Bulchiinsa Kurisk keessatti 'kaayyoo keenya galmaan gahaa jirra' jedhe Zeleniskiin

Haguuggii Tamsaasa Kallattii

1. 19 Hagayya 2024Ministira Haajaa Alaa US waliin mariin godhame ''faara qaba'' jedhan Netaaniyaahuun

   

   Madda suuraa, EPA-EFE/REX/Shutterstock

   Ministirri Muummee Israa'el Benjamiin Netaaniyahuu Ministira Haajaa Alaa US waliin marii sa'aatii sadiif gaggeessan ''faara qaba'' jedhan.

   Ministirri Haajaa Alaa US Antonii Biliinkeen erga waraanni Gaazaa eegalee yeroo torbaffaaf gara Israa'el imalaniiru.

   Hamaasa waliin waliigalteen dhukaasa dhaabuu akka waliigalamu dhiibbaa gochaa kan jirtu US, torban darbe Doohaatti erga jaarsummaan itti fufee, dhukaasa dhaabuuf waliigalteerra gahuun ''abdii qaba'' jetteetti.

   Netaaniyaahuun marii Biliinken waliin gaggeessan kana ''miira gaariin godhame'' jedhaniiru. Hamaas garuu isa US faara qaba jettetti hin gammadne.

   Dhimmootni hedduun ammallee qaamoleen lamaan irratti waldhaban waan jiruuf qabatamaa mitii jedha Hamaas.

   Dilbata darbe ibsa kan baase Hamaas Ministirri Muummee Israa'el Benjamiin Netaaniyaahuu ''haalduree haaraa kaahuun waliigaltee danqaa jira'' jehcuun himate. Dabaluunis kaayyoonsaa ''waranichi akka dheeratu gochuudha'' jedhe.

   Gocha waliigaltee danquuf godhan kanaafis gaafatamoo akka isaan taasisu Hamaas beeksise.

   Biliinken jaarsummaa amma Doohaatti deema jiruun tarii carraa isa hunda caala gaarii, tariimmoo hiree isa dhumaadha'' jechuun ibsaniiru.

2. 19 Hagayya 2024Humnoonni Tigraay garaa garummaa TPLF gidduu akka hin seenne Obbo Getaachoo Raddaa gaafatan

   

   Madda suuraa, tplf/fb

   TPLF bakka lamatti cabuu hordofee humnoonni Tigraay garee kamuu akka hin deeggarre Obbo Getaachoo Raddaa waamicha dhiyeessan.

   Waamichi kun kan dhiyaate, gareen TPLF pirezidaantii bulchiinsa yeroo naannoo Tigraay Obbo Getaachoo Raddaan hogganamu kora guyyaa tokkoo kaleessa erga taa'ee boodadha.

   Korri garee TPLF Obbo Getaachoo Raddaan hogganamu, mata duree "TPLF kufaatirraa oolchuu" jedhuun guyyaa kaleessaa korri taa'ame yeroo xumuramu ibsa ejjannoo qabxii kudhan qabu baasee ture.

   Gareen Obbo Getaachoo ibsa baase kanaan, murteen kora waliigalaa TPLF garee Dr. Dabratsiyoonin gaggeeffamu fudhatama hin qabu jedhe.

   Uummanni Tigraayis isaan cinaa akka dhaabbatu gareen Obbo Getaachoo waamicha yoo dhiyeessu, humnoonni Tigraay atakaaroo TPLF gidduutti uumame kana keessatti akka hin hirmaannes waamicha godhan Obbo Getaachon.

   Gareen TPLF Dr. Dabratsiyoonin hogganamu kora waliigalaa guyyootaf gaggeessaa ture har'a ni xumura jedhamee eegama.

3. 19 Hagayya 2024Bulchiinsa Kurisk keessatti 'kaayyoo keenya galmaan gahaa jirra' jedhe Zeleniskiin

   Pireezidantiin Yukireen Volodimiir Zeleniskii humni waraanaa bulchiinsa Raashiyaa Kurisk keessa galuun ''kaayyoosaa galmaan gahaa jira'' jedhan.

