Immigration (fideo Saesneg)
Gwers ysgogol sy'n herio'r agweddau negyddol tuag at fewnfudwyr.
Bydd disgyblion yn cymharu ymlediad yr Ymerodraeth Brydeinig gyda'r hyn sy'n digwydd nawr.
Bydd y wers yn arwain disgyblion i feddwl am orffennol eu teuluoedd, a chroesawu'r syniad o fyw mewn gwlad amlddiwylliannol.
Clip o'r stori
I weld y cynnwys hwn rhaid i chi alluogi Javascript a gosod Flash ar eich cyfrifiadur. Ewch i BBC Webwise (Saesneg) am gyfarwyddiadau.
Canlyniadau dysgu
Erbyn diwedd y wers, bydd POB disgybl wedi dysgu: Bod mewnfudo wedi bod yn digwydd ers canrifoedd.
Erbyn diwedd y wers, bydd y RHAN FWYAF o'r disgyblion wedi dysgu: Bod y DU yn wlad amlddiwylliannol o ganlyniad i'r Ymerodraeth Brydeinig.
Erbyn diwedd y wers, bydd RHAI disgyblion wedi dysgu: Y bu coloneiddio yn broses llawer gwaeth i'r brodorion bryd hynny o'i gymharu ag effaith y mewnfudwyr sy'n dod i mewn i'r DU heddiw.
Dolenni Cwricwlaidd
Dinasyddiaeth Weithgar
- sut i herio enghreifftiau o ragfarn, hiliaeth a stereoteipio mewn modd pendant
- materion a digwyddiadau cyfoes ar lefel leol a bydeang
Datblygiad Moesol ac Ysbrydol
- y ffactorau sy'n ymwneud â llunio barn foesol.
Gweithgareddau ar gyfer y wers
Offer sydd ei angen: TGC Rhyngrwyd/taflunydd, Bwrdd gwyn, Taflenni wedi eu hargraffu
Dechrau'r wers - Cartŵn cysyniad 1
Mewn ymarferiad chwarae rôl, mae angen i'r disgyblion ddychmygu eu bod yn rheolwr swyddfa sy'n chwilio am rywun i lenwi swydd.
Rhowch dudalen gyntaf Taflen 1 - Cartŵn Cysyniad iddynt. Mae arno restr o bobl a mân wybodaeth amdanyn nhw. Dylai pob disgybl ddewis pwy y bydden nhw'n ei gyflogi a pham, a nodi hynny ar y daflen.
Cartŵn cysyniad 2
Nawr, rhowch ail dudalen Taflen 1 - Cartŵn Cysyniad i'r disgyblion, sy'n cynnwys rhagor o wybodaeth am bob cymeriad. Mae angen i'r disgyblion ddewis pwy y bydden nhw'n ei gyflogi eto.
Gallent newid eu meddwl a dewis unigolyn gwahanol neu aros gyda'u dewis cyntaf, ond mae'n rhaid cyfiawnhau pob ateb. Dylai hyn gael ei gofnodi ar y daflen.
Beth yw'r pwnc?
Yr athro i ofyn i'r disgyblion ddyfalu, ar sail y gweithgaredd blaenorol, beth yw pwnc y wers.
Bydd yr ymarfer hwn yn cael ei ddefnyddio i asesu a oes gan y disgyblion ragdybiaethau am bobl o wledydd eraill sy'n gweithio ym Mhrydain.
Clip fideo
Yr athro i gyflwyno pwnc y wers a gofyn i'r disgyblion wylio'r fideo.
Fy argraffiadau cyntaf
Y disgyblion i ysgrifennu eu hargraffiadau cyntaf am y fideo yn y golofn gyntaf ar Taflen 2 - Fy sylwadau i.
Ydyn nhw'n cytuno gyda'r safbwyntiau sy'n cael eu mynegi yn y fideo? Oes ganddyn nhw eu safbwyntiau eu hunain? Bydd y disgyblion yn ailystyried eu teimladau ar ddiwedd y wers.
Grid Bwyd
Y disgyblion i gwblhau'r grid ar Taflen 3 - Grid bwyd gan nodi eu hoff bryd bwyd. Dylid eu hannog i feddwl am darddiad y bwyd, o ble y daeth a sut y daeth yn bryd bwyd poblogaidd ym Mhrydain.
Hyd yn oed os ydynt yn dewis cinio dydd Sul, prydau sydyn neu sglodion fel eu hoff fwyd, dylid eu hannog i ystyried o ble ddaeth y tatws.
Gwnewch gysylltiad
Gan ddefnyddio Taflen 4 - Gwnewch gysylltiad, y disgyblion i edrych ar y rhestr o wledydd a cheisio gwneud cysylltiad rhyngddynt. Gellid cyflawni hyn ar ffurf ymarfer meddwl, paru a rhannu.
Y nod yw fod disgyblion yn cysylltu'r holl lefydd sydd naill ai'n rhan o'r Ymerodraeth Brydeinig neu oedd â gwladfa Brydeinig yn rhan o'r wlad, gyda'r bwriad o ddangos maint presenoldeb pobl o'r DU dros y byd.
Yr Ymerodraeth Brydeinig
Y disgyblion i ddarllen Taflen 5 - Yr Ymerodraeth Brydeinig a thrafod y pwyntiau canlynol:
- Ydy hyn yn newid eu barn am fewnfudo?
- Ydy hi'n deg bod gwledydd eraill yn cael gwneud yr hyn wnaeth Prydeinwyr ganrifoedd yn ôl?
- Mae mewnfudwyr yn ceisio gwella eu safon byw ac mae mewnfudo yn rhannu credoau, diwylliant a bwyd.
Gall athrawon ymhelaethu ar yr Ymerodraeth gan ddibynnu ar eu gwybodaeth e.e. troseddwyr o Gymru yn cael eu hanfon i Awstralia a defnyddio pobl o wledydd yr Ymerodraeth i ymladd yn y Ryfeloedd Byd. Dylai'r disgyblion nodi eu sylwadau yn yr ail golofn ar Taflen 2 - Fy sylwadau i.
Yr adolygiad
Y disgyblion i ystyried agweddau cadarnhaol a negyddol mewnfudo a chymdeithas amlddiwylliannol a'u nodi ar Taflen 6 - Pethau cadarnhaol a negyddol.
Gallai'r agweddau negyddol fod yn ymwneud â'r gwledydd y mae'r mewnfudwyr yn eu gadael, neu'r effaith negyddol y mae'r mewnfudwyr yn ei gael ar Brydain yn nhyb y disgyblion.
Sylwadau ysgrifenedig
Gall athrawon ddefnyddio Taflen 7 - Taflen sylwadau i gasglu sylwadau ysgrifenedig gan y myfyrwyr.
Eiconau
Sgiliau allweddol a Sgiliau dysgu:
- Cyfathrebu
- Cymhwyso rhif
- TGC
- Datrys problemau
- Gweithio gydag eraill
- Gwella eich perfformiad eich hun
- Meddwl yn feirniadol
- Meddwl yn greadigol
- Archwilio ystyr
- Myfyrio
- Sgiliau ymchwilio
- Sgiliau cyflwyno
Strategaethau Asesu ar gyfer Dysgu (AfL):
- Rhannu amcanion dysgu
- Defnyddio cwestiynau
- Adborth effeithiol
- Modelu
- Hunanasesu disgybl
- Asesu gan gyfoedion
- Asesu parhaus
- Addasu addysgu/ adolygu
- Cyfarfod Llawn
