အမ်ဖန် ဆိုင်ကလုန်း ဝင်တော့မှာမို့ အိန္ဒိယမှာ လူသန်းပေါင်းများစွာကို ကယ်ထုတ်ရွှေ့ပြောင်းပေးနေရ

ဘင်္ဂလားပင်လယ်အော်မှာ ဆိုင်ကလုန်းမုန်တိုင်းကြီးတခု ဝင်လာတော့မှာမို့ အိန္ဒိယ အရှေ့ဘက် ကမ်းရိုးတန်း တလျောက်က သန်းပေါင်းများစွာသော လူတွေကို ဘေးလွတ်ရာကို စတင် ရွှေ့ပြောင်းပေးနေပါတယ်။

ဗုဒ္ဓဟူးနေ့ကျရင် မုန်တိုင်းက ကုန်းတွင်းကို စတင် ဝင်ရောက်လာပြီး အနောက် ဘင်္ဂလား ပြည်နယ်နဲ့ ဩရိဿ ပြည်နယ်တွေကို တိုက်ခတ်လိမ့်မယ်လို့ မှန်းနေကြပါတယ်။

ကူညီရေးအဖွဲ့ပေါင်း ၂၀ ကျော် ကိုတာဝန်ပေးထားပြီး နောက်ထပ် အဖွဲ့အများအပြားကိုလည်း အဆင်သင့်လုပ်ထားတယ်လို့ အစိုးရ အရာရှိတွေက ပြောပါတယ်။

ကိုရိုနာဗိုင်းရပ်စ် ပြန့်ပွားမှုကို တားဆီးဖို့ လော့ခ်ဒေါင်းလုပ်ထားတဲ့ အချိန်မှာ အလုပ်မရှိတော့တဲ့ ရွှေ့ပြောင်းအလုပ်သမားတွေ မွေးရပ်မြေ ပြည်နယ်တွေဆီ ပြန်နေကြရာမှာ အဲဒီ အနောက် ဘင်္ဂလား ပြည်နယ်နဲ့ ဩရိဿပြည်နယ်တွေကို ပြန်လာကြတဲ့သူတွေကလည်း အများအပြားပါ။

မေလ ၁၈ ရက်နဲ့ ၂ဝရက်ကြားမှာ အဲဒီရွှေ့ပြောင်းအလုပ်သမားတွေ ထောင်နဲ့ချီ သယ်လာမယ့် ရထားတွေကို ဩရိဿပြည်နယ်မှာ ရထားတွေမလာသေးဖို့ ရွှေ့ဆိုင်းထားပါတယ်။

ခြေလျင်ပြန်လာကြမယ့် ရွှေ့ပြောင်းအလုပ်သမားတွေလည်း အများအပြားရှိနေပြီး ခရိုင်အစိုးရအရာရှိတွေက သူတို့ခရိုင်တွေထဲကို ပြန်လာကြမယ့် ရွှေ့ပြောင်းအလုပ်သမားတွေကို မုန်တိုင်းစဲတဲ့အချိန်အထိ ပြည်နယ်အစိုးရက နေရာပေးထားဖို့ အကူအညီတောင်းထားကာ သူတို့ခရိုင်ထဲကို ပြန်မလာစေဖို့ တားမြစ်ထားပါတယ်။

ဘေးလွတ်ရာကို ရွှေ့ပြောင်းပေးနေတဲ့ အစီအစဉ်ကို ဗုဒ္ဓဟူးနေ့မနက်အထိ လုပ်ဆောင်ကြမယ်လို့ မှန်းဆနေကြပါတယ်။

ပြည်နယ်အစိုးရ အရာရှိတွေလည်း မုန်တိုင်းဘေးက ရှောင်လာတဲ့သူတွေကို ဘယ်မှာနေရာချပေးရ မလဲဆိုတာ ကြိုးစားရှာဖွေနေရပါတယ်။ ဩရိဿပြည်နယ်မှာဆိုရင် မုန်တိုင်းဘေးခိုလှုံရာ နေရာ ၈၀၀ ကျော်ထဲက ၂၅၀ ကို ကိုရိုနာဗိုင်းရပ်စ် ကွာရန်တင်းထားတဲ့ နေရာတွေအဖြစ် လုပ်ထားနေရတာပါ။

ပြည်နယ် ၂ ခုလုံးမှာ စာသင်ကျောင်းနဲ့ တခြား အဆောက်အအုံတွေကို မုန်တိုင်းခိုလှုံစရာ ယာယီနေရာတွေအဖြစ် ပြောင်းပစ်ရမယ်လို့ ပြည်နယ်အစိုးရတွေက ပန်ကြားနေပါတယ်။ မုန်တိုင်းခိုလှုံစရာနေရာမှာ လူတွေခပ်ခွာခွာထားရမှာမို့ ခိုလှုံစရာနေရာတွေက အရင်ကထက် အများကြီးပိုပြီး လိုအပ်နေတာလို့လည်း သူတို့က ပြောပါတယ်။

၁၉၉၉ ခုနှစ်က ဆူပါဆိုင်ကလုန်းမုန်တိုင်းကြီးတခု ဩရိဿပြည်နယ်ကို တိုက်ခတ်ခဲ့ပြီး လူပေါင်း ၉၀၀၀ ကျော်သေဆုံးခဲ့တဲ့ မုန်တိုင်းနောက်ပိုင်း အခုမုန်တိုင်းက သြဒိဿ ကမ်းခြေကို ပထမဆုံးဝင်တဲ့ ဆူပါ ဆိုင်ကလုန်းမုန်တိုင်းဖြစ်တယ်လို့ ဘီဘီစီ မိုးလေဝသ သတင်းအရ သိရပါတယ်။

အိန္ဒိယ မိုးလေဝသနဲ့ဇလဗေဒဌာနက ဒေသအတွင်းမှာ အဝါရောင်အဆင့် သတိပေးချက်ထုတ်ပြန်ထားပြီး ငါးဖမ်းသမားတွေ နောက်ထပ် ၂၄ နာရီအတွင်းမှာ ဘင်္ဂလားပင်လယ်အော် တောင်ပိုင်းကို မထွက်ဖို့၊ မေလ ၁၈ ရက်နဲ့ ၂ဝရက်ကြားမှာ ဘင်္ဂလားပင်လယ်အော် မြောက်ပိုင်းကို မထွက်ဖို့ အကြံပေးနေပါတယ်။

မုန်တိုင်းဟာ သိပ်ကိုပြင်းထန်တဲ့မုန်တိုင်းဖြစ်ပြီး ဘင်္ဂလားပင်လယ်အော် အနောက်မြောက်ပိုင်း၊ အနောက် ဘင်္ဂလား ပြည်နယ်၊ ဘင်္ဂလားဒေ့ရှ်ကမ်းရိုးတန်း တလျောက်ကို မေလ ၂၀ ရက် ဒေသစံတော်ချိန် နေ့လယ်ပိုင်းမှာ ဖြတ်သန်းတိုက်ခတ်နိုင်တယ်လို့ မိုးလေဝသဌာနက ပြောပါတယ်။

ပင်လယ်ပြင်မှာ လှိုင်းတွေကြီးပြီး ကမ်းရိုးတန်းတွေမှာ မုန်တိုင်းဒီရေတွေတက်နိုင်ကြောင်းလည်း သူတို့က သတိပေးနေပါတယ်။