   Raashiyaan buchiinsa Yukireen Pokroviskii fi naannoo san to'attee lola wayita cimsitetti, Zeleniskiin lafa Raashiyaa qabatan gadhiisuuf fedha akka hin qaben akeeke.

   Bulchiinsa Raashiyaa amma qabatanii jira dirree lolarraa bilisa ta'e gochuu akka barbaadanis himan.

4. 19 Hagayya 2024Dhaabbatni UAE Itoophiyaatti bubbeerraa elektirikii omishee, humna ibsaa Itoophiyaatti gurguruuf waliigale

   

   Madda suuraa, Ministry of Finance - Ethiopia

   Mootummaan Itoophiyaa piroojektii qilleensarraa anniisaa elektirikii maddisiisu naannoo Somaalee keessatti ijaarsisuuf kubbaaniyyaa UAE waliin waliigaltee raawwate.

   Ijaarsa piroojektii elektirikii bubbeerraa maddu, Ayishaa 1 jedhamu naannoo Somaalee keessatti kan hojjetamu yeroo ta'u, waggaattis anniisaa megawattii 300 maddisiisa.

   Kuni uummata miiliyoona afur ta'u ''haala amaniisaa ta'een tajaajila'' jedha ibsi Ministeera maallaqaa Itoophiyaa.

   Waajirichi akka gabaasetti piroojektiin kun walta'iinsa mootummaa fi deeggarsa dhaabbilee dhuunfaan hojiitti hiikama.

   Ijaarsi isaas kubbaaniyyaa biyya Yunaayitiid Arab Emireets (UAE) kan ta'e AMEA jedhamuun kan gaggeefamu ta'uun ibsameera.

   Kubbaaniyyaan hojii kana abbummaan to'atu kun waggoota 25 dhufan anniisaa omishu kana humna ibsaa Itoophiyaaf gurgura.

   Waliigaltee piroojektii kanaa Ministirri Maallaqaa Itoophiyaa Ahimad Shiideefi hoji-gaggeessaan kubbaaniyyichaa Mohaammed Alnowaayis mallatteessaniiru.

   Bittaa humna ibsaa maddisiifamu kanaa kan mallatteessan ammoo hoji gaggeessaa humna ibsaa Itoophiyaa kan ta'an Ashabbair Baalchaadha.

5. 19 Hagayya 2024Yukireen Raashiyaa keessatti riqicha sadaffaa mancaaste

   

   Yukireen Raashiyaa bulchiinsa Kursk seentee lola gaggeessuu erga jalqabdee riqicha sadaffaa Raashiyaa jalaa barbadeessite.

   Guyyootan duras riqicha Raashiyaan loltootasheef lojistikii dhiyeessuf itti fayyadamtu lama jalaa mancaasuu beeksiftee turte.

   Dilbata, Hagayya 18, yeroo humni qilleensa Yukieen riqicha guddaa laga Seeyim irratti ijaarame haleelu viidiyoo agarsiisu gadi lakkistee ture.

   Gaggeessan humna qilleensaa Yukreen "riqicha tokko jalaa mancaasnera" jechuun miidiyaa hawaasaa gubbaatti maxxansan.

   Gama biroon ammoo pirezidaantin Yukreen Voloodmiir Zeleniskiin kaayyoo Raashiyaa seenanii lola bananiif milkeessuu ibsan.

   Waraanni Yukireen daangaa Raashiyaa kan taate bulchiinsa Kursk seenun waraana gaggeessun Raashiyaa waraana akka dhaabduf dhiibbaa gochuuf akka ta'e himan,

6. 19 Hagayya 2024Yukireen daangaa Raashiyaa seentee qabattus daangaashee keessatti lola guddaatu gaggeeffamaa jira

   

   Madda suuraa, Getty Images

   Yukireen daangaa Raashiyaa cabistee seenuun lola bantus daangaashee keessatti lolli cimaan gaggeeffamaa jira.

   Baha Yukireenitti kan argamtu bulchiinsa Doneetisk keessatti loltoota Raashiyaafi Yukireen gidduutti lolli cimaan gaggeeffamaa jira.

