Joachim Ruecker

Ai ka thënë se në një farë mënyrë dita e sotme shënon një fazë të re në Kosovë, por ka refuzuar që të jap qëndrimin për situatën e re.

Arbër Vllahiu zhvilloi një bisedë me zotin Ruecker.

BBC: Cili do të jetë tani qëndrimi i UNMIK-ut për shpalljen e pavarësisë së Kosovës?
Zoti Ruecker: Ne e kemi vëzhguar festimin dhe deklaratën dhe tani po raportoj në Nju Jork. Në fakt kam raportuar tashmë dhe po pres instruksione nga selia ime. Kjo është një çështje e rëndësishme dhe unë më duhet vetëm të vëzhgojë dhe të raportojë dhe i mbetet Nju Jork të më jap udhëzime se si të ecim tutje.

BBC: E besoni se mund të menaxhoni me situatën e krijuar dhe me krizat e mundshme?
Zoti Ruecker: Po ne jemi të përgatitur për të gjitha mundësitë dhe kur them ne mendoj, në institucionet që janë përgjegjëse për sigurinë në Kosovë, përfshirë Shërbimin Policor të Kosovës, policinë e UNMIK-ut dhe KFOR-in. Por kam shumë besim në popullin e Kosovës i cili është ngopur me dhunë dhe që do të shoh se e ardhmja po vjen në një atmosferë të dinjetiteti, në paqe dhe stabilitet.

BBC: Por ju keni thënë se status - quo është e paqëndrueshme, tani keni një status të ri të Kosovës. Si do të veproni?
Zoti Ruecker: Ne kemi vlerësuar se status quo në Kosovë është e paqëndrueshme Kemi vlerësuar se kemi arritur atë që ka qenë e arrithsme sipas mandatit tonë, kur bëhet fjalë edhe për zbatimin e standardeve gjithashtu. Për të arritur një përparim më të madh na nevojitet statusi. Në një farë mënyre kjo duket si një fazë e re por unë nuk mund të paragjykoj se si do të reagojë OKB-ja ndaj kësaj.

BBC: Por kemi një situatë të re edhe në veri të Kosovës. A mund të presim përshkallëzime atje, meqë serbët kanë paralajmëruar se do të vazhdojnë të mbeten pjesë e Serbisë?

Zoti Ruecker: Rezoluta 1244 është ende në fuqi dhe ajo është baza e aktiviteteve tona, e pranisë civile dhe asaj ushtarake. Si shtesë e kësaj ne jemi të udhëzuar edhe nga deklarimet e Grupit të Kontaktit në fillim të bisedimeve për statusin, dhe ato parime flasin për integritetin e Kosovës dhe veriu është pjesë e Kosovës. Por ta shohim, dhe do të bëjmë çmos që kjo të zbatohet.