Sanjoy Majumber BBC, Dehli

	Në Indi vendimi i Dhomës së ulët të Kongresit amerikan u quajt historik

Vota pasoi një marrëveshje historike të arritur në fillim të vitit mes presidentit Bush dhe kryeminstrit të Indisë Manmohan Singh.

Legjislacioni pritet të aprovohet nga Senati, por vendimi u prit në Dehli si një moment historik në marrëdhëniet mes të dyja vendeve.

Tetë vjet më parë kur për habinë e të gjithëve India kreu një test bërthamor, Shtetet e Bashkuara iu përgjigjën me shtrëngimin e sanksioneve.

Tani Uashingtoni e ka përmbysur politikën 30 vjeçare të mospërhapjes bërthamore duke bërë një përjashtim për t'i krijuar mundësi Dehlit që të ketë akses në teknologjinë bërthamore për qëllime civile.

Ky vendim është parë në Indi si një shenjë e zhvillimit të marrëdhënieve strategjike mes të dyja vendvee, që vitet e fundit kanë patur lidhje të ngushta politike dhe ekonomike.

Do të kalojë ca kohë përpara se ligji të hyjë në fuqi.

Të dyja vendet duhet të bëjnë të qarta hollësite teknike dhe 45 anëtarët e grupit furnizues bërthamor duhet të amendojnë rregullat për t'i krijuar mundësi Indisë që të marrë ngarkesa me karburante.

Dehli shpreson se vendet do të marrin shembullin e Uashingtonit, kur vendimi mori një mbështetje të gjerë nga të dyja palët.