UNMIK kërkon që Serbia të zvogëlojë ndihmën për strukturat paralele serbe.

Të njejtën kërkesë për respektim të rezolutës ia shtroi UNMIK-ut të martën qeveria e Serbisë.

Zëdhënësi i UNMIK-ut, Alexander Ivanko, tha të mërkurën se Serbia duhet të respektojë zonën e ndarë doganore në Kosovë dhe të ndihmojë UNMIK-un për rivendosjen e shërbimit doganor në dy pikat kufitare, të cilat u shkatërruan nga protestuesit serbë dy ditë pas shpalljes së pavarësisë së Kosovës.

Zoti Ivanko po ashtu theksoi se në përputhje me rezolutën 1244, Serbia duhet të zvogëlojë ndihmën e saj për strukturat paralele serbe si dhe të ndihmojë pjestarët serbë që të kthehen në Shërbimin Policor të Kosovës, të cilin e braktisën në shenjë mospajtimi me pavarësinë e Kosovës.

Reagimi i UNMIK-u pason deklaratën e ditës së martë të ministrit të Jashtëm të Serbisë, Vuk Jeremiq, i cili tha se vetëm me respektimin e plotë të rezolutës 1244 mund të parandalohet përkeqësimi i gjendjes në Kosovë.

Zëdhënësi i UNMIK-ut, Alexander Ivanko, tha se administrata ndërkombëtare pajtohet plotësisht me këtë deklaratë të zotit Jeremiq, por kërkoi nga Beogradi zyrtar që me veprimet e tij të dëshmojë se qëndron prapa një deklarate të tillë.

Serbia e mbështetur nga Rusia pretendon se shpallja e pavarësisë së Kosovës është në kundërshtim me rezolutën 1244 të Kombeve të Bashkuara, ndërsa të kundërtën e pohojnë autoritetet në Prishtinë si dhe Shtetet e Bashkuara të Amerikës dhe shumica e vendeve evropiane që kanë njohur Kosovën shtet të pavarur dhe sovran.