Ende nuk ka përfunduar numërimi i votave

Megjithë tensionin dhe disa incidente që po vërehen gjatë këtij proçesi në disa zona të vendit, është konfirmuar fitorja apo avantazhi i koalicionit të majtë në Bashkitë e mëdha si në Tiranë, Elbasan, Fier, Vlorë, Korçë e Berat.

Në mëngjesin e së martës përfundoi proçesi i numërimit të votave në Bashkinë e Durrësit në të cilin fitoi kandidati i Partisë Socialiste me 340 vota më shumë se ai i Partisë Demokratike.

Socialistët në opozitë deklarojnë se kanë marrë 8 nga 12 qëndrat e qarqeve të vendit ose bashkitë e mëdha ndërsa demokratët pohojne së kanë fituar shumicën e komunave dhe bashkive të vogla.

Pretendimet e palëve pohohen edhe nga mediat në Tiranë që i referohen grupeve të numërimit të votave në zonat zgjedhore.

Ndërkaq, ka patur tension gjatë gjithë ditës së hënë në komunën e Bushatit në Shkodër ku një numër votuesish, pas bllokimit të proçesit të numërimit të votave, kërkuan numërimin me çdo kusht të tyre.

Afati ligjor i përfundimit të numërimit të votave ka skaduar që në orën 18.00 të ditës së hënë por zëdhënësi i Komisionit Qendror të Zgjedhjeve Leonard Olli tha për BBC-në se proçesi do të vazhdojë dhe se të martën situata në zonat me probleme ka qenë më e qetë.