   Loltoonni Raashiyaa magaala Pokroovisk jedhamtu Yukireen irraa fudhachuuf itti dhiyaachuutu dhagahame.

   Pirezidaantin Yukreen Volodmir Zeleniskiin, Raashiyaa keessatti lola gaggeeffamaa jirutti milkaa'uu himuun, lola daangaasaanii keessatti gaggeeffamu ilaalchisee ammoo Raashiyaa qolachuuf waan danda'an hunda gochaa akka jirana ibsan.

   Yukireen daangaa Raashiyaatti lola banuunshee, loltoota Raashiyaa kumaatama heddu baha Yukireen jiran gara adda waraanaa haaraa banameetti akka deemaniifi loltoota Yukireen Donbaas keessaa lolaa jiraniif ba'aa salphisuuf ture.

   Raashiyaan lola daangaashee keessatti baname qolachuuf loltoota hamma tokko baha Yukireen irraa garas geessitus lola Yukireen keessaa itti jirtu hin dhiisne.

7. 19 Hagayya 2024Baankiin Biyyaalessaa Liibiyaa daareektarrisaa butamnaan hojii dhaabe

   

   Madda suuraa, Reuters

   Baankiin Biyyaalessaa Liibiyaa magaalaa guddoo Tiripoolii keessatti argamu erga hojjetaan olaanaa tokko butamanii booda hojii isaa hunda akka addaan kute beeksise.

   Baankichi ibsa Dilbata darbe baaseen butamuu daayreektara teeknooloojii odeeffannoo isaa kan ta'an Musaab Misaaleem balaaleffateera.

   Ibsichis Obbo Misaaleem Dilbata ganama ''qaama eenyummaan isaa hin beekamneen'' mana isaaniitii kan fudhatame yoo ta'u, hojjettoonni biroo ammoo sababii butamuu kanaatti doorsifamaa akka turan himaniiru.

   Baankiin Jidduu galeessaa hanga Obbo Misaaleem gadhiifamutti hojiin akka hin eegalamne dubbata.

   Baankiin jiddugaleessaa walaba kan ta'efi garuu kan mootummaa Liibiyaa ta’e kun, biyya waggootaaf mootummoota wal lolan lama kan Tiriipoolii fi Beengaazii gidduutti cicciramteef galii dinagdee murteessaa ta'e, galii boba’aa Liibiyaa sadarkaa idil-addunyaatti olkaa'uuf beekamtii qabu kan qofaati.

   Kunis kan raawwatame erga baankii Jiddugaleessaa hidhatootaan marfamee torban tokko booda ta’uu dhaabbanni oduu AFP gabaaseera.

   Akka miidiyaaleen biyya keessaa AFPn caqasuun gabaaseetti, hidhannoo kana kan raawwatan bulchaan baankichaa kan ta'an Seedik al-Kaabir dirqiin aangoo gadhiisuufiidha.

   Bara 2012 irraa eegalee aangoo kan qaban Obbo Kaabiir bulchiinsa qabeenya boba’aa fi baajata mootummaa irratti qeequmsi isaan mudata.

   Erga bara 2011 hogganaan Liibiyaa Mua'aammar Gadaafii erga aangoorraa kaafamee ajjeefamee as biyyattiin nageenya dhabuu yeroo dheeraatiif rakkachaa turte.

   Ammatti biyyattiin waldhabdee aangootiin kan qoodamte yoo ta'u, mootummoota lama qabdi - tokko kan UN'n beekamtii argateefi teessummassaa Tiripoliitti godhate, kan biraan ammoo baha biyyattii keessatti kan abbaa waraanaa Jeneraal Khaliifaa Haftaar deeggaramuudha.

8. 19 Hagayya 2024Pirezidantiin Somaaliyaa Hasan, mariin Ankaaraa milkaa’u dhabuutti Itoophiyaa himatan

9. 19 Hagayya 2024Antonii Bilinkan Gaazaa keessatti dhukaasni akka dhaabbatuuf dhiibbaa uumuuf gara Baha Giddugaleessaatti imalan

   

   Madda suuraa, EPA

   Erga waraanni Gaazaa Onkoloolessa darbe eegalee Ministirri dhimma US Antonii Bilinken kan ammaa kana dabalatee yeroo sagalaffaaf gara Baha Giddugaleessaatti imalan.

