'Hamma mootummaan Ce'umsaa hundaa'utti' Venezuweelaa 'Ameerikaatu gaggeessa'- Tiraamp

Haguuggii Tamsaasa Kallattii

1. 4 Amajjii 2026Tiraamp maaliif Veenizuweelaa irratti qiyyaafate?

   

   Madda suuraa, Reuters

   Tiraamp erga marroo lammataaf gara aangootti dhufee mootummaa Veenizuweelaa irra dhibbaan cimaa gaheera.

   Jalqaba bulchiinsi Tiraamp qaama Maaduroo to'annoo jala oolchuuf odeeffannoo kenneef badhaasa laatu dachaan akka dabale hime.

   Fulbaana darbe, US dooniiwwan Kibba Ameerikaarraa qoricha sammuu hadoochuu geejibu jette irratti qiyyaafachuu jalqabde.

   Dooniiwwan kunneen irratti haleellaan si'a 30 ol raawwateera kanaanis namoonni 110 ol ajjeefamaniiru.

   Bulchiinsi Tiraamp godaantonni Veenzuweelaa dhibbaan lakkaa'aman Ameerikaa galuuf bulchiinsa Maaduroo sababa tahuu himata.

   Tiraamp ragaa otoo hin kenniin ''mana hidhaasaa qulleessaa, koolugaltummaa akka malee akkasumas hidhamtoonni gara Ameerikaa akka baqatan 'dirqisiise' fa'a,'' jedhe.

   Pireezidantiin Ameerikaa mootummaan Veenzuweelaa maallaqa daldala boba'aa irraa argamu yakka qoricha sammuu hadoochuu wal-qabatee raawwatuuf oolcha, innis yakka kana hoggana jechuun isa himatu.

   Maaduroon himannaa kana kan haalu yoo tahu Ameerikaan maqaa waraana ''qoricha sammuu hadoochu' irratti jalqabe jettun aangoorra isa buustee kuufama boba'aa biyyattii to'chuu feeti,'' jedhan.

2. 4 Amajjii 2026Arbi ambaasaadara biiraa Keeniyaa 'Taskar' jedhamuu ture ganna 54tti du'e

   

   Madda suuraa, Amboseli Trust for Elephants

   Arbi Keeniyaa abbaa kumbii dheeraa bineensota Afrikaa gurguddoo jedhaman keessatti ramadamu sababa dullumaan ganna 54tti du'e.

   Arbi maqaa mararateen Kireeg jedhamu kuni Sambata kaleessaa paarkii Ambooseelii jedhamu keessatti du'a uumamaa du'uu qondaaloti paarkichaa beeksisaniiru.

   ''Kireeg arba ganna 54 ture. Umrii quufeera, ilmoolee baayyee akka godhates shakkii hin qabu,'' jedhe paarkiin Ambooseelii ergaa geggeessaa dabarseen.

   Arbi kumbiisaa dheeraan beekamu Kireeg, daangaa Taanzaaniyaafi Keeniyaa irratti hawwata tuuristii guddaa ture. Bara 2021 amabaasaaddara biiraa Keeniyaa Taskar jedhamuu tahee ture.

   Taskar - maqaa arboota kumbii dheeraa qabaniiti.

   ''Kireeg arba Afrikaa kumbii dheeraa qaban muraasa lafa kanarra hafan keessaati- kumbiinsaa lamaan kg45 ol madaala. Hambaa lubbuu qabeessa Afrikaa ture,'' jedhe paarkichi

3. 4 Amajjii 2026Nikolaas Maaduuroo mana hidha eegumsa cimaa Birookiliiyn geeffame

   

   Madda suuraa, Reuters

   Xiyyaarri pireezidantii Veenzuweelaa qabate Maduuroofi haadha warraasaa qabate Niiw Yoorkitti buufata xiyyaaraa waraanaa Stewart Air National Guard Base jedhamu kan qubate Sambata xiqqaa galgala ture.

   Achii booda akka gabaasaaleen US agarsiisanitti Maaduuroon gidduugala tursiisaa Birookiliin(Metropolitan Detention Center in Brooklyn) geeffame.

