တော်ဝင်မင်းသားဟောင်း အင်ဒရူး အဖမ်းခံရမှု - မင်းသားတစ်ပါး ပျက်သုဉ်းမှုအကြောင်း

ဒေတာကုန်ကျမှုသက်သာအောင် စာသားသက်သက်ဖတ်ရန်

ဦးထုပ်အပါအဝင် မြင်းစီးဝတ်စုံကို ဝတ်ဆင်ထားတဲ့ အင်ဒရူး မောင့်ဘက်တန်-ဝင်ဆာကို သစ်ကိုင်းတွေကြားမှာ မြင်းစီးရင်း ကင်မရာရဲ့ အဝေးကို ကြည့်နေတဲ့ပုံနဲ့ ပြသထားပါတယ်။

- ရေးသားသူ, စတီဖင် ဟော့ခ်စ် နဲ့ အင်ဒရူး ဝက်ဘ်
- ရာထူးတာဝန်, ဘီဘီစီ ကမ္ဘာတစ်လွှား
၂၀ ဖေဖော်ဝါရီ ၂၀၂၆
အသစ်တင်ချိန် လွန်ခဲ့သော ၆ နာရီ က
ဖတ်ရန်အချိန်: မိနစ် ၂၂

အင်ဒရူး မောင့်ဘက်တန်-ဝင်ဆာဟာ အများပြည်သူဆိုင်ရာ လုပ်ငန်းတာဝန်မှာ မလျော်မကန်လုပ်မှု သံသယနဲ့ အဖမ်းခံခဲ့ရပါတယ်။ ဒီအဖမ်းအဆီးဟာ တော်ဝင်မင်းသားဟောင်း အသက် ၆၆ နှစ် ပြည့်တဲ့နေ့မှာပဲ ဖြစ်ပွားခဲ့တာပါ။

အဲဒီနောက် စုံစမ်းစစ်ဆေးမှုလုပ်ဆောင်နေစဥ်မှာ ပြန်လွတ်လာပါတယ်။

သူဟာ သူ့ရဲ့ ဝင်ဆာ စံအိမ်ဖြစ်တဲ့ 'တော်ဝင်စံအိမ်' ကနေ ထွက်ခွာဖို့ အမိန့်ပေးခံရပြီးကတည်းက နေထိုင်ခဲ့တဲ့ နော်ဖော့ခ်က ဆန်ဒရင်ဂမ်အိမ်တော်မှာ အဖမ်းခံခဲ့ရတာ ဖြစ်ပါတယ်။

ရဲအရာရှိတွေက အဲဒီ အဆောက်အအုံ နှစ်ခုလုံးကို ဆက်ရှာဖွေနေကြပါတယ်။

ဒါဟာ ပြစ်ဒဏ်ကျခံထားရတဲ့ ကလေးသူငယ်အပေါ် လိင်ပိုင်းဆိုင်ရာ ကျူးလွန်သူ ဂျက်ဖရီ အက်ပ်စတိန်းနဲ့ ပတ်သက်ဆက်နွှယ်မှုကြောင့် စွပ်စွဲချက်များစွာ ရင်ဆိုင်နေရတဲ့ မင်းသားဟောင်း ပထမဆုံးအကြိမ် အဖမ်းခံရတာ ဖြစ်ပါတယ်။

တော်ဝင်မင်းသားဟောင်းဟာ ဗြိတိန် ကုန်သွယ်ရေး သံတမန်အဖြစ် ဆောင်ရွက်နေစဉ်အတွင်း လျှို့ဝှက်အချက်အလက်တွေကို အက်ပ်စတိန်းထံ မျှဝေခဲ့တယ်ဆိုတဲ့ တိုင်ကြားချက်ကို သိမ်းစ် ဗယ်လီ ရဲတပ်ဖွဲ့က စစ်ဆေးနေကြောင်း ပြောကြားပြီးနောက်မှာ ခုလို ဖမ်းဆီးမှု ပေါ်ပေါက်လာတာပါ။

အင်ဒရူး မောင့်ဘက်တန်-ဝင်ဆာကတော့ အက်ပ်စတိန်းနဲ့ ပတ်သက်ပြီး အမှားအယွင်း တစ်စုံတစ်ရာ လုပ်ခဲ့တာမရှိကြောင်း အရင်က ငြင်းဆိုထားပါတယ်။

၂၀၂၆ ခုနှစ် ဇန်နဝါရီလမှာ ထွက်ပေါ်လာတဲ့ အက်ပ်စတိန်းရဲ့ သန်းနဲ့ချီတဲ့ ဖိုင်တွေနဲ့ ပတ်သက်ပြီး သီးခြားစွပ်စွဲချက်တွေအပေါ် မှတ်ချက်ပေးဖို့ ဘီဘီစီရဲ့ တောင်းဆိုမှုကိုတော့ သူက ပြန်ဖြေကြားတာ မရှိသေးပါဘူး။

ချားလ်စ် ဘုရင်က အင်ဒရူး အဖမ်းခံရတာကို "အလွန်အမင်း စိုးရိမ်ပူပန်စွာ သိရှိရကြောင်း" ပြောပြီး "ဥပဒေအတိုင်းသာ ဖြစ်စေရမယ်" လို့ ထပ်လောင်း ပြောဆိုပါတယ်။

ဂျက်ဖရီ အက်ပ်စတိန်း ဘယ်သူလဲ၊ အင်ဒရူးနဲ့ ဘယ်လိုပတ်သက်မှု ရှိခဲ့လဲ။

အက်ပ်စတိန်းဟာ ၂၀၁၉ ခုနှစ်မှာ လိင်ကုန်ကူးမှုနဲ့ ပူးပေါင်းကြံစည်မှု စွဲချက်တွေနဲ့ ထောင်ကျနေစဉ် သေဆုံးသွားခဲ့တဲ့ ရင်းနှီးမြှုပ်နှံမှု ရန်ပုံငွေ စီမံခန့်ခွဲသူ တစ်ယောက် ဖြစ်ပါတယ်။

နယူးယောက်က တာဝန်ရှိသူတွေရဲ့ ဆေးစစ်ချက်အရ သူ့သေဆုံးမှုကို ကိုယ့်ကိုယ်ကိုယ် သတ်သေမှုလို့ ဆုံးဖြတ်ခဲ့ပါတယ်။

၂၀၀၅ ခုနှစ်မှာ အသက် ၁၄ နှစ်အရွယ် မိန်းကလေးတစ်ဦးရဲ့ မိဘတွေက ဖလော်ရီဒါရဲတပ်ဖွဲ့ကို အက်ပ်စတိန်းဟာ သူတို့သမီးကို သူ့ရဲ့ ပမ်းဘိချ် အိမ်မှာ လိင်ပိုင်းဆိုင်ရာ ထိပါးနှောင့်ယှက်ခဲ့တယ်လို့ တိုင်ကြားခဲ့ပါတယ်။

ရဲတပ်ဖွဲ့ရဲ့ ရှာဖွေမှုအရ အိမ်အနှံ့မှာ မိန်းကလေးငယ်တွေရဲ့ ဓာတ်ပုံတွေကို တွေ့ခဲ့ပါတယ်။

အက်ပ်စတိန်းဟာ ထောင်ဒဏ် ၁၈ လ ချမှတ်ခံခဲ့ရပြီး ၁၃ လအကြာမှာတော့ ခံဝန်နဲ့ ပြန်လွတ်လာခဲ့ပါတယ်။

၂၀၁၉ ခုနှစ် ဇူလိုင်လမှာ အက်ပ်စတိန်းဟာ ပါရီကနေ သူ့ရဲ့ ကိုယ်ပိုင်လေယာဉ်နဲ့ ပြန်လာပြီးနောက် နယူးယောက်မှာ အဖမ်းခံခဲ့ရပါတယ်။

