Ardi Pulaj BBC, Tiranë

	Përmasat e HIV/AIDS-it janë bërë shqetësuese edhe në rajon

Që prej fillimit të viteve ’90, kur vendi doli nga izolimi, të dhëna të shumta tregojnë se sjelljet e rrezikshme në lidhje me HIV-in po rriten në mënyrë të vazhdueshme, veçanërisht tek të rinjtë dhe popullata në lëvizje, thotë Fondi i Kombeve të Bashkuara për Fëmijët (UNICEF).

Sipas tij, kjo përbën një arsye për të menduar se ekziston një rrezik potencial për përhapjen e virusit.

“Deri në fund të shtatorit, 2005, në Shqipëri janë raportuar 172 raste të personave të prekur me virusin HIV”,- thotë për BBC-në Alketa Zazo, përgjegjëse për shëndetin dhe zhvillimin e të rinjve në UNICEF.

Sipas Zazos, është e rëndësishme që njerëzit të jenë të ndërgjegjësuar për rreziqet që paraqet infektimi me virusin HIV si dhe përceptimi i rrezikut dhe të mos hezitojnë për të testuar veten, qoftë edhe kur kanë dyshimin më të vogël.

Rasti i parë me infeksionin HIV në Shqipëri u raportua në maj të vitit 1993 gjatë një kontrolli rutinë për infektimin e bankës së gjakut.

Transmetimi seksual vazhdon të dominojë mënyrat e prekjes nga virusi HIV me 75% të të gjitha rasteve, por nuk mungojnë edhe rastet e transmetimit nëpërmjet përdoruesve të drogave të injektueshme që shkëmbejnë shiringat, apo edhe për shkak të mosgarantimit të sigurisë së gjakut.