   Gidduugalli kun bakka hidhamtootni maqaa guddaa akka Seen Diidii fi kaanis keessa jiraniidha.

   Manni Murtii Olaanaa Veenzuweelaa yeroodhaaf pirezidantii itti aanaan aangoo akka qabatu murteesseera.

4. 4 Amajjii 2026Hamma mootummaan ce'umsaa hudaa'utti Ameerikaan Veenzuweelaa geggeessiti

   

   Madda suuraa, Getty Images

   Pireezidantiin Ameerikaa Donaaldi Tiraamp hamma mootummaan ce'umsaa nagaa qabeessa, sirriifi seera-qabeessa tahe hundaa'utti Ameerikaan Veenizuweelaa 'geggeessiti' jedhan.

   Haleellaa Ameerikaan raawwatteen yeroo ammaa Pireezidantiin Veenizuweelaa Nikoolaas Maaduuroo to'annoo jala jiru.

   Dhaaboti boba'aa Ameerikaa bu'uuraalee misoomaa 'Veenizuweelaa caccaban' tolchuun akka galii argamsiisan godhu,'' jedhan Tiraamp.

   Ameerikaan Veenizuweelaa irratti haleellaa kan bante Sanbata kaleessaa yoo tahu, kanaanis Maaduuroofi haati warraa isaanii Siiliyaa Filooras qabamanii humnoota Ameerikaan biyyaa baafamaniiru.

   Veenzuweelaan labsii yeroo muddamaa kan keesse yoo tahu ''weerara waraanaa'' balaaleffachuun hogganaan biyyattii pireezidantii Maduroo qofa dha jedhan pireezidantiin ittaanaa Veenizuweelaa.

   Maaduroofi haati warraa isaanii Filooras Sanbata ganama ture magaalaa guddoo biyyattii Kaaraakaas irraa helikooptaraan gara US kan geeffaman.

   Yeroo ammaa kana magaalaa Niiw Yoork keessatti mana hidhaa Biruukiliin keessa jiru.

   Abbaan Alangaa waliigalaa US Paam Boondii Maaduroofi haati warraa isaanii Niiw Yoork keessatti himannaan irratti banameera.

   Haati warraafi abbaan warraa himannaawwan yakkaa shororkeessumma qoricha sammuu nama hadoochuu, kookeenii biyyatti galchuu, meeshaalee waraanaa Ameerikaa irra balaa fiduu danda'an dhuunfachuun himatamaniiru.

   Abbaan alangaa Boondii, ''dheekkamsa sirna haqaa Ameerikaa, biyyoo Ameerikaafi dhaddacha Ameerikaa irratti argatu,'' jedhan.

5. 4 Amajjii 2026Baayyee rifanne: Addunyaan to'atamuu Maaduuroo irratti yaada kenne

   

   Madda suuraa, Reuters

   Pirezidantiin Veenzuweelaa Nikolaas Maaduroo qabamee US geeffamuu ilaalchisee biyyoota addunyaa biraa irraa yaadi adda addaa dhiyaachaa jira.

   • UK: Ministirri Muummee Kiir Istaarmeer bulchiinsi Nikolaas Maduuroo xumura argachuusaatiif ''gadda tokkollee hin qabu'', garuu ammoo gidduuseentummaan waraanaa fudhatame seera idila addunyaa cabseeramoo hin cabsine kan jedhu keessa galuu hin feenu jedhe.
   • Raashiyaa: Ministeerri Haajaa Alaa, US tarkaanfiishee keessa deebitee ilaaluun ''pirezidantii biyya walabaa seeraan filatamee'' fi haadha warraasaa haa gadhiistu, jedhe. Veenzuweelaafi US gidduu mariin ni barbaachisas jedhe.
   • Chaayinaa: Ministeerri Haajaa Alaa ''akka malee rifachiisaadha'' jedhe. US humnasheetti fayyadamuu cimsitee balaaleffatte, seera idila addunyaa akka kabajjus waamicha goote.
   • UN: Barreessaa Olaanaan Antooniyoo Gutareez ''akkamalee rifachuu'' beeksise. Ta'ii hamaadha jechuunis seerri idila addunyaa akka kabajamu waamicha godhe.