ဩဂုတ်လမှာတော့ ဖက်ဒရယ် တရားစီရင်မှုကို စောင့်ဆိုင်းနေရင်း ထိန်းသိမ်းခံထားရတဲ့ နယူးယောက်က မက်ထရိုပိုလစ်တန် ပြုပြင်ထိန်းသိမ်းရေး စင်တာက သူ့ရဲ့ အချုပ်ခန်းထဲမှာ သေဆုံးနေတာကို တွေ့ခဲ့ရပါတယ်။

အက်ပ်စတိန်းဟာ ၂၀၀၂ ခုနှစ်နဲ့ ၂၀၀၅ ခုနှစ်ကြားမှာ သူ့ရဲ့ မန်ဟက်တန် နဲ့ ဖလော်ရီဒါ က နေအိမ်တွေမှာ လိင်ပိုင်းဆိုင်ရာ ကိစ္စတွေ လုပ်ဖို့ အသက် ၁၈ နှစ်အောက် မိန်းကလေးတွေကို ငွေပေးခဲ့တယ်လို့ စွပ်စွဲခံခဲ့ရပါတယ်။

သူကတော့ အမှား တစ်စုံတစ်ရာ လုပ်ခဲ့တာ မရှိဘူးလို့ ငြင်းဆိုခဲ့ပြီး သူ့အပေါ် စွဲချက်တွေအတွက် အပြစ်မရှိကြောင်း လျှောက်လဲခဲ့ပါတယ်။

အင်ဒရူးဟာ လမ်းလျှောက်ရင်း ဂျက်ဖရီ အက်ပ်စတိန်းကို စကားပြောနေပါတယ်။ နှစ်ယောက်လုံးက အနက်ရောင် ကုတ်အင်္ကျီတွေ ဝတ်ထားပါတယ်။ အင်ဒရူးဟာ အက်ပ်စတိန်းကို စကားပြောရင်း သူ့ရဲ့ ဘယ်ဘက်လက်နဲ့ လက်ဟန်ခြေဟန် ပြနေပါတယ်။ သူတို့ရဲ့ နောက်က မြေပြင်မှာ မြက်ခင်းတွေနဲ့ သစ်ရွက်ခြောက်တွေ ရှိနေပါတယ်။ ဂျင်းဘောင်းဘီ အပြာရောင် ဝတ်ထားတဲ့ တစ်စုံတစ်ယောက်က သူတို့နောက်မှာ ရှိနေပြီး အဲဒီလူရဲ့ ခါးနဲ့ ခြေထောက်တွေကိုပဲ မြင်ရပါတယ်။ — ဓာတ်ပုံ ပုံစာ, အင်ဒရူးနဲ့ ဂျက်ဖရီ အက်ပ်စတိန်း (ညာ) တို့ ၂၀၁၀ ပြည့်နှစ် ဒီဇင်ဘာလမှာ နယူးယောက်က စင်ထရယ်ပန်းခြံမှာ လမ်းလျှောက်နေပုံ

အင်ဒရူးဟာ ၂၀၁၉ ခုနှစ်တုန်းက ဘီဘီစီရဲ့ Newsnight အစီအစဉ်မှာ ပြောကြားခဲ့ရာမှာ သူတို့ နယူးယောက်ရဲ့ စင်ထရယ်ပန်းခြံမှာ တွေ့ဆုံပြီးနောက် ၂၀၁၀ ပြည့်နှစ် ဒီဇင်ဘာလမှာပဲ သူ့ရဲ့ မိတ်ဆွေဟောင်းနဲ့ အဆက်အသွယ် အားလုံး ဖြတ်တောက်ခဲ့တယ်လို့ ဆိုပါတယ်။

ဒါပေမဲ့ အင်ဒရူးဟာ လအနည်းငယ်အကြာမှာ အက်ပ်စတိန်းကို "မကြာခင် ထပ်ပြီး ပျော်ပါးကစားကြဦးစို့" ဆိုတဲ့ ကတိနဲ့ သီးသန့် ဆက်သွယ်ခဲ့တဲ့ အီးမေးလ်တွေ နောက်ပိုင်းမှာ ပေါ်ထွက်လာခဲ့ပါတယ်။

အင်ဒရူးရဲ့ ဇနီးဟောင်း ဆာရာ ဖာဂူဆန်နဲ့ အက်ပ်စတိန်းတို့ရဲ့ ခင်မင်ရင်းနှီးမှုအကြောင်း အသေးစိတ် အချက်အလက်သစ်တွေလည်း ထွက်ပေါ်လာခဲ့ပါတယ်။

ဖာဂူဆန်ရဲ့ ပရဟိတအဖွဲ့ဖြစ်တဲ့ Sarah's Trust က အက်ပ်စတိန်းဟာ အရွယ်မရောက်သေးသူဆီကနေ လိင်ကိစ္စအတွက် ချဉ်းကပ်မှုနဲ့ ထောင်ကျနေစဉ်အတွင်း ဆာရာဟာ အက်ပ်စတိန်းနဲ့ ဆက်သွယ်မှု ရှိခဲ့ကြောင်း အီးမေးလ်တွေက ဖော်ပြနေတာကြောင့် အဖွဲ့ကို "အချိန်ကာလတစ်ခုအထိ" ပိတ်ထားမယ်လို့ ကြေညာခဲ့ပါတယ်။

ထိပ်မြင့်ဦးထုပ်နဲ့ မီးခိုးရောင် ဝတ်စုံဝတ်ထားတဲ့ အင်ဒရူးက ရယ်မောနေပါတယ်။ ထိပ်မြင့်ဦးထုပ် ဆောင်းထားတဲ့ တခြား အမျိုးသားတွေလည်း သူ့ဘေးမှာ ရှိနေပြီး နောက်ခံမှာတော့ ဦးထုပ်အညိုရောင်နဲ့ ဆံပင်ရှည်အညိုရောင်နဲ့ အမျိုးသမီးတစ်ဦး ရှိနေပါတယ်။ — ဓာတ်ပုံ ပုံစာ, မင်းသားဟောင်းကို အခုအခါမှာ အင်ဒရူး မောင့်ဘက်တန်-ဝင်ဆာအဖြစ် သိကြပါတယ်။

မင်းသား အင်ဒရူးကနေ မစ္စတာ ဝင်ဆာ ဘယ်လိုဖြစ်သွားတာလဲ။

ဆံပင်ရွှေရောင်ကို နောက်လှန် စည်းထားပြီး အဖြူရောင် အင်္ကျီဝတ်ထားတဲ့ အမျိုးသမီး ဗာဂျီးနီးယား ဂူဖရေးဟာ သူရဲ့ ဆယ်ကျော်သက်ဘဝက ဓာတ်ပုံကို ကိုင်ထားပါတယ်။ — ဓာတ်ပုံ ပုံစာ, ဗာဂျီးနီးယား ဂူဖရေးက သူဟာ သီးခြား ကာလ သုံးကြိမ်မှာ အင်ဒရူးနဲ့ လိင်ဆက်ဆံဖို့ အတင်းအကျပ် ခိုင်းစေခံခဲ့ရတယ်လို့ ပြောပါတယ်။

Skip podcast promotion and continue reading

ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of podcast promotion

တတိယမြောက် ဘုရင် ချားလ်စ်က သူ့ရဲ့ ညီတော်ဆီကနေ "မင်းသား" ဆိုတဲ့ တော်ဝင်ဘွဲ့တံဆိပ်ကို ၂၀၂၅ ခုနှစ် အောက်တိုဘာလမှာ ရုပ်သိမ်းခဲ့ပါတယ်။

