Yn yr Oscars
Cameron Diaz fel angyles mewn gwawl o aur meddai Gary Slaymaker

"Mae fel bod yn y Swistir am wythnos a bwyta dim byd ond siocled."

Disgrifiad y beirniad ffilm, Gary Slaymaker, o'r amser a dreuliodd yn seremonïau'r Oscars yn Los Angeles rai blynyddoedd yn ôl.

"Os oes gen ti y diddordeb lleiaf mewn ffilm - dyna binacl dy yrfa di - cael mynd i rywle fel yr Oscars," meddai ar Raglen Sian Thomas ar BBC Radio Cymru ar drothwy seremonïau 2007.

Gary Slaymaker yn siarad am seremoni'r Oscars gyda Sian Thomas, Chwefror 21, 2007.

Dywedodd mai yn y flwyddyn 2000 pan enwebwyd y ffilm Gymraeg Solomon a Gaynor am wobr yr bu ef yn gohebu yno.

"Dyna'r flwyddyn y cliriodd American Beauty bopeth," meddai wrth Sian Thomas.

Y crach a'r pwerus
Honno hefyd oedd y flwyddyn olaf i'r seremoni gael ei chynnal yn y Shrine Auditorium - lle dechreuodd y seremonïau - cyn symud i'r Kodak Centre erbyn hyn.

"Yr oedd y Shrine yn edrych fel rhywbeth allan o Ben Hur o'r tu fas - yn wampyn o le ac roedde ti'n gwybod dy fod di wedi landio yng nghanol y crach a'r bobl bwerus i gyd," meddai.

"Er pan oeddwn i'n 15 oed rydw i wedi bod yn gwylio'r Oscars ac roedd cael bod yno . . . yn ffantastig a chael gweld fy arwyr yn y cnawd," meddai.

Angyles mewn gwawl o aur
Ac ni wnaeth neb fwy o argraff arno na Cameron Diaz.

"Yr uchafbwynt oedd gweld Cameron Diaz yn dod heibio o fewn pum troedfedd imi - a dyna'r tro cyntaf dwi di stopo siarad yn llwyr dwi'n meddwl!

"Roedd hi'n stunning. Fe allai gofio heddiw liw ei cholur, pob math o emau oedd hi'n wisgo a lliw ei ffrog. Roedd hi jyst yn stunning. Yr oedd bron math o halo o aur o'i chwmpas hi. Roedd hi wirioneddol fel angel yn cerdded heibio ti," meddai.

Arwr arall
Er iddo golli ei lais yn llwyr yn wyneb y fath brydferthwch methu atal llif y geiriau oedd o pan ddaeth wyneb yn wyneb ag arwr arall.

"Gweld rhyw gar bach yn edrych fel Ford Escort yn parcio a gweld y boi tal yma yn dringo mâs mewn dici bo . . .

"O nefi blw, Clint Eastwood, un o'm harwyr pennaf yn y byd.

"Roedd rhyw picket fence fach i'n cadw ni yn y gorlan - wel fe neidies dros hwnnw yn strêt a rhuthro groes y ffordd a jyst bablan . . .

"'Cool down sir,' medde fe a siglo llaw."

Daeth wyneb yn wyneb â Syr Michael Cain yr un noson hefyd - yn ennill ei ail Oscar.

"Roedd [y cyfan] fel bod yn y Swistir am wythnos a bwyta dim byd ond siocled - os oes gen ti'r diddordeb lleiaf mewn ffilm, hwn ydi'r pinacl," meddai.

Ond yr oedd yn feirniadol fod llawer o'r dathlu ffilm yn mynd ar goll erbyn hyn dan gochl y diwylliant selebs gyda mwy o ddiddordeb yn cael ei ddangos gan rai yn yr hyn sy'n cael ei wisgo gan y sêr yn hytrach na'r hyn a gyflawnwyd ar y sgrin.

Ychwanegwch eich sylwadau i'r dudalen fan hyn: Enw a lleoliad: Sylw: Mae'r BBC yn cadw'r hawl i ddewis a golygu sylwadau. Darllenwch sut i wneud y siwr caiff eich sylwadau eu cyhoeddi. I anfon cyfraniad mwy, cysylltwch â ni.