   Ega mariin dhukaasa dhaabuu torbee darbe Dohaatti eegalee US waliigalteerra akka ga'amu abdii qabaachuu ibsiti.

   Wiixinee haaraa kan garee lamaan walitti fiduu danda'u baasuun dhukaasa dhaabuurra akka ga'amuuf haala mijeessuu kan ibsitu US, kana hordofeeti kan isheen qondaalashee, Antonii Bilinkan, garas ergite.

   Hamaas garuu fooyya'iinsa US himtu kana akka waan abjootaa jiraniitti akka ilaalu ibseera.

   Garaagarummaa guddaan kan uumame ISraa'el loltootashee hunda Gaazaa keessaa baasuu yaada jedhurratti.

   Hamaas yaada kanarratti cicha.

   Aab Bilinken kora hoogganoonni Israa'el Wiixata har'aa, Hagayya 19, 2024, taa'uuf jedhan irratti argamuun akka gara waliigalteetti dhufan dhiibbaa ni uumu jedhamee eegama.

   Ameerikaan ammallee marsaa kana waliigalteen dhukaasa dhaabuu ni millkaa'a jettee abdatti.

   Torbee dhufu sa'atii kana Gaazaa keessa dhukaasi hin jiraatu jedhanii amanu.

   Garuu abdii fi fedhiin US agarsiistu kun haala walfakkaataadhaan hoogganoota Israa'eliifi Hamaas biratti hin mul'atu.

   Lameenuu walhimachuu malee gara waliigalteetti waan isaan fidurratti xiyyeeffataa hin jiran.

   Waliigalteen kun gufachuu isaafis quba walitti qabu.

10. 18 Hagayya 2024Lammiileen Raashiyaa waraana Yukireeniin yaadda'an

    

    Humnoonni Yukireen daangaa Raashiyaatti seenuun lafa qabachuu erga eegalanii torban caaleera.

    Daangaa Raashiyaatti ce'anii bulchiinsa Kursk keessa buufachuun achirraa lolaa jiru.

    Hidhattoonni biyya ambaa daangaa Raashiyaa cabsanii seenuun waraana gaggeessuun kun erga Waraana Addunyaa Lammaaffaatii as kan jalqabaati.

    Erga waggaa lamaa fi walakkaa dura Pirezidanti weerara Yukireen guutummaatti labsee as loltoonni Yukireen haala kanaan fuulduratti deemanii adda waraanaa daangaa Raashiyaa keessa godhatanii lolanii hin beekan.

    Kireemlin diina itti seenan gussitee Raashiyaa keessaa baasuuf dhaadatti, garuu wanti jijjiirame hin jiru.

    Pirezidant Putiin isa loltoonni Yukireen daangaasaanii seenuun qabataniin hanga ammaa weerara jedhanii hin dubbanne.

    Milkaa'ina loltoota Yukireen tuffachuu fi sodaan xiqqeessuuf waan yaadan fakkaatu.

    Ammoo akki lammiileen Raashiyaa haala kana itti ilaalan miira walmakaa qaba. Irra jireessi sodaadhaan guutamaniiru, yaadda'aniiru.

    Magaalaa Mooskoo irraa xiqqoo fagaattee kan argamtu magaalaa xiqqoo Aleksiin jedhamtu keessatti BBCn yaada jiraattotaa gaafateera.

    Namoonni BBCtti dubbatan hedduun waan mudataa jiruun yaadda'uu himan.

    Erga Guraandhala 2022tii TVn Raashiyaa waa'ee oppireeshinii Raashiyaan Yukireen keessatti gaggeessituu gabaasaa turan.

    Humna alaa daangaa Raashiyaa cabsee seena jedhee kan eege hin jiru.

