ကိုရိုနာဗိုင်းရပ်စ်: ဗြိတိသျှဝန်ကြီးချုပ် ဆေးရုံက ဆင်းခွင့်ရပြီ
ဓာတ်ပုံ ရင်းမြစ်, Reuters
ဝန်ကြီးချုပ် ဘောရစ်ဂျွန်ဆင် ကိုရိုနာဗိုင်းရပ်စ်ပိုး ကူးခံရလို့ ဆေးရုံမှာ ကုသခံခဲ့ရအပြီး ဒီကနေ့ ဧပြီလ ၁၂ ရက်နေ့မှာ ဆေးရုံက ဆင်းခဲ့ပြီလို့ ဝန်ကြီးချုပ်ရုံးက ထုတ်ပြန် အသိပေးပါတယ်။ ဒါပေမယ့် ချက်ခြင်းတော့ အလုပ်တွေ ပြန်လုပ်ဦးမှာ မဟုတ်သေးဘူးလို့ ဆိုပါတယ်။
အသက် ၅၅ နှစ်ရှိပြီဖြစ်တဲ့ မစ္စတာဂျွန်ဆင်ဟာ ကိုရိုနာဗိုင်းရပ်စ် ကူးစက်ခံခဲ့ရကြောင်း ဆေးစစ်ချက်အရ တွေ့ရှိပြီး ၁၀ ရက်အကြာပြီးခဲ့တဲ့ တနင်္ဂနွေနေ့က လန်ဒန်က စိန့်သောမတ်စ်ဆေးရုံကို တက်ခဲ့ရပါတယ်။
သူဟာ အရေးပေါ်ကြပ်မတ်ကုသဆောင်မှာ သုံးရက်နေခဲ့ရပြီးတဲ့နောက် ကြာသပတေးနေ့ကတော့ ပြန်သက်သာလို့ ပုံမှန်ကုသဆောင်ထဲ ပြန်ရောက်လာခဲ့ပါတယ်။
ဝန်ကြီးချုပ်ဟာ အခု ဆေးရုံကဆင်းလာပြီးတဲ့နောက်မှာ ဝန်ကြီးချုပ်တွေရဲ့ ကျေးလက်က နေအိမ်မှာပဲ အနားယူ ပြန်နာလန်ထတဲ့အထိ နေမယ်လို့ သိရပါတယ်။
ဆေးအဖွဲ့ရဲ့ အကြံပြုချက်အရ ဝန်ကြီးချုပ်ဟာ အလုပ်တွေချက်ခြင်းပြန်လုပ်ဦးမှာ မဟုတ်ပါဘူး။ သူ့ကို ဂရုတစိုက်ပြုစုကုသပေးခဲ့ကြတဲ့ စိန့်သောမတ်စ်ဆေးရုံက လူတိုင်းကို ကျေးဇူးတင်ကြောင်း ပြောချင်ပါတယ်။ ဒီဗိုင်းရပ်စ်ပိုးကြောင့် ထိခိုက်ခဲ့ရသူ အားလုံးကိုလည်း သူ့စိတ်ထဲမှာ သတိရတွေးတောနေမှာပါ လို့ ဝန်ကြီးချုပ်ရုံးရဲ့ ထုတ်ပြန်ချက်မှာ ဖော်ပြထားပါတယ်။
ဘောရစ်ဂျွန်ဆင်ရဲ့ ဇနီးလောင်းဖြစ်ပြီး သူတို့ရဲ့ ရင်သွေးကို ကိုယ်ဝန်လွယ်ထားရသူ ကယ်ရီဆင်းမွန်းကလည်း သူတို့ဆီကို ကြင်နာတဲ့ ထောက်ခံအားပေးတဲ့ စကားတွေပြောကြား ပေးပို့ကြသူ အားလုံးကို ကျေးဇူးတင်ကြောင်း တွစ်တာကနေ ပြောပါတယ်။ ဒီကနေ့တော့ ကျွန်မ သိပ်ကံကောင်းတယ်လို့ ခံစားရပါတယ်လို့ သူက ဆိုပါတယ်။
ပြီးခဲ့တဲ့ အပတ်ကတော့ စိတ်ထဲမှာ အမှောင်တိုက်ကြီး ဖြစ်ခဲ့ရတဲ့ အချိန်တွေ ရှိခဲ့တယ်။ ကျွန်မလိုပဲ ကိုယ်ချစ်ရသူတွေရဲ့ အခြေအနေအပေါ် စိုးရိမ်သောက ကြီးကြီးမားမား ရောက်နေခဲ့ရသူတွေအားလုံးကို စာနာမိပါတယ် လို့သူဆိုပါတယ်။
ဗြိတိသျှ ကျန်းမာရေးစောင့်ရှာက်မှုဌာန NHS က ဝန်ထမ်းတွေကိုလည်း ဘယ်လို ကျေးဇူးတင်ရမှန်းမသိဘူး၊ သူတို့ ကျေးဇူးကို ဘယ်တော့မှ မမေ့ပါဘူးလို့လည်း သူက ပြောပါသေးတယ်။
မစ္စဆင်းမွန်းဟာ နောက် နှစ်လဆိုရင် ရင်သွေးလေးကို မီးဖွားတော့မှာပါ၊ သူ့မှာလည်း ကိုရိုနာရောဂါလက္ခဏာတွေ ရှိနေလို့ တစ်ကိုယ်တည်း သီးခြားခွဲနေနေပေမယ့် ပိုးရှိမရှိတော့ ဆေးအစစ်မခံရသေးပါဘူး။