အဲဒီအချိန်တုန်းက ဘက်ကင်ဟမ် နန်းတော်က ပြောကြားရာမှာ ဘုရင်ကြီးရဲ့ "ဂရုဏာတရားနဲ့ အစွမ်းကုန် ကိုယ်ချင်းစာနာမှုတွေဟာ ပုံစံအမျိုးမျိုးနဲ့ အနိုင်ကျင့်စော်ကားခံရသူတွေနဲ့ ဘေးကလွတ်လာသူတွေနဲ့အတူ အစဉ်အမြဲ ရှိနေမှာဖြစ်ကြောင်း" ဆိုပါတယ်။

အင်ဒရူးဟာ ၂၀၂၅ အောက်တိုဘာလ အစောပိုင်းမှာပဲ ယော့ခ်မြို့စားဘွဲ့ အပါအဝင် တခြား တော်ဝင်ဘွဲ့တွေကို စွန့်လွှတ်ခဲ့ပါတယ်။ ဒါဟာ ဗာဂျီးနီးယား ဂူဖရေး သေဆုံးပြီးနောက်မှ ထွက်ပေါ်လာတဲ့ သူရဲ့ ကိုယ်တိုင်ရေး အတ္ထုပ္ပတ္တိ "Nobody's Girl" မှာ သူ ဆယ်ကျော်သက် အရွယ်တုန်းက အင်ဒရူးက သီးခြား အချိန် သုံးကြိမ်မှာ လိင်ပိုင်းဆိုင်ရာ စော်ကားခဲ့တယ်ဆိုတဲ့ စွပ်စွဲချက်တွေကို ထပ်ခါတလဲလဲ ဖော်ပြခဲ့ပြီးနောက်မှာ ဖြစ်ပေါ်လာတာပါ။

အင်ဒရူးကတော့ အဲဒီစွပ်စွဲချက်တွေကို အမြဲတမ်း ငြင်းခဲ့ပါတယ်။

နန်းတော်ရဲ့ ထုတ်ပြန်ချက်အပေါ် တုံ့ပြန်ရာမှာ မစ္စ ဂူဖရေးရဲ့ မိသားစုက ဂူဖရေးဟာ "သူ့ရဲ့ အမှန်တရားနဲ့ ထူးခြားတဲ့ သတ္တိတွေနဲ့အတူ ဗြိတိန်မင်းသားတစ်ပါးကို ထီးနန်းအရာကနေ ကျဆင်းသွားစေခဲ့တယ်" လို့ ပြောကြားခဲ့ပါတယ်။

မစ္စ ဂူဖရေးဟာ ၂၀၂၅ ခုနှစ်မှာ သူ့ကိုယ်ကိုယ် သတ်သေသွားခဲ့ပါတယ်။

အင်ဒရူး ဘယ်မှာ နေထိုင်သလဲ။

၂၀၂၅ ခုနှစ် အောက်တိုဘာလ ၂၁ ရက်နေ့မှာ ဝေဟင်ကနေ မြင်တွေ့ရတဲ့ တော်ဝင်စံအိမ်ပုံ။ ဒါဟာ စိမ်းလန်းစိုပြည်တဲ့ မြေကွက်ထဲမှာ တည်ရှိပြီး အောက်ထပ်မှာ မှန်ဆောင်ခန်းပါတဲ့ စတုဂံပုံစံ အဖြူရောင် အဆောက်အအုံကြီး တစ်ခု ဖြစ်ပါတယ်။ နွေရာသီကနေ ဆောင်းဦးရာသီကို ကူးပြောင်းလာတာနဲ့အမျှ သစ်ပင်တချို့မှာ သစ်ရွက်ခြောက်တွေ ရှိနေပြီး တချို့မှာတော့ စိမ်းလန်းနေဆဲ ဖြစ်ပါတယ်။ — ဓာတ်ပုံ ပုံစာ, အင်ဒရူးဟာ အင်္ဂလန်တောင်ပိုင်းက တော်ဝင်မြေ (Crown Estate) ပေါ်မှာရှိတဲ့ တော်ဝင်စံအိမ် (Royal Lodge) ကို ငှားရမ်း နေထိုင်ခဲ့ပါတယ်။

၂၀၀၃ ခုနှစ်မှာ အင်ဒရူးဟာ ဝင်ဆာရဲတိုက်နဲ့ နီးတဲ့ '၀င်ဆာဥယျာဥ်တော်' ထဲမှာရှိတဲ့၊ အခန်း ၃၀ ပါ အဆင့် ၂ အဆင့်သတ်မှတ်ထားတဲ့ 'တော်ဝင်စံအိမ်' ကို ငှားရမ်းစာချုပ် ချုပ်ခဲ့ပါတယ်။

ဘုရားကျောင်းက အပေါ်ကို ချွန်ထွက်နေတဲ့ အမိုးချွန်၊ လျှောစောက်အမိုးနဲ့ အခုံးပုံစံ ဝင်ပေါက်ပါတဲ့ ဘုရားကျောင်းငယ် တစ်ခု ဖြစ်ပါတယ်။ အဲဒီရှေ့မှာ လမ်းကလေးတစ်ခုနဲ့ သပ်ရပ်တဲ့ မြက်ခင်းပြင်ရှိပြီး မြက်ခင်းပေါ်မှာ သစ်ပင်ငယ်လေးတွေ ပေါက်နေပါတယ်။ — ဓာတ်ပုံ ပုံစာ, 'တော်ဝင်စံအိမ်' မှာ ကိုယ်ပိုင် ဘုရားကျောင်းငယ်တစ်ခု ပါရှိပါတယ်။

၂၀၂၆ ဖေဖော်ဝါရီလမှာတော့ သူဟာ ဆန်ဒရင်ဂမ် နယ်မြေ ထဲမှာရှိတဲ့၊ ဘုရင်ကြီးက ငွေကြေးထောက်ပံ့ပေးထားတဲ့ သီးသန့် နေအိမ်ကို ပြောင်းခဲ့ပါတယ်။

အင်္ဂလန်အရှေ့တောင်ပိုင်းနဲ့ ဝေးလ်စ်အရှေ့ပိုင်း မြေပုံ။ လန်ဒန်မြို့၊ အနောက်ဘက်မှာ ဝင်ဆာနဲ့ နော်ဖော့ခ် ကမ်းရိုးတန်းနားက အရှေ့မြောက်ဘက်မှာ ဆန်ဒရင်ဂမ်တို့ကို ပြထားပါတယ်။

အင်ဒရူးက ဘာကြောင့် ထီးနန်းဆက်ခံမယ့် အစီအစဥ်မှာ ရှိနေသေးတာလဲ။

အင်ဒရူးဟာ ထီးနန်းဆက်ခံမှုမှာ အဆင့် ၈ နေရာမှာ ဆက်ရှိနေဆဲဖြစ်ပြီး သူ့ရဲ့သမီးတော်တွေဖြစ်တဲ့ မင်းသမီး ဘီထရစ်က အဆင့် ၉ နဲ့ မင်းသမီး ယူဂျင်းနီက အဆင့် ၁၂ မှာ အသီးသီး ရှိကြပါတယ်။

ဒါပေမဲ့ အောက်လွှတ်တော် စာကြည့်တိုက်ရဲ့ လမ်းညွှန်ချက်တွေအရ အဲဒီအခြေအနေဟာ လွှတ်တော်ရဲ့ ဥပဒေတစ်ခုနဲ့ ပြောင်းလဲနိုင်ကြောင်း ပြသနေပါတယ်။