    Ammallee amanamuu dhabuuf wanti isaan hin goone hin jiru. Garuu dhugaan jiru loltoonni Yukireen daangaa Raashiyaa keessa jiru.

    Jiraattonni nagaa akka fedhan dubbatu.

    Akkamitti nagaan uummanni barbaadu akka argamu garuu gaaffii guddaadha.

    Kireemlin ammallee hojii loltoonnishee Yukireen keessatti itti jiran eeruun ''oppireeshinii waraanaa addaa'' gaggeessaan jira jetti.

    Yeroo ammaa Raashiyaan Kursk keessatti oppireeshinii farra shororkeessummaa gaggeessaa jira jechuun Kireemlin ibsiteetti.

    Kun ilaalcha qondaaltota mootummaati. Garuu uummanni Raashiyaa, keessattuu Kursk keessa jiraatan, ''waraanni'' gaggeeffamaa jiraachuu ibsan.

11. 18 Hagayya 2024Israa'el Gaazatti haleellaa qilleensaa raawwatteen namoota namoota 17 ajjeeste

    

    Madda suuraa, Reuters

    Israa'el haleellaa qilleensaa Gaazatti raawwatteen lammiilen Filisxeem 17 ajjefaman.

    Ministiira Fayyaa Gaazaa, kan Hamasin hogganamu, waabeffachuun Rooyitars akka gabaasetti haleellan kun guyyaa kaleessaaa yoo ta'u gidu gaaleessa Gaazaa magaala Zawaayda jedhamutti gaggeeffame.

    Gaazexaan Israa'el Haretz jedhamu ammoo haleellaa Israa'el kanaan Filisxeemonni 19 Gaazaa keessatti du'uu ibse.

    Gama biraan ammoo Hamaas rokkeettii gara Israa'elitti dhukaasuu hordofee namoonni gadhiisanii akka bahaniif Israa'el ajajjee jirti.

    Akkasumas loltoonni lama jalaa ajjeefamuu Israa'el beeksiftee jirti.

    Weest Baankitti ammoo Israa'el hidhattoota Hamaas loltoota Israa'el irratti haleellaa gaggeeffame qindeessan jette ajjeesuu beeksifte.

12. 18 Hagayya 2024Mariin waraana Gaazaa dhaabuu akka adda hin cinneef Antoonii Biliinkan har'a gara Israa'el imalu

    

    Madda suuraa, Reuters

    Waraana Gaazatti gaggeeffamu dhaabuf mariin gaggeeffamu akka adda hin cinneef Ameerikaan qondaalashee olanaa gara UStti erguufi.

    Rooyitarsi akka gabaasetti Ministiirri Dhimma Alaa Ameerikaa Antoonii Biliinkan har'a gara Israa'el imalu.

    Imalli Biliinkan kun Israa'elifi Hamaas waraana Gaazatti gaggeessaa jiran akka dhaabaniif mariin eegalame akka itti fufu dhiibbaa gochuufi jedhame.

    Waraanni Gaazaa erga eegalee ji'a kudhan guutera. Erga waraanichi eegalee kaasee Antoonii Biliinkan si'a kudhan garas imaluusaaniti.

    Qamoleen waraanatti jiran waraana dhaabanii nagaa akka buusaniif US, Masiriifi Kaatar jaarsummaa taa'un dhiibbaa dippilomaasii guddaa gochaa jiru.

    Biliinkan marsaa kurnaffaa kana gara Baha Giddu Galeessaa kan imalan, Iraanifi Hezbollaan haaloo haleellaa bahuu Israa'elirratti ni gaggeessu jedhamee yeroo sodatamaa jiruttiidha.

13. 18 Hagayya 2024Israa'el Libaanus haleeluun namoota 10 ajjeefte

    

    Madda suuraa, reut

    Haleellaa kibba Libaanus mudate kanaan namoonni 10 ajjeefamuu kan ibsan aanga'oonni Libaanus iddoon baqattoonni Siiriyaa qubatan xiyyeeffannaa haleellaa kanaa ture jedhan.

    Haleellaa Israa'el kanaan haati ijoolleeshee lama waliin ajjeefamteetti.

