Dwi'n cael cwmni'r Ddraig Goch yn ddyddiol ar y daith hon. A hynny gan fod logo'r ddraig i'w gweld yn glir ar y ddwy fan sy'n cyd-deithio â ni wrth inni gerdded.

Mulod!
Rhain yw'r mulod sy'n cario'n paciau ac sy'n cludo ambell I gerddwr sydd wedi ei anafu - ac yn rhybuddio eraill ein bod ar ein ffordd.

Ond nid faniau cyffredin mo'r rhain. Maent yn faniau trydan, sydd yn eiddo i John Lilly, o fferm Sorgwm yng Nghwmdu, Crughywel.

Yn wreiddiol fe'u cynlluniwyd fel faniau post yn y Ffindir ac mae John yn eu mewnforio oddi yno.

Gallant wneud dros 70 m.y.a. a gyrru hyd at 200 milltir ar y tro. Yna ar ddiwedd y dydd mae'r gyrwyr yn rhoi plwg mewn i soced 13A arferol yn barod am ddiwrnod arall o deithio drannoeth!

Maent yn gerbydau tawel, glân a rhad i'w rhedeg. Does dim olew i'w newid, dim arogl mwg afiach o'r cefn a does dim treth i'w thalu arnynt chwaith.

Dim trafferth
Hyd yma, does yr un cerbyd wedi profi unrhyw drafferthion ar ein taith.

Gwirfoddolwyr sy'n gyrru'r faniau inni ac i ni, mae'r faniau a'u gyrwyr wedi bod yn gwbl hanfodol.

'Rydym ni'n teimlo'n aml fel pe byddem ni ar Saffari ar draws y Sahara gyda'r cerbydau a'u ceidwaid yn cludo'n heiddo, y bocsys Cymorth Cyntaf angenrheidiol, ac wrth gwrs yr holl ddeunydd ymgyrchu - yn blacardiau, baneri, cardiau post a chareiau esgidiau.

Yng Nghaerdydd
Mae perchennog y faniau wedi dod i'w gwasanaethu yn ystod y daith ac fe gawsom sgwrs ddifyr iawn ac roedd yn hynod o falch fy mod mor awyddus i olrhain achau'r cerbydau, a thynnu sylw pawb at y ffaith mai o Gymru y daethant.

Bydd John Lilly yn ein cwrdd hefyd pan ddown i Gymru ar 5 Medi 2007 a bydd ganddo stondin yn y rali yng Nghaerdydd, 8 Medi.

Mae'n gefnogwr brwd o Gymorth Cristnogol ers blynyddoedd ac yn falch iawn fod mudiad Cristnogol yn rhoi sylw i faterion amgylcheddol.

Cred hefyd ei fod yn gwneud ei gyfraniad unigryw ei hun drwy ddarparu'r cerbydau amgylcheddol gyfeillgar hyn.
Diolch diffuant iddo!