အရင်က သာဓကတွေ ရှိခဲ့ပါတယ်။ ၁၇၀၁ ခုနှစ် 'အခြေချနေထိုင်မှု အက်ဥပဒေ'အရ ကန့်မင်းသား မိုက်ကယ် (Prince Michael of Kent) ဟာ ၁၉၇၈ မှာ ကက်သလစ်ဘာသာဝင်တစ်ဦးနဲ့ လက်ထပ်ခဲ့ချိန်က ထီးနန်းဆက်ခံမှု စာရင်းကနေ ပယ်ဖျက်ခံခဲ့ရပါတယ်။ ဒါပေမဲ့ ၃၇ နှစ်အကြာမှာတော့ 'ထီးနန်းဆက်ခံမှု အက်ဥပဒေ' အတည်ပြုပြီးနောက်မှာ သူ့ကို ပြန်လည် ထည့်သွင်းပေးခဲ့ပြီး အခုအခါမှာတော့ အဆင့် ၅၃ နေရာမှာ ရှိနေပါတယ်။

ဒါပေမဲ့ အင်ဒရူးကို ထီးနန်းကဘဖယ်ရှားဖို့အတွက် ချားလ်စ် ဘုရင် အုပ်စိုးတဲ့ တခြား ၁၄ နိုင်ငံလုံးရဲ့ သဘောတူညီချက်လည်း လိုအပ်ပါတယ်။

အန်တီဂွာနဲ့ ဘာဘူဒါ
ဩစတြေးလျ
ဘဟားမားစ်
ဘလိဇ်
ကနေဒါ
ဂရင်နာဒါ
ဂျမေကာ
နယူးဇီလန်
ပါပူဝါနယူးဂီနီ
စိန့်ကစ်နဲ့ နဲဗစ်
စိန့်လူစီယာ
စိန့်ဗင်းဆင့်နဲ့ဂရင်နာဒင်း
ဆော်လမွန်ကျွန်းစု
တူဗားလူ

ဗာဂျီးနီးယား ဂူဖရေးက အင်ဒရူးအပေါ် ဘယ်လိုစွပ်စွဲချက်တွေ လုပ်ခဲ့လဲ။

အင်ဒရူးဟာ အပြာရောင် ရှပ်အင်္ကျီနဲ့ ဘောင်းဘီအနက် ဝတ်ထားပြီး ဗာဂျီးနီးယား ဂူဖရေးရဲ့ ဘေးမှာ သူမရဲ့ ခါးကို ဖက်ထားလျက် ရပ်နေပါတယ်။ မစ္စ ဂူဖရေးကတော့ သူမရဲ့ ဗိုက်အောက်ပိုင်း ပေါ်နေတဲ့ တီရှပ်အကျပ်လေးကို ဝတ်ထားပြီး ခရမ်းရောင်နဲ့ ပန်းရောင် အဆင်တွေပါတဲ့ ဘောင်းဘီကို ဝတ်ထားပါတယ်။ ဂေးလိန်း မက်စ်ဝဲလ်ကတော့ သူတို့ရဲ့နောက်မှာ ရပ်နေပြီး နောက်ကို နည်းနည်း မှီနေပါတယ်။ သူမဟာ ပုခုံးကနေ လက်မောင်းတွေ ပေါ်နေတဲ့ လည်ပင်းဟိုက် အဖြူရောင် အင်္ကျီကို ဝတ်ထားပါတယ်။ သူတို့ သုံးယောက်လုံး ပြုံးနေကြပါတယ်။ — ဓာတ်ပုံ ပုံစာ, အင်ဒရူး၊ ဗာဂျီးနီးယား ဂူဖရေး (အလယ်) နဲ့ ရင်းနှီးမြှုပ်နှံသူ ဂျက်ဖရီ အက်ပ်စတိန်းအတွက် အရွယ်မရောက်သေးတဲ့ မိန်းကလေးတွေကို ရှာဖွေပေးမှုနဲ့ နောက်ပိုင်းမှာ ထောင်ကျခဲ့တဲ့ ဂေးလိန်း မက်စ်ဝဲလ်တို့ ဖြစ်ပါတယ်။

၂၀၂၁ ခုနှစ် အမေရိကန်က တရားမမှုတစ်ခုမှာ မစ္စ ဂူဖရေးက အင်ဒရူးက သူ့ကို လိင်ပိုင်းဆိုင်ရာ စော်ကားခဲ့တယ်လို့ စွပ်စွဲခဲ့ပါတယ်။

တရားရုံး မှတ်တမ်းတွေမှာ သူဟာ အသက် ၁၆ နှစ်အရွယ်ကတည်းက ရင်းနှီးမြှုပ်နှံသူ ဂျက်ဖရီ အက်ပ်စတိန်းရဲ့ လိင်ကုန်ကူးမှုနဲ့ အနိုင်ကျင့်မှု ခံခဲ့ရတဲ့ သားကောင်ဖြစ်ခဲ့ရတယ်လို့ ဆိုပါတယ်။ အဲဒီထဲမှာ သူ အသက် ၁၈ နှစ် မပြည့်ခင်မှာ အင်ဒရူးလိုမျိုး တခြား အာဏာရှိတဲ့ အမျိုးသားတွေဆီ "ငှားရမ်း" ခံခဲ့ရတာလည်း ပါဝင်ပြီး အင်ဒရူးက သူ့ကို သီးခြား အချိန် သုံးကြိမ်မှာ လိင်ပိုင်းဆိုင်ရာ စော်ကားခဲ့တယ်လို့ ဆိုပါတယ်။

တစ်ကမ္ဘာလုံးက သတင်းဖော်ပြခဲ့ကြတဲ့ ၂၀၁၉ ခုနှစ် ဘီဘီစီ Newsnight အင်တာဗျူး ရိုက်ကူးနေစဉ်အတွင်း အမ်မလီ မိတ်တလစ်နဲ့ စကားပြောနေတဲ့ အင်ဒရူးကို ဘေးတိုက် ရိုက်ကူးထားတဲ့ပုံ။ — ဓာတ်ပုံ ပုံစာ, ၂၀၁၉ ခုနှစ်တုန်းက ဘီဘီစီရဲ့ Newsnight အစီအစဉ်မှာ အင်ဒရူးက အမ်မလီ မိတ်တလစ်ကို သူဟာ မစ္စ ဂူဖရေးနဲ့ တွေ့ဆုံခဲ့ဖူးတယ်ဆိုတာကို လုံးဝ မှတ်မိတာ မရှိဘူးလို့ ပြောခဲ့ပါတယ်။

အင်ဒရူးဟာ မစ္စ ဂူဖရေးရဲ့ သူ့အပေါ် စွပ်စွဲချက်တွေကို အစဉ်တစိုက် ငြင်းဆိုခဲ့ပြီး Newsnight မှာလည်း မစ္စ ဂူဖရေးနဲ့ တွေ့ဖူးတာကို မမှတ်မိဘူးလို့ ပြောခဲ့ပါတယ်။

၂၀၂၂ ခုနှစ်မှာ နှစ်ဖက်စလုံးဟာ တရားရုံးပြင်ပမှာ ကျေအေးခဲ့ကြပြီး အင်ဒရူးက မစ္စ ဂူဖရေးကို ပမာဏ အတိအကျ မသိရတဲ့ ငွေကြေး ပေးခဲ့ပေမဲ့ အပြစ်ရှိတယ်လို့တော့ ဝန်မခံခဲ့ပါဘူး။

