Öldürülən gənc modelin cəsədi hücumlardan sonra məzarından çıxarılıb

Böyük Britaniyada 18 yaşında öldürülən model Sally Anne Bowman-ın cəsədi hücumlardan sonra Ədliyyə Nazirliyinin icazəsiylə məzarından çıxarılıb.

Britaniyanın Daily Mirror qəzetinə müsahibə verən Bowman-ın anası Linda Bowman "qəddar insanların"qızının məzarına hücum etdiyini və məzar daşlarını qırdığını söyləyərək onun cəsədinin 4 il əvvəl məzardan çıxarıldığını bildirib.

Linda Bowman qızının qəbri üstünə zibil və solmuş güllərin qoyulduğunu da deyib.

Qatil ömürlük həbsə məhkum edilib

46 yaşlı Mark Dixie Sally Anne Bowman-ı 2005-ci ildə Londonun cənubundakı Croydon səmtində əvvəlcə bıçaqlamış, sonra gənc qız can verərkən onu zorlamışdı.

Mark Dixie 2008-ci ildə ömürlük həbs cəzasına məhkum edilib.

Britaniya qanunlarına görə, Dixie ən azı 34 il həbs cəzası çəkəcək.

Mark Dixie məhkəmə zamanı Bowman-ı ölü tapdığını, spirtli içkinin və narkotikanın təsiri ilə gənc qadını ölüykən zorladığını iddia edib.

Dixie ötən ay 16 yaşında olan zaman bir qadına cinsi təcavüz etdiyini də etiraf edib.