Fatos Ahmati Korrespondent i BBC-së, Tiranë

	Kërkohet ndërgjegjësim i qytetarëve për mbajtjen pastër të mjedisit

Të impenjuar me ndryshimet politike në vend gjatë dy dekadave të fundit, qytetarët shqiptarë tashmë duket se e kanë kthyer fokusin e tyre edhe ndaj problemeve të mjedisit dhe ngrohjes globale.

Këto çështje duket se janë edhe temë e bisedave të tyre dhe për të cilat ata kanë mjaft informacion.

Një e re thotë se e “shqetëson moti i paqëndrueshëm dhe klima me ndryshimet e saj kapriçioze”, ndërsa një shoqe e saj shton se ka lexuar se ka një ç'ekuilibrim të klimës dhe ka ndryshuar kufiri i stinëve. ”Duket sikur po shkojmë drejt dy stinëve” thotë ajo.

Duket sikur po shkojmë drejt dy stinëve njëherësh. Një e re tiranase

Ajo që duket se tërheq më shumë vëmendjen e qytetarëve shqiptarë është ngrohja globale.

Një i moshuar kujton nga fëmijëria e tij se lumi i Lanabregasit në lindje të Tiranës dikur ngrinte në dimër, ndërsa prej vitesh kjo gjë nuk ndodh. Dikush ia vë fajin pranisë gjithnjë e më të madhe të makinave, të cilat në Shqipëri gjatë dy dekadave të fundit kanë pësuar një rritje të ndjeshme.

Lumi i Lanabregasit dikur ngrinte në dimër, por prej vitesh kjo nuk po ndodh. Kryeqytetas i moshuar

Por çfarë pasojash presin shqiptarët pas këtyre ndryshimeve klimatike që kanë përfshirë mbarë botën?

Opinionet për këtë çështje janë të ndryshme. Disa mendojë se bota nuk është shumë e rrezikuar e, aq më pak Shqipëria. “Ne nuk kemi industri shumë të zhvilluar “ thotë një i ri, por një shoqja e tij, ndërsa kujton se Shqipëria është një vend agro-industrial shton se “ndryshimi i klimës do të ndikojë veçanërisht tek bujqësia.”

Nga ana e tyre shoqatat e ambientalistëve dhe autoritetet gjithnjë e më shumë po kërkojnë të ndërgjegjësojnë qytetarët për nevojen e mbajtjes pastër të mjedisit dhe përballimin e ndryshimeve klimatike.