ရှေ့နေ ဒေးဗစ် ဘွိုင်းစ်ဟာ ၂၀၁၉ ခုနှစ် ဩဂုတ်လ ၂၇ ရက်နေ့မှာ ဗာဂျီးနီးယား ဂူဖရေးနဲ့အတူ လမ်းလျှောက်လာနေပါတယ်။ သူက ဝတ်စုံအပြာနဲ့ လည်စည်းအပြာကို ဝတ်ဆင်ထားပါတယ်။ ဂူဖရေးဟာ အပြာရောင် ဂျာကင်နဲ့ အဖြူ၊ အနီ အဆင်ပါတဲ့ အင်္ကျီကို ဝတ်ထားပြီး ဘယ်ဘက်လက်မောင်းမှာ အပြာရောင် လက်ကိုင်အိတ်ကို ချိတ်ထားပါတယ်။ — ဓာတ်ပုံ ပုံစာ, ဗာဂျီးနီးယား ဂူဖရေးဟာ ဂျက်ဖရီ အက်ပ်စတိန်း သေဆုံးပြီးနောက် ကြားနာမှုတစ်ခုအတွက် သူ့ရဲ့ ရှေ့နေ ဒေးဗစ် ဘွိုင်းစ် နဲ့အတူ နယူးယောက် တရားရုံးကို ရောက်ရှိလာပုံ။

ဗာဂျီးနီးယား ဂူဖရေးရဲ့ စာအုပ်ထဲမှာ ဘာတွေ ရေးထားသလဲ။

မစ္စ ဂူဖရေးဟာ အက်ပ်စတိန်းနဲ့ သူ့ အသိုင်းအဝိုင်း လက်ထဲမှာ "လိင်ကျွန်အဖြစ်နဲ့ သေဆုံးသွားရလိမ့်မယ်" လို့ ကြောက်လန့်ခဲ့ကြောင်း သူသေဆုံးပြီးနောက် ထွက်ပေါ်လာတဲ့ ကိုယ်တိုင်ရေး အတ္ထုပ္ပတ္တိ "Nobody's Girl" မှာ ဖော်ပြထားပါတယ်။

အနိုင်ကျင့်မှုတွေရဲ့ အဓိကနေရာမှာ အက်ပ်စတိန်းရဲ့ ချစ်သူဟောင်း ဂစ်လိန်း မက်စ်ဝဲလ်လည်း ပါဝင်ခဲ့ပြီး ဂစ်လိန်း မက်စ်ဝဲလ်ဟာ လက်ရှိမှာ ကလေးသူငယ် လိင်ကုန်ကူးမှုနဲ့ ထောင်ဒဏ် အနှစ် ၂၀ ကျခံနေရပါတယ်။

ဆယ်စုနှစ်များစွာ ကြာပြီးနောက်မှာတောင် မစ္စ ဂူဖရေးဟာ သူတို့နှစ်ယောက်လုံးကို ဘယ်လောက်အထိ ကြောက်ခဲ့ရလဲဆိုတာကို မှတ်မိနေပါတယ်။

စာအုပ်ထဲမှာ အင်ဒရူးအကြောင်း ဘာရေးထားသလဲ။

စာအုပ်ရဲ့ နေရာ အတော်များများဟာ ဖတ်ရတာ တော်တော် စိတ်ထိခိုက်စရာပါ။ အက်ပ်စတိန်းရဲ့ ရက်စက်ကြမ်းကြုတ်တဲ့ လိင်ပိုင်းဆိုင်ရာ အနိုင်ကျင့်မှုတွေကြောင့် ဂူဖရေးဟာ "သတိလစ်သွားပါတော့လို့ ဆုတောင်းရတဲ့အထိ နာကျင်ခဲ့ရတယ်" လို့ အသေးစိတ် ဖော်ပြထားပါတယ်။၂၀၀၁ ခုနှစ် မတ်လမှာ မက်စ်ဝဲလ်က သူ့ကို နှိုးပြီး ဒီနေ့ဟာ "ထူးခြားတဲ့နေ့" ဖြစ်ပြီး "စင်ဒရဲလားလိုမျိုး" သူဟာ "ချောမောတဲ့ မင်းသားတစ်ပါး" နဲ့ တွေ့ရတော့မယ်လို့ ပြောခဲ့ကြောင်း မစ္စ ဂူဖရေးက ရေးခဲ့ပါတယ်။

သူတို့ တွေ့ကြတဲ့အခါမှာ မက်စ်ဝဲလ်က အဲဒီအချိန်မှာ အသက် ၄၁ နှစ်ရှိပြီဖြစ်တဲ့ အင်ဒရူးကို သူ့ရဲ့ အသက်ကို ခန့်မှန်းခိုင်းခဲ့တယ်လို့ ပြန်ပြောပြပါတယ်။

သူက "မှန်အောင် ခန့်မှန်းနိုင်ခဲ့တယ် - ၁၇ နှစ်" လို့ မစ္စ ဂူဖရေးက ပြောပြပါတယ်။ "သမီးတော်တွေ [မင်းသမီး ဘီထရစ်နဲ့ မင်းသမီး ယူဂျင်းနီ] က မင်းထက် နည်းနည်းပဲ ငယ်တာ" လို့ အင်ဒရူးက ထပ်ပြောခဲ့ပါသေးတယ်။

အဲဒီညမှာ သူ၊ အက်ပ်စတိန်းနဲ့ မက်စ်ဝဲလ်တို့ဟာ အင်ဒရူးနဲ့အတူ လန်ဒန်ရဲ့ Tramp နိုက်ကလပ်ကို သွားခဲ့ကြပြီး အင်ဒရူးဟာ "ချွေးတွေ အရမ်းထွက်နေခဲ့တယ်" လို့ မစ္စ ဂူဖရေးက ပြောပါတယ်။

အဲဒီနောက် သူတို့ လေးယောက် မက်စ်ဝဲလ်ရဲ့ အိမ်ကို ကားမောင်းပြန်လာကြချိန်မှာ မက်စ်ဝဲလ်က သူ့ကို "အိမ်ရောက်တဲ့အခါ ဂျက်ဖရီအတွက် မင်းလုပ်ပေးသလိုမျိုး သူ့အတွက်လည်း လုပ်ပေးရမယ်" လို့ ပြောခဲ့တယ်လို့ ဆိုပါတယ်။

"သူက ခင်မင်စရာ ကောင်းပေမဲ့ သူဟာ အခွင့်ထူးခံ တစ်ယောက်လို ဖြစ်နေတုန်းပဲ။ ကျွန်မနဲ့ လိင်ဆက်ဆံရတာဟာ သူ့ရဲ့ မွေးရာပါ အခွင့်အရေး တစ်ခုလို့ သူ ယုံကြည်နေသလိုမျိုးပါပဲ" လို့ မစ္စ ဂူဖရေးက ပြောပါတယ်။

"နောက်နေ့မနက်မှာတော့ မက်စ်ဝဲလ်ဟာ သူ့ရဲ့ တော်ဝင်သူငယ်ချင်းနဲ့ စကားပြောပြီးပြီဆိုတာ သေချာပါတယ်။ ဘာလို့လဲဆိုတော့ သူက ကျွန်မကို 'မင်း ကောင်းကောင်း လုပ်နိုင်ခဲ့တယ်။ မင်းသား ပျော်သွားတယ်' လို့ ပြောခဲ့လို့ပါပဲ။"

လေယာဉ်ပေါ်က ဂစ်လိန်း မက်စ်ဝဲလ်နဲ့ ဂျက်ဖရီ အက်ပ်စတိန်းတို့ပုံ။ အက်ပ်စတိန်းဟာ ထိုင်ခုံပေါ်မှာ ခြေထောက်ဆန့်ပြီး အနားယူနေပါတယ်။ မက်စ်ဝဲလ်ကတော့ သူ့ရဲ့ မျက်နှာချင်းဆိုင် ထိုင်ခုံမှာ ရှေ့ကို ကိုင်းနေပါတယ်။ သူက ပြုံးနေပေမဲ့ သူကတော့ ပါးစပ်ပိတ်ထားပါတယ်။ — ဓာတ်ပုံ ပုံစာ, ဂစ်လိန်း မက်စ်ဝဲလ်ဟာ ဂျက်ဖရီ အက်ပ်စတိန်းနဲ့ လိင်ဆက်ဆံဖို့အတွက် မိန်းကလေးတွေကို ကုန်ကူးခဲ့မှုနဲ့ အပြစ်ရှိကြောင်း တွေ့ရှိခဲ့ရပါတယ်။

