hanner gyda Rali yn Birmingham ddydd Llun Gŵyl y Banc.

Digon o liw, anerchiadau pwerus, cefnogaeth frwd a'r canwr, Lemar, ar ei orau..

Fe wnes innau'n siŵr fod Cymru yn cael sylw twy wisgo baneri'r Ddraig Goch a het Patagonia ac fe ges i fy llun wedi ei dynnu gyda Lemar!

I'r mosg
Yn cyd-drefnu'r rali gyda Cymorth Cristnogol yr oedd Islamic Relief ac mae'n rhaid dweud i'r trefniadau wneud argraff arnom i gyd ac fe wnes i ffrindiau gyda Muhammad Imran, rheolwr addysg a datblygiad Islamic Relief.

Roeddwn i wedi sylwi ei fod ef a'i gydweithwyr yn diflannu bob hyn a hyn ac o'i holi dyma sylweddoli mai mynd i'r mosg yr oeddent yr amserau addoli.

Gofynnais a fuaswn i'n cael mynd gyda nhw a dyma fynd yn eu cwmni i'r mosg lleol.

Roedd y lle'n llawn ond yn dawel wrth i bawb fod wrthi'n gweddïo.

Er imi ymweld â mosgiau o'r blaen dyma'r tro cyntaf imi deimlo'n rhan o'r hyn oedd yn digwydd yno.
Profiad arbennig.

Pwysigrwydd cydweithio
Mae'r ffaith bod Cymorth Cristnogol ac Islamic Relief yn cydweithio ar y mater yma yn arwyddocaol iawn, yn enwedig o gofio fod cymaint o'r newyddion yn ddiweddar wedi canolbwyntio ar y gwahaniaethau rhwng y cymunedau Cristnogol a Moslemaidd.

Ond, wrth gwrs, mae effeithiau andwyol newid hinsawdd yn rhywbeth a ddylai fod o gonsyrn i bobl o bob ffydd ac rwy'n credu fod y cydweithio hwn yn un o'r pethau pwysicaf sydd wedi dod allan o'r daith.

Un peth sy'n sicr, mae Muhammad a minnau wedi addo cadw mewn cysylltiad a chwilio am ffyrdd o gydweithio yng Nghymru yn y dyfodol.

Gweddill y daith