Muharrem Nitaj BBC, Kosovë

	Shqiptarët e serbët kanë dallime për referendumin e statusin

Mitingu është zhvilluar në prag të referendumit të Serbisë për kushtetutën.

Në fakt, sipas hartuesve të saj, Kosova cilësohet si pjesë e Serbisë.

Ky miting që është mbajtur vetëm pak metra larg urës që ndanë qytetin, ka shërbyer për të ringjallur ndjenjat nacionaliste të serbëve të tubuar, se Kosova është pjesë e patjetërsueshme e Serbisë.

Me thirrjen per pjesëmarrje në referendum, kanë deklaruar folësit e këtij mitingu, përcaktohet edhe ardhmja e Kosovës.

"Të kthehemi nga e ardhmja dhe të mbrojmë Kosovën dhe Metohinë dhe t'ju themi atyre që duan të na e marrin me dhunë se Kosova ka qenë dhe është e Serbisë dhe se populli serb qëndron pas saj,"- ka deklaruar Aleksandër Popoviq, nënkryetar i Partisë Demokratike të Serbisë.

"Askush nuk mund të na e imponojë pavarësinë e Kosovës dhe Metohisë si zgjidhje, prandaj ju ftoj të dilni të votoni pro kushtetutës së re, sepse nëse e humbim Kosovën e kemi humbur edhe Serbinë dhe e kemi humbur edhe veten tonë,"- ka thënë një përfaqësues i Partisë Socialiste.

Qindra pjesëmarrës të këtij tubimi, kanë brohoritur edhe emrin e gjeneralit famëkeq serb të Bosnjës, që ndiqet nga Gjykata e Hagës për krime lufte, Ratko Mlladiq.

Referendumi per kushtetutën e Serbisë do të mbahet në këtë fundjavë, dhe pritet që për të të deklarohen mbi 6.5 milionë qytetarë me të drejtë votes.

Votimet për referendumin për kushtetutën e Serbisë do të hapen edhe në vendbanimet serbe në Kosovë.

UNMIK-u ka thënë se nuk do të pengojë votimet për kushtetutën, por nuk do t'i mbështesë ato.

Rrjedhimisht, ky referendum ka shkaktuar reagime të ashpra në Kosovë.

Kuvendi i Kosovës ka miratuar një rezolutë kundër pjesës ku përmendet Kosova.

Ka pasur edhe ide që si kundërmasë, Kosova të organizojë një referendum për vete, ku do të shpallej pavarësia e Kosovës, por ato nuk janë përfillur nga parlamenti.

Mirëpo, pavarësisht nga përcaktimet serbe, Kosova dhe Komuniteti Ndërkombëtar, kanë qenë të thuaja të njëzëshëm në qëndrimet se ky referendum dhe kushtetuta e Serbisë nuk do të kenë asnjë ndikim për të ardhmen politike të Kosovës.

Shumë të prerë në këtë kanë qenë përfaqësues të SHBA-ve dhe të Britanisë së Madhe, që vizituan Prishtinën.

Frank Wisner, i dërguar i SHBA-ve për statusin, ka porositur se qëndimi i vendit të tij është që statusi të zgjidhet brenda vitit dhe që Kosova të ketë një territor unik dhe të pacoptuar, as në veri e as në jug të lumit Ibër.

David Gowen, ambasador i Mbretërisë së Bashkuar në Beograd, tha se vendi i tij angazhohet që statusi i Kosovës të zgjidhet brenda këtij viti.

Ai tha se qeveria britanike e ka bërë të qartë se dëshiron një zgjidhje të negociueshme brenda këtij viti dhe është e përcaktuar ta mbështesë kryenegociatorin e caktuar nga Kombet e Bashkuara, Marti Ahtisari.

Diplomati britanik Gowen, përjashtoi çdo mundësi që referendumi për kushtetutën serbe të ketë çfarëdo ndikimi në përcaktimin e statusit të Kosovës.

"Mendoj se këto dy çështje janë krejtësisht të ndara nga njëra-tjetra. Referendumi për kushtetutën është një çështje krejtësisht e ndarë nga statusi i Kosovës, prandaj mendoj se ai nuk do të ketë kurrfarë ndikimi në procesin negociues,"- tha në Prishtinë ambasadori britanik David Gowen.