အဲဒီအချိန်မှာ မစ္စ ဂူဖရေးကတော့ "သိပ်ပြီး မကောင်းသလို ခံစားရတယ်" လို့ ရေးခဲ့ပါတယ်။

" မကြာခင်မှာပဲ တက်ဘလွိုက် သတင်းစာတွေက 'Randy Andy' လို့ ခေါ်ကြတဲ့ လူကို ပြုစုပေးတဲ့အတွက် အက်ပ်စတိန်းက ကျွန်မကို ဒေါ်လာ ၁၅,၀၀၀ ပေးခဲ့တယ်။ အဲဒါက တော်တော်များတဲ့ ငွေပါပဲ" လို့ ဆက် ရေးထားခဲ့ပါတယ်။

တစ်လလောက်အကြာမှာတော့ နယူးယောက်က အက်ပ်စတိန်းရဲ့ အိမ်မှာ အင်ဒရူးနဲ့ ဒုတိယအကြိမ် လိင်ဆက်ဆံခဲ့ရတယ်လို့ သူက ဆိုပါတယ်။

ပန်းရောင် ဂါဝန်ဝတ်ထားတဲ့ ဗစ်တိုးရီးယား ဂူဖရေးဟာ ပင်လယ်ထဲမှာ ရပ်နေပါတယ်။ ဂါဝန်ရဲ့ အောက်ပိုင်းမှာ ရေစင်ထားတဲ့ အစက်အပြောက်တွေ ရှိနေပါတယ်။ သူက ခါး ထောက်ထားပါတယ်။ ဆံပင်ကို နောက်မှာ စည်းထားပြီး ကင်မရာကို ကြည့်နေပါတယ်။ ပင်လယ်က မီးခိုးရောင်ဖြစ်နေပြီး ကောင်းကင်မှာ တိမ်တွေ ရှိနေပါတယ်။ ဓာတ်ပုံဟာ ဓာတ်ပုံအယ်လ်ဘမ် တစ်ခုထဲမှာ ရှိနေတာပါ။ — ဓာတ်ပုံ ပုံစာ, အဲဒီအချိန်တုန်းက ဗစ်တိုးရီးယား ရောဘတ်စ်လို့ သိကြတဲ့ ဗစ်တိုးရီးယား ဂူဖရေးရဲ့ မိသားစု ဓာတ်ပုံတစ်ခု။

တတိယအကြိမ်မြောက် စွပ်စွဲချက်ကတော့ အက်ပ်စတိန်းရဲ့ ကျွန်းပေါ်မှာဖြစ်ပြီး မစ္စ ဂူဖရေးက "အပျော်ကြူးမှု" လို့ ဖော်ပြထားတဲ့ ထဲမှာ ဖြစ်ပါတယ်။

"အက်ပ်စတိန်း၊ အင်ဒရူး၊ တခြား မိန်းကလေး ရှစ်ယောက်လောက်နဲ့ ကျွန်မတို့ အတူတူ လိင်ဆက်ဆံခဲ့ကြတယ်" လို့ သူက ပြောပါတယ်။

"တခြား မိန်းကလေးတွေ အားလုံးဟာ အသက် ၁၈ နှစ်အောက်တွေ ဖြစ်ပုံရပြီး အင်္ဂလိပ်စကားလည်း သိပ်မပြောတတ်ကြပါဘူး။"

"သူတို့တွေ စကားကောင်းကောင်း မပြောနိုင်တာကို အက်ပ်စတိန်းက ရယ်မောပြီး သူတို့ဟာ ပေါင်းသင်းရ အလွယ်ဆုံး မိန်းကလေးတွေပဲလို့ ပြောခဲ့ပါတယ်။"

လူတွေဝိုင်းထားတဲ့ အပြင်ဘက် စင်မြင့်တစ်ခုမှာ ဗာဂျီးနီးယား ဂူဖရေး စကားပြောနေပုံ။ — ဓာတ်ပုံ ပုံစာ, အက်ပ်စတိန်းရဲ့ ရက်စက်တဲ့ လိင်ပိုင်းဆိုင်ရာ အနိုင်ကျင့်မှုတွေကို ရည်ညွှန်းပြီး "သတိလစ်သွားဖို့ ဆုတောင်းရလောက်အောင် နာကျင်ခဲ့ရတယ်" လို့ မစ္စ ဂူဖရေးက သူ့ရဲ့ သေဆုံးပြီးနောက် ထွက်ပေါ်လာတဲ့ အတ္ထုပ္ပတ္တိမှာ ရေးသားခဲ့ပါတယ်။

၂၀၂၂ ခုနှစ် တရားရုံးပြင်ပ ကျေအေးမှုကို ရည်ညွှန်းပြီး မစ္စ ဂူဖရေးက အခုလို ရေးခဲ့ပါတယ်။

"ကျွန်မဟာ တစ်နှစ်ကြာ နှုတ်ပိတ်နေဖို့ အမိန့်ကို သဘောတူခဲ့ပါတယ်။ အဲဒါဟာ မင်းသားအတွက် အရေးကြီးပုံရတယ်။ ဘာလို့လဲဆိုတော့ သူ့မိခင်ရဲ့ နန်းသက် ၇၀ ရတုပွဲကို အရှက်မကွဲစေချင်လို့ပါ" လို့ ဆိုပါတယ်။

ဘက်ကင်ဟမ် နန်းတော်ရဲ့ သတင်းမြစ်တစ်ခုက ဘီဘီစီကို ပြောကြားရာမှာ တော်ဝင်အရာရှိတွေက ဒီစာအုပ် ထွက်ပေါ်လာခြင်းဟာ "ရှေ့မှာ နာကျင်ရမယ့်နေ့ရက်တွေ ထပ်ရှိလာဦးမယ်" ဆိုတာကို လက်ခံထားကြတယ်လို့ ဆိုပါတယ်။

အင်ဒရူးက ဘီဘီစီ အင်တာဗျူးမှာ ဘာတွေ ပြောခဲ့သလဲ။

အမ်မလီ မိတ်တလစ်ဟာ အင်ဒရူးနဲ့အတူ ဘက်ကင်ဟမ် နန်းတော်ထဲမှာ လမ်းလျှောက်နေပါတယ်။ သူတို့ဟာ စကျင်ကျောက် နံရံတွေနဲ့ ရုပ်ထုတွေရှိတဲ့ ကော်ဇောနီပေါ်မှာပါ။
စင်္ကြံလမ်းရဲ့ ဘေးဘက်မှာ အနီရောင် ခုံတန်းရှည်ကြီး တစ်ခု။ — ဓာတ်ပုံ ပုံစာ, ဘီဘီစီရဲ့ ၂၀၁၉ Newsnight အစီအစဉ်မှာ အမ်မလီ မိတ်တလစ်က အင်ဒရူးကို အင်တာဗျူးခဲ့တာဟာ တစ်ကမ္ဘာလုံးမှာ သတင်းဖြစ်ခဲ့ပါတယ်။