6. 4 Amajjii 2026Akkam bultan? Tamsaasni kallattii Dilbataa eegale

   Tamsaasa kallattii kanaan haleellaa Venezuweelaa irratti raawwate dabalatee, dhimmoota jajjaboo addunyaa isin biraan geenya.

   Nu hordofaa!

7. 4 Amajjii 2026Boornimooz 2-3 Arsenaal

   Arsenaal Boornimooziin galchii 3-2'n mo'achuun garaagarummaa Maanchister Siitii waliin qabu gara qabxii toorbaatti guddise.

   Gabri'eel Magaalesh, Deklaan Raayis galchii lama lakkoofsisuun mo'atanii bahan.

   Astoon Viilaa erga galchii 4-1'n mo'atanii Arsenaal gahumsa guddaan itti fufaniiru.

   Yeroo murteessaa kanatti taphattoonni cicimoon miidhama irraa deebi'aniiru.

   Arteettaan waancaa mo'achuuf kileboota nu dorgoman irraa fagaachuu qabna jedhee ture

8. 3 Amajjii 2026Ameerikaan har’a naga qabeettii fi biyya ofitti boontudha- Tiraamp

   Namoonni siyaasaa fi qondaalonni olaanoo Venezuweelaa waan Maduuroo irratti raawwate isaan irrattis raawwachuu akka danda’u hubachuu qabu jedhe Tiraamp.

   ‘’Uummanni Venezuweelaa har’a bilisa baheera’’ jedhe. Ameerikaanis naga qabeettii fi kan ofitti boontudha.

   Ajajaan waraana Ameerikaa Peetee Heegiz oppireeshiniin ganama kanaa dogogora tokko malee raawwate jedhe.

   Maduuroon carraa of oolchuu qaba ture, akkuma Iraan sana carraa qab ature. Garuu carraa kanatti fayyadamuu hin dandeenye jedhe.

9. 3 Amajjii 2026Nikoolas Maduuroo akkamiin akka to’atame US ibsite

   Jeneraalli Ameerikaa Daan Kaayin akkamiin oppreshinii Maduuroo to’achuu dubbate.

   Nikoolas Maduuroo to’achuun qindoomina human qilleensaa, loltoota lafoo, human galaanarraa fi humnoonni hundi waliin hojjechuuri’’ jedhe.

   Oppireeshiniin kun dandeettii basaasaa fi tikaa waggootaaf shororkeesitoota to’achuuf qabnu kan agarsiise jedhe.

   Nikoolas Maduuroo to’achuuf oppireehsiniin gaggeeffame ‘’kan dorgomaa hin qabne’’ jedhanii xiyyaaraonni waraanaa 150 tahan wal faana bakka sirrii fi yeroo sirriitti dhaqabuu himan.

   Ji’ootaaf odeeffannoo sasabaa turuu kan himte Ameerikaan eessa akka jiraatuufi maal akka nyaatu osoo hin hafiin qorachaa turuu himan.

10. 3 Amajjii 2026Pirezidantiin Venezeuweelaa Niwu Yoorkitti himannaan irratti baname

    

    Madda suuraa, Reuters

    Pirezidantiin Venezeuweelaa Nikolaas Maduuroo fi haati manaa isaa Bulchiinsa Kibba Niwu Yoorkitti himannaan irratti banmauu Abbaan Alangaa US Paam Boondii ibsan.

    Maduuroon yakkoota akka ''sochii qoricha sammuu hadoochuun walqabatu-Narco-Terrorism Conspiracy jedhamu, daldala kookeenii, meeshaalee waraanaa ammayyaa (Machineguns) fi kanneen salphaatti waa barbadeessuu danda'an hidhachuu akkasumas meeshaalee US barbadeessuurratti xiyyeeffatan hidhachuun,'' himatame.

    ''Namoonni kunneen lammiilee Ameerikaarraa gatiinsaanii ni argatu. Haqi Ameerikaa ni ba'a. Dachee Ameerikaarratti, manneen murtii Ameerikaatti gatii isaanii ni argatu,'' jedhan Abbaan Alangaa US kun.

    Abbaan Alangaa kun haati manaa pirezidantichaa yakka akkamiin akka himataman hin ibsine.

