Mi ges ychydig ddyddiau o "seibiant" yn yr Eisteddfod yn Sir y Fflint - ond dim ond mewn dyfynodau oherwydd imi gerdded milltiroedd o gwmpas y maes a siarad am y daith yn ddi-baid.

Roeddwn wedi fy synnu faint oedd yn gwybod am y daith gerdded - ac yn cefnogi'r fenter.

Papur Gwyrdd
Roedd Cymorth Cristnogol wedi gofyn imi fynychu'r Steddfod er mwyn trafod y daith ar ei stondin ar y maes, gwneud cyfweliadau gyda'r wasg ac annog pobl i gymryd rhan yn yr ymgyrch.

Roeddwn hefyd wedi cael fy ngwahodd i annerch ambell gyfarfod - megis lawns Y Papur Gwyrdd ym Mhabell y Cymdeithasau ar y pnawn Llun cyntaf.

Yno roedd Cyfeillion y Ddaear wedi trefnu a sesiwn holi ac ateb a bu trafodaeth ar bwysigrwydd herio newid hinsawdd a beth all pawb ohonom ei wneud er mwyn lleihau ein hôl troed carbon.

Cyfansoddi cerdd
Ym mhabell yr Eglwysi ar y prynhawn Iau cefais gyfle arall mewn cyfarfod Torrwn y Carbon i sôn am y daith gerdded, a rhannu rhai o'r straeon.

Cyflwynwyd cerdyn Pob Hwyl imi gan griw o bobl ifanc o Drefor, Sir Gaernarfon - clwb ieuenctid newydd Chwarae Teg.

Roeddent wedi trefnu noson ar y thema Newid Hinsawdd yr wythnos flaenorol ac ar derfyn y noson wedi cyfansoddi cân gyda Rhys Mwyn a Ryan Kift ar effeithiau Newid Hinsawdd.

Dagrau yn y Glaw!
Dim byd ar ôl
Noson dywyll wlyb
Boddwyd y pentrefi
Boddwyd y celfi

Llawer o bobl ar goll
Lleisiau yn y glaw
Caeau yn llynoedd
Dagrau yn y dwr

Gafael yn fy llaw
Tynna fi o'r glaw
Gafael yn fy llaw
Tynna fi o'r glaw
- yr haul - mi ddaw -

Maes C
Cefais gyfle hefyd gyda'r nos i gymdeithasu a mynychu ambell noson ym maes C lle'r oedd Gwyneth Glyn yn canu un noson - a braf iawn oedd clywed ei bod hi yn cefnogi'r ymgyrch yn gryf ac am ganu yn y rali yng Nghaerdydd ar Fedi 8.

Roedd hi wedi bwriadu canu hefyd yn ein cyfarfod yn mhabell yr Eglwysi ond roedd gormod o gystadleuaeth o'r llwyfan perfformio dros y ffordd!

Careiau i Brown
Ar hyd y daith mi rydan ni'n annog pobl i gyfnewid careiau eu hesgidiau am rai organig masnach deg gyda'r neges 'Torrwn y Carbon' arnynt.

Pan ddaw'r daith i ben yn Llundain ar 2 Hydref 2007 bydd yr hen gareiau yn cael eu cyflwyno fel rhan o'r ddeiseb i Gordon Brown.

Cyfnewidiwyd sawl pâr o gareiau ym mhabell Cymorth Cristnogol yn y 'Steddfod ac 'roeddwn yn sylwi ar garai nid yn unig ar esgidiau cerdded pobl ond mewn gwalltiau, ar arddyrnau, mewn ambell bâr o Converse All Stars ac yn nhyllau un pâr pinc o esgidiau Crocs!