အင်ဒရူးဟာ ၂၀၁၉ ခုနှစ် ဘီဘီစီ Newsnight အင်တာဗျူးကို သုံးပြီး မစ္စ ဂူဖရေးနဲ့ လိင်ဆက်ဆံခဲ့တယ်ဆိုတာကို ပြတ်ပြတ်သားသား ငြင်းဆိုခဲ့ပါတယ်။ သူက အဲဒီနေ့ညမှာ မင်းသမီး ဘီထရစ်ကို ပီဇာအိတ်ပရက်စ် စားသောက်ဆိုင်ကို ခေါ်သွားခဲ့တယ်လို့ ပြောပါတယ်။

မစ္စ ဂူဖရေး ဖော်ပြခဲ့တဲ့ "ချွေးတွေ အလွန်အမင်း ထွက်နေတဲ့" လူဟာ သူ မဖြစ်နိုင်ဘူးလို့လည်း သူက အခိုင်အမာ ပြောခဲ့ပါတယ်။

"ကျွန်တော် အဲဒီတုန်းက ချွေးမထွက်ပါဘူး။ ဘာလို့လဲဆိုတော့ ဖော့ကလန်စစ်ပွဲ တုန်းက အပစ်ခံရတဲ့အချိန်မှာ အက်ဒရီနယ်လင်တွေ အလွန်အမင်း ထွက်ခဲ့တဲ့ ဒဏ်ကို ခံစားခဲ့ရလို့ပါ" လို့ အင်ဒရူးက Newsnight ကို ပြောပါတယ်။

"ကျွန်တော့်အတွက် ချွေးထွက်ဖို့ဆိုတာ မဖြစ်နိုင်သလောက်ပါပဲ ။"

ဒါပေမဲ့ နောက်ပိုင်းမှာ သတင်းစာတွေက အဲဒီကာလအတွင်းမှာပဲ ရိုက်ထားတဲ့ အင်ဒရူးရဲ့ ဓာတ်ပုံတွေကို ဖော်ပြခဲ့ကြပြီး အဲဒီပုံတွေမှာ သူဟာ ချွေးထွက်နေပုံ ပေါ်နေတယ်လို့ ဆိုကြပါတယ်။

ဗြိတိန်ရဲတပ်ဖွဲ့က တခြား ဘာတွေကို စုံစမ်းစစ်ဆေးနေသေးသလဲ။

မစ္စ ဂူဖရေးရဲ့ "လျှို့ဝှက်အပြစ်အနာအဆာတွေကို ရှာဖွေဖို့" အင်ဒရူးဟာ သူ့သက်တော်စောင့် အရာရှိတစ်ယောက်ကို ၂၀၁၁ ခုနှစ်တုန်းက ခိုင်းစေခဲ့တယ်ဆိုတဲ့ သတင်းစာ ဖော်ပြချက်ကို လန်ဒန် မက်ထရိုပိုလီတန် ရဲတပ်ဖွဲ့က "တက်တက်ကြွကြွ စုံစမ်းနေပါတယ်။"

အင်ဒရူးဟာ မစ္စ ဂူဖရေးမှာ ရာဇဝတ်မှု မှတ်တမ်း ရှိ၊ မရှိ ဒါမှမဟုတ် သူ့ကို ထိခိုက်စေနိုင်တဲ့ အခြား အချက်အလက်တွေ ရှိ၊ မရှိ သိနိုင်ဖို့အတွက် သူ့ရဲ့ မွေးသက္ကရာဇ်နဲ့ အမေရိကန် လူမှုဖူလုံရေး နံပါတ်တွေကို သက်တော်စောင့်ကို ပေးခဲ့တယ်လို့ Mail on Sunday သတင်းစာရဲ့ ဖော်ပြချက်အရ သိရပါတယ်။

အဲဒီအချိန်မှာ တော်ဝင်သတင်းရင်းမြစ်တွေက ပြောကြားရာမှာ အင်ဒရူးအပေါ် ဒီစွပ်စွဲချက်ကို "အထူး သတိထား ကိုင်တွယ်နေပြီး သင့်တော်တဲ့ နည်းလမ်းတွေနဲ့ အပြည့်အဝ စစ်ဆေးသင့်တယ်" လို့ ဆိုပါတယ်။

အင်ဒရူးဟာ ၂၀၁၉ ခုနှစ်မှာ တော်ဝင်တာဝန်တွေကို ထမ်းဆောင်တာကနေ ရပ်ဆိုင်းခဲ့ပါတယ်။ ဒါကြောင့် ဘက်ကင်ဟမ် နန်းတော်က လက်တလောနှစ်ပိုင်းတွေမှာ သူ့အတွက် တာဝန်ယူပေးတာ မရှိတော့ပါဘူး။

တော်ဝင်အစောင့်တပ်ဖွဲ့ဝင် တစ်ယောက်ရဲ့ ရှေ့မှာ တော်ဝင်ဝတ်စုံအပြည့် ဝတ်ထားတဲ့ အင်ဒရူး ဖြစ်ပါတယ်။ အင်ဒရူးဟာ အဖြူရောင် ငှက်မွှေးပုံစံ ပါတဲ့ ဦးထုပ်အနက်ကို ဆောင်းထားပါတယ်။ သူဟာ ဘယ်ဘက်ပုခုံးပေါ်မှာ ရွှေရောင် ခါးပတ်ကို ပတ်ထားပြီး အနက်ရောင် ဂျာကင်ကို ဝတ်ထားပါတယ်။ တော်ဝင်အစောင့်ဟာ ရင်ဘတ်မှာ အဖြူရောင် ခါးပတ်ပတ်ထားတဲ့ အနီရောင် ယူနီဖောင်းကို ဝတ်ပြီး သတိအနေအထားနဲ့ ရပ်နေပါတယ်။ သူက အပေါ်မှာ အဖြူရောင် ငှက်မွှေးလိုမျိုးတွေပါပြီး ခေါင်းဘေးဘက်ကို ကျနေတဲ့ ဦးထုပ်ကို ဆောင်းထားပါတယ်။ — ဓာတ်ပုံ ပုံစာ, ဘုရင်မကြီးရဲ့ သားတော်တစ်ပါး ဖြစ်တဲ့အတွက် အင်ဒရူးဟာ မွေးဖွားလာတဲ့ အချိန်ကတည်းက မင်းသားတစ်ပါး ဖြစ်လာခဲ့ပါတယ်။

မောင့်ဘက်တန်-ဝင်ဆာ မျိုးရိုးအမည်က ဘယ်က ဆင်းသက်လာလဲ။

မောင့်ဘက်တန်-ဝင်ဆာ ဆိုတဲ့ မျိုးရိုးအမည်ဟာ ကွယ်လွန်သူ ဒုတိယမြောက် ဘုရင်မကြီး အဲလိဇဘက် နဲ့ သူ့ရဲ့ ခင်ပွန်း မင်းသား ဖိလစ်တို့ရဲ့ မိသားစု အမည်တွေကို ပေါင်းစပ်ထားတာ ဖြစ်ပါတယ်။

သူတို့ရဲ့ သားစဉ်မြေးဆက်တွေအတွက် ၁၉၆၀ ခုနှစ်မှာ စတင်သတ်မှတ်ခဲ့တာပါ။ အင်ဒရူးက ဆာရာ ဖာဂူဆန်နဲ့ လက်ထပ်တာကို တရားဝင် မှတ်ပုံတင်ရာမှာ ဒီနာမည်ကို သုံးခဲ့ပါတယ်။

