Arbër Vllahiu Korrespondent i BBC-së në Prishtinë

	Hashim Thaçi shpalli fitoren e PDK-së në zgjedhjet e së dielës

Në një tubim me përkrahësit e partisë së tij, zoti Thaçi, e ka cilësuar fitoren e partisë si të “thellë dhe bindëse” në shumicën e qyteteve të Kosovës.

Ai tha se vota për PDK-në është “besim në vizionin e saj për të ardhmen”.

Megjithatë, disa parti të tjera i kanë hedhur poshtë këto deklarime dhe kanë sugjeruar pritjen e rezultateve zyrtare, që duhet të marri parasysh edhe vërejtjet dhe parregullsitë.

"Zgjedhje evropiane"

Ish-kryeminstri i cilësoi zgjedhjet e së dielës si të suksesshme dhe tha se në to ka “folur Kosova evropiane dhe evro-atlantike”.

“Zgjedhjet ishin një referendum për të ardhmen evropiane, sot folën dhe vendosën evropianët më të rinj. Kosova foli qartë dhe njëzëri"- tha zoti Thaçi.

"Ne shprehëm vullnetin tonë për vlerat evropiane dhe tani Kosova me plot të drejtë pret që edhe BE-ja të flasë njëzëri dhe qartë për të ardhmen evropiane të Kosovës”, tha zoti Thaçi.

Ish-kryeministri i Kosovës vlerësoi arritjet e qeverisjes së tij në tri vitet e kaluara dhe përsëriti sërish moton e fushatës “së pari Kosova”.

Ai tha se Kosova e ka dëshmuar me zgjedhjet e saj se është një shtet ligjor dhe demokratik dhe se qytetarët e Kosovës kanë votuar për anëtarësimin e vendit në NATO dhe në BE.

“Unë jam krenar të jem kryeministër i Kosovës, kryeministër i juaj që këtë vullnet tuajin ta bëjë realitet. Evropa duhet ta përqafojë Kosovën si partner të përgjegjshëm në gjirin e vet”, tha kryeministri Thaçi.