    Magaalaa Nabaatiyaa jedhamtu keessatti gamoon baqattoonni Siiriyaa keessa qubatan haleelameera jedhan Ministirri Fayyaa Faraas Abiyaad.

    Israa'el gamasheen gamoon haleelame bakka kuusaa meeshaa waraanaa Hezboollaati jette.

    Taatee kana hordofe deeggarsa Iraaniin kan socho'u Hezboollaan rookeetiiwwan hedduu marsaa lamaan gara Israa'el dhukaaseera.

    Haleellaa rookeetii Hezboollaa marsaa duraan miidhaan qaqqabe hin turre, haleellaa marsaa lammataan garuu loltoonni isaa lama miidhamuu humni ittisaa Israa'el ibse.

    Dhiheenya kana dhibdeen Israa'el fi Hezboollaa akkaan hammaateera.

    Keessattuu ammoo erga humnoonni Israa'el kibba Magaalaa Beeruut keessatti ajajaa olaanaa Hezboollaa Fu'aad Shukur ajjeestee as gareen kun haaloo ba'uuf qophiitti jira.

    Hoogganaan Hezboollaa Libaanus keessa socho'uu Hasan Nasrallaa haaloo ba'uun waan shakkii qabu miti jedhaniiru.

14. 17 Hagayya 2024Qananiisaa Baqqaalaa miidhaama irra gaheen adda kutuuf gahee akka ture hime

    

    Madda suuraa, Kenenisa Bekele(FB)

    Atileeti Qananiisaa Baqqalaa dorgommii maaraatoonii Olompikii Paaris irratti miidhama isa mudateen adda kutuuf gahee akka ture ibse.

    Atileetichi dorgommii maaraatoonii booda yeroo duraaf yaada miidiyaa hawaasaa isaa gubbaa maxxanseen, dorgommii biyyaa waan ta'eef jabaatee xumuruu hime.

    ''Olompikii Paarisiif sirriitti qophaa'ee kaniin ture ta'us, dorgommicharratti miidhamni sarbaa(hamstring) na mudate. km 10 ergan fiigee natti cime. km 15 irratti adda kutuu yaadeen ture.

    ''Haa ta'u malee jaalallin biyya koo Itoophiyaaf qabu na jabeessee maaliis ta'u dorgommicha akkan xumuru na dhiibeera'' jedhe.

    Qananiisaa Baqqalaa waggaa 12 booda Olompikiirratti deebi'ee hirmaate. Dorgommii kanas 39ffaa ta'uun xumure.

    ''Olompikiin waayee medaaliyaa argachuu qofa miti, cichoominaa fi murannoo qabaachuu agarsiisuudha'' jedhe.

    Ammaan tana boqonnaa fudhatee waldhaansa argaachaa akka jiruufi wayyaa'aa jiraachuus ibse.

    Deeggartootasaa fi uummata Itoophiyaa isa jajjabeessan galateeffatee, ''Isiniifan fiiga, abdii hin kutu'' jedhe.

15. 17 Hagayya 2024Donaald Tiraamp gurgurtaa Macaafa Qulqulluu irraa doolaara kuma 300 buufatan

    Pireezidantiin duraanii Ameerikaa Doonald Tiraamp gurgurtaa Macaafa Qulqulluu fi hojii kiriptookaransii irraa bu'aa argachaa jiru.

    Haatahu malee gabaasa haaraa Kamisa darbe baheen himannaa seeraa irratti banamee tureen doolaara miiliyoona 100 ol akka kaffalan irratti murtaa'eera.

    Kaadhimamtoonni mootummaa federaalaa sadarkaan faayinaansii galii, inveestimentii, qabeenyaa fi idaa isaan irra jiru gabaasuun irraa eegama.

    Pireezidantiin duraanii kuni qabeenya waraqaa fuula 150 irratt tarreeffame dhiyeesanillee qarshiin mana murtiidhaan akka kaffalan irratti murtaa'e miiliyoona 100 caaleera.

    Gabaasa haala faayinaansii isaanii saaxileen gurgurtaa Macaafa Qulqulluu irraa doolaara 300,000 buufachuu mirkaneesseera.