၁၉၁၇ ခုနှစ် ပထမကမ္ဘာစစ်အတွင်းမှာ ထီးနန်းအုပ်ချုပ်သူ ပဉ္စမမြောက် ဂျော့ချ် ဘုရင်ဟာ ဗြိတိန်မှာ ဂျာမန်ဆန့်ကျင်ရေး စိတ်ဓာတ်တွေ ပြင်းထန်နေတာကို စိုးရိမ်တာကြောင့် သူ့မိသားစုနာမည်ကို ဂျာမန်အနွယ်ဝင် 'ဆက်စ်-ကိုဘာ့ဂ်နဲ့ ဂိုသာ' ဆိုတာကနေ ရဲတိုက်နာမည်ကို အစွဲပြုပြီး ဝင်ဆာ လို့ ပြောင်းခဲ့ပါတယ်။

တစ်ချိန်တည်းမှာပဲ အင်ဒရူးရဲ့ ဖခင်ဘက်က အဘွားဖြစ်သူ ဘတ်တင်ဘာ့ဂ် မင်းသမီး အဲလစ် ကလည်း သူ့မိသားစုအမည်ကို အင်္ဂလိပ်ဟန်နဲ့ မောင့်ဘက်တန်လို့ ပြောင်းခဲ့ပါတယ်။

ရေတပ်ယူနီဖောင်း ဝတ်ထားတဲ့ အင်ဒရူးဟာ အဖြူရောင် မင်္ဂလာဝတ်စုံ ဝတ်ထားတဲ့ ဆာရာ ဖာဂူဆန်နဲ့အတူ အမိုးဖွင့် မြင်းရထားပေါ်မှာ လိုက်ပါလာပုံ။ — ဓာတ်ပုံ ပုံစာ, အင်ဒရူးနဲ့ ဆာရာ ဖာဂူဆန်တို့ အိမ်ထောင်သက်က ၁၉၈၆ ကနေ ၁၉၉၆ အထိ ရှိခဲ့ပါတယ်။

အင်ဒရူးရဲ့ ကျဆုံးမှုက တခြား ဘာတွေပါခဲ့သေးလဲ။

အင်ဒရူးနဲ့ တရုတ်သူလျှိုလို့ စွပ်စွဲခံရသူတစ်ဦးကြားက ဆက်နွှယ်မှု လျှို့ဝှက်စာရွက်စာတမ်းတွေကို ဘီဘီစီနဲ့ အခြားမီဒီယာတွေက တရားရုံးကနေ ထုတ်ပြန်ပေးဖို့ တောင်းဆိုခဲ့ပြီးနောက် ၂၀၂၅ ခုနှစ် ဧပြီလမှာ ထုတ်ဖော်ပြသခဲ့ပါတယ်။

အဲဒီစာရွက်စာတမ်းတွေအရ အင်ဒရူးဟာ ၂၀၁၉ Newsnight အင်တာဗျူးပြီးနောက်ပိုင်းမှာ သူ့ရဲ့ အကြံပေးဟောင်း ဒေါမနစ် ဟမ့်ရှိုင်းယားက "တစ်ခုတည်းသော မျှော်လင့်ချက်" လို့ ယူဆခဲ့တဲ့ တရုတ်စီးပွားရေးသမား ယန်တိန်းပိုရဲ့ အကူအညီနဲ့ တရုတ်နိုင်ငံမှာ စီးပွားရေး အခွင့်အလမ်းတွေ ရှာဖွေပြီး သူ့ရဲ့ အများရှေ့က ဂုဏ်သိက္ခာကို ပြန်လည် ဆယ်တင်နိုင်မယ်လို့ ယုံကြည်ခဲ့ကြောင်း ဖော်ပြနေပါတယ်။

စာရွက်စာတမ်းတွေမှာ အင်ဒရူးဟာ တရုတ်သမ္မတ ရှီကျင့်ဖျင်ဆီကို နှစ်စဉ် မွေးနေ့ဆုတောင်းစာ ပေးပို့တာအပါအဝင် "ဆက်သွယ်ရေး လမ်းကြောင်း" ရှိခဲ့တဲ့ အသေးစိတ် အချက်အလက်တွေနဲ့ ဗြိတိန် ထောက်လှမ်းရေးအဖွဲ့ MI5 က မစ္စတာ ယန်နဲ့ မပတ်သက်ဖို့ ဝင်ရောက် သတိပေးခဲ့ပုံတွေကိုလည်း ဖော်ပြထားပါတယ်။

အစိမ်းရောင် နောက်ခံနဲ့ အောက်ကို ငုံ့ကြည့်နေတဲ့ အင်ဒရူးကို အနီးကပ် ရိုက်ထားတဲ့ပုံ။ သူက မီးခိုးရောင် ကုတ်အင်္ကျီနဲ့ ရှပ်အင်္ကျီအဖြူကို ဝတ်ထားပါတယ်။ — ဓာတ်ပုံ ပုံစာ, မီဒီယာတွေရဲ့ အာရုံစိုက်မှုကို ရှောင်ရှားဖို့အတွက် အင်ဒရူးကို ဘုရင်ကြီးနဲ့ တွေ့ဆုံဖို့ ဝင်ဆာရဲတိုက်ထဲကို တိတ်တဆိတ် ခေါ်ဆောင်သွားခဲ့ပါတယ်။

မစ္စတာ ဟမ့်ရှိုင်းယားရဲ့ သက်သေထွက်ဆိုချက်မှာ အခုလိုလည်း ဖော်ပြထားပါတယ်။

အင်ဒရူးနဲ့ မစ္စတာ ယန်တို့ရဲ့ ဆက်ဆံရေးကို မစ္စတာ ဟမ့်ရှိုင်းယား၊ ဘုရင်ကြီးတို့နဲ့ တွေ့ဆုံမှု နှစ်ကြိမ်မှာ ဆွေးနွေးခဲ့ကြပါတယ်။ အဲဒီအတွက် အင်ဒရူးကို သတင်းမီဒီယာတွေ မမြင်အောင် ဝင်ဆာရဲတိုက်ထဲကို တိတ်တဆိတ် ခေါ်ဆောင်ခဲ့ရပါတယ်။
အင်ဒရူးရဲ့ လက်ထောက်တွေကြားထဲမှာ တင်းမာမှုတွေ ရှိခဲ့တာကြောင့် သူ့ရဲ့ စီးပွားရေး အစီအစဉ်တွေနဲ့ ပတ်သက်တဲ့ အစည်းအဝေးတချို့မှာ သူ့ရဲ့ ကိုယ်ရေးအရာရှိကို ချန်လှပ်ထားခဲ့ရပါတယ်။

အစိုးရဆီက အကြံပေးချက် ရရှိပြီးနောက်မှာ မစ္စတာ ယန်နဲ့ အဆက်အသွယ် အားလုံး "ဖြတ်တောက်လိုက်ပြီ" လို့ အင်ဒရူးက ပြောခဲ့ပါတယ်။

အစည်းအဝေး အားလုံးဟာ "တရားဝင် လမ်းကြောင်းတွေကတစ်ဆင့်" ဖြစ်ခဲ့ပြီး "ထိရှလွယ်တဲ့ အကြောင်းအရာတွေကို ဘယ်တုန်းကမှ မဆွေးနွေးခဲ့ဘူး" လို့ ဆိုပါတယ်။

မစ္စတာ ယန်ကတော့ သူ့ကို သူလျှိုတစ်ယောက်အဖြစ် ဖော်ပြတာဟာ "လုံးဝ မမှန်ကန်ဘူး" လို့ ပြောခဲ့ပါတယ်။

ဝတ်စုံအနက်နဲ့ အစိမ်း၊ အဖြူ အစက်အပြောက်ပါတဲ့ လည်စည်းကို ဝတ်ထားတဲ့ မင်းသား အင်ဒရူးဟာ ကျောက်နံရံတစ်ခုကို ကျောပေးပြီး၊ လက်နှစ်ဖက်ကို ချိတ်ပြီး ကင်မရာရဲ့ အဝေးကို ကြည့်နေပါတယ်။