    Pireezidantichi kitaabilee kana kan gurguruu eegalan jalqaba waggaa kanaa irratti weellisaa Lii Giriiwuud jedhamu waliini.

    Giriimnwuud wallee God Bless the USA jedhamuun kan beekamu yoo tahu maqaan Macaafa Qulqulluu amma Tiraamp wajjin gurguranis God Bless the USA Bible jedhama.

    Yeroo ammaa marsariitii Giriimnwuud irratti Macaafni Qulqulluu kuni doolaara 59.99'n gurguramaa jira.

    Tiraamp gurgurtaa kitaabilee isaanii biroo irraas galii argataniiru.

    

    Madda suuraa, Getty Images

16. 17 Hagayya 2024Daraartuu Tullluu aangoo Pirezidantummaa Federeeshinii Atileetiksii gadhiisuu akka maltu akeekte

    

    Madda suuraa, ETV

    Pirezidantiin Federeeshinii Atileetiksii Itoophiyaa Daraartuu Tulluu, qabxii Olompikii Paarisitti argame ilaalchisee marii godhame irrattii aangoo gadhiisuu akka maltu akeekte.

    Qabxii gad-aanaa gareen Itoophiyaa Paarisitti galmeesseef sababni ijoon hoggansa Koree Olompikii akka ta'e ibsamee, pirezidantiin korichaa akka aangoo gadhiisaan gaaffiin ka'us ''aangoorraa ka'uun furmaata hin ta'u'' jechuun didaniiru.

    Rakkoon kan furamuu danda'u rifoormii gaggeessuun akkasumas piroojektii atileetiksii isa adda cite deebisuun akka ta'e Dr Ashabbir himaniiru.

    Komishinar Daraartuu Tuulluu gama isheen qabxii argameef uummata Itoophiyaa dhiifama gaafachuu miidiyaan biyyaalessaa, kan dhimma kanarratti qooda fudhattoota mariisise gabaaseera.

    Guddina atileetiksiif aarsaa kamuu kaffaluuf qophii ta'uu ibsiteetti kan jedhu gabaasni ETV, filannoo hooggansa federeeshinichaa Onkololessa ykn Sadaasa gaggeeffamu irratti ''fuula haaraa arguu maltu'' jetteetti jedha.

    Akka gabaasichaatti ''atileetiksii Itoophiyaaf ni fayyada yoo ta'e aarsaa lubbuuyyuu nan kaffala'' jetteetti.

17. 17 Hagayya 2024Faransaay xiyyaarota mootummaa Naayijeeriyaa sadii humnaan Kaampanii Chaayinaaf kennite

    

    Madda suuraa, @NGRPresident

    Manni murtii Faransaay xiyyaarota mootummaa Naayijeeriyaa qabee kaampaanii Chaayinaaf dabarsee kenne.

    Dhibdeen kaampanii Chaayinaafi mootummaa Naayijeeriyaa kan maddu waliigaltee bara 2007 irraayi.

    Misooma paarkii indaastrii Kibba Lixa Naayijeeriyaatti hojjetamuuf mootumman Naayijeeriyaafi kaampaniin Chaayinaa Zoongishaan Fucheeng jedhamu waliigaltee raawwatanii ture.

    Booda himannaa dhaabbatichi hojii seeraan alaa keessatti hirmaate jedhuun mootummaan waliigaltichi bara 2015 fi 16 gidduutti adda kute.

    Achiis dhaabbatichi mootummaa Naayijeeriyaa himate.

    Bara 2021 keessa manni murtii UK keessa argamu bulchiinsi Naayijeeriyaa waliigalticha haqe Oguna jedhamu kaampaniichaaf beenyaa doolaara miiliyoona 74.5 akka kaffalu murteesse.

    Mootummaan Naayijeeriyaa ammoo kaampaniiwwan Chaayinaa ''mala ittiin harka micciiran qabu'' jechuun kaffaltii kana akka hin raawwanne ibse.

    Amma xiyyaaronni pireezidantii Naayijeeriyaa sadii suphaaf wayita Faransaay jiran murtee haaraa darbeen qabeenyi kun kaampaanii Chaayinaaf akka darbu ta'eera.

    Aanga'oonni Naayijeeriyaa xiyyaaronni jalaa fudhatamuu mormanii, kaampaanichi ''mootummoota Afrikaarratti burjaajii hojjeta'' jedhan.

18. 17 Hagayya 2024Miseensota paarlaamaa Turkii wal-reeban

    Dhimma miseensa rogeessa mormituu mana hidhaa jiru irratti falmii ka'een miseensoti paarlamaa Turkii wal-lolan.

    Yeroo miseensi Paartii Hojjetootaa, Ahimeet Siik haasaa taasisaa turetti miseensi paartii warra Taayip Erdohaan itti siqee kabaluuf yeroo yaalu mul'ata.

    Kana booda lolli guddaan paarlaamicha keessatti ka'e.

    Miseensonni paarlaamaa yeroo isaan copha dhiigaa qulqulleessan mul'ataniiru.

    Ogeessa seeraafi rogeessi mirga namoomaa Kaan Ataalaay jalqaba bara kanaarratti ture teessoo paarlaamaa kan dhabe.

    Miseensi paarlaamaa Siik paartii biyya bulchurraa haleellaan irra gaha yeroo jedhanitti ture lolli kan jalqabe.

    Ataalaay bara 2022tti hidhaan waggaa 18 erga irratti murtaa'een booda teessoo paarlmaaf kan dorgomaa ture.

    Dhaddacha wal-falmisiisaan erga taasifameen booda tola oolaan beekamaa badhaasa argates hidhaa bu'eera.

    

    Madda suuraa, Getty Images

19. 17 Hagayya 2024Daa'imni ganna 10 faana daayinosarii waggaa miiliyoona 200 duraa abuurte

    

    Ijoolleen ganna 10 UK Weelisitti bashannanaaf gara qarqara galaanaa haadhashee wajjin deemte, faana daayinoosarii irra akka adeemaa turte hin barre.

    Barattuun kuni faana miila daayinoosraii gosa kaamelooshiyaa jedhamu shan kan ogeessonnii waggaa miiliyoona 200 dura ture dha jedhan argatte.

    Paaliyentoolojistoonni akka jedhanitti faanni miilaa kuni sm75 walirraa kan fagaatuufi bineensota marga soorataniin bara tiraasiik keessa waan tahe dha jedhan.

    Tegaaniifi haatishee faana daayinosrii ''isa sirrii'' akka tahuu danda'u ogeettii Muuziyeemii Biyyaalessaa Weelis irraa itti himameera.

    Ogeessoti faanni kuni baayyee guddaafi kan daayinoosarii Saawuroopoodomoorfaa jedhamuuti jedhan.

    ''Waan argine waan namatti toluufi bareedaa dha,'' jette Teegaan.

    Haadhashee wajjin, ''wayii yoo argine jenneetuma adeemaa turre garuu kana agarra jennee hin yaadne,'' jette.

20. 17 Hagayya 2024Loltootni Yukireen Raashiyaa keessatti riqicha murteessaa jigsan

    

    Madda suuraa, TELEGRAM

    Riqichi Raashiyaadhaaf barbaachisummaa guddaa qabu haleellaa Yukireeniin barbadaa'eera.

    Yukireen weerara naannoo Kursk Raashiyaa itti fuftee riqicha laga Seym irra jiru barbadeessite.

    Akka qondaalli Raashiyaa jedhanitti, yeroo hojiin Yukireen naannoo magaalaa Glushkovotti hojjettu jeequmsi uumameera.

    Riqichi diigame kun ulaa Raashiyaan waraanaaf dhiyeessitudha. Jiguunsaa qaawwa uumuu danda'a.

    Pirezdaant Volodimiir Zeleniskiiy akka jedhanitti loltoonni Yukireen naannoo Kursk irratti qaban cimsaa jiru.

    Weerara Yukireen kanaan walqabatee uummatni daangaarra jiru 120,000 buqqa'eera.