    ''Loltoota Ameerikaa ergama milkaa'aa raawwachuun namoota daldala qoricha sammuu namaa hadoochuun beekaman kunneen to'ataniif galatni haa ta'u,'' jedhan Abbaan Alangaa kun.

11. 3 Amajjii 2026UKn haleellaa US Venezuweelaa irratti raawwatte keessaa harka hin qabdu- MM Istaarmar

    

    Ministirri Muummee UK Keeyir Istaarmar biyyisaanii haala kamiinuu haleellaa US Venezuweelaa irratti keessaa akka harka hin qabne ibsan.

    Yaada bal'aa kennuu dura haalota qorataa akka jiranis ibsan.

    Dhimma to'atamuu Pirezidantii Venezuweelaa Nikolaas Maduuroo ilaalchisuun Pirezidant Doonaald Tiraamp waliin homaa akka hin dubbanne ibsan Istaarmar.

    ''Ammatti kanan jechuu danda'u UKn oppireeshinii kana keessatti akka hin hirmaanne qofa,'' jechuun miidiyaalee UKtti himan.

    Miseensonni paarlaamaa UK hedduun haleellaa Venezuweelaa irratti raawwatame balaaleffataniiru.

    MM Istaarmar kanarratti ejjennoosaanii wayita gaafataman ''jalqaba odeeffannoo qulqulleeffachuun qaba, ragaa sirrii walitti qabachuun qaba. Pirezidantii Tiraamp waliin dubbachuun barbaada. Michuuwwan keenya waliin dubbachuun qaba. Akkuman jedhe, wantan mirkaneessuu barbaadu, haleellaa sana keessaa hirmaannaa tokkollee akka hin qabnedha,'' jedhan.

12. 3 Amajjii 2026Kolombiyaa waraana bobbaaste, Venezuweelaa fi naannawa isheetti muddamni hammaate

    

    Madda suuraa, CARLOS ORTEGA/EPA/Shutterstock

    Pirezidantiin Kolombiyaa Gustaavoo Peetiroo walga'ii hatattamaa mana maree nageenyaa biyyaalessaa booda daangaa Venezuweelaa irratti waraana bobbaasuu ibsan.

    Haleellaa US magaalaa guddoo Venezuweelaa Karakas fi kutaalee biyyattii kaan keessatti raawwatte hordofee lakkoofsi lammiilee biyyattii gara Kolombiyaa baqatanii dabaluu danda'a sodaa jedhuun Bogataan qophii taasisaa jirti.

    Haleellaa US kana booda Pirezidantiin Venezuweelaa Nikoolaas Maduuroo fi haati warraa isaanii Seeyiliyaa Filoores qabamuun erga dhagahamee booda biyyoonni ollaa kana jiran muddama seenaniiru.

    Kolombiyaa fi Venezuweelaan daangaa kiilomeetira 2,000 ta'u qooddatu.

    Biyyoonni lameen seenaa keessatti wayita rakkoon mudatu godaantota walii simachuudhaan beekamu.

    Lammiileen biyyoota kunneen wayita rakkoon diinagdee, siyaasaa fi nageenyaa mudatu walitti dheessuun beekamu.

    Balaan Venezuweelaa mudate kun daafoonsaa biyyoota ollaa qaqqabuun hin hafu, gama kanaan jalqabarra kan jirtu Koolmbiyaadha.

13. 3 Amajjii 2026Pirezidaantiin Venezuwwelaa qabame mana murtii UStti ni dhiyaata, haleellan dabalataa waan jiraatu miti - senaatara US

    

    Madda suuraa, Reuters

    US pirezidaantii Venezuweelaa Nikoolaas Maduuroo to'annaa jala oolchite mana murtii UStti akka dhiyeessitu Ministeera Dhimma Alaa US kan ta'an Maarkoo Ruubiyoo waabeffachuun Senaatara Rippaabilikaanii kan ta;an Maayik Lee ibsan.

    Akka Senaatarri US kun jedhanitti waraanni US haleellaa dabalataa Venezuweelaa irratti hin gaggeessu.

    Bilbilaan Maarkoo Ruubiyoorraa mirkaneeffadhe jechuun Maayik Lee akka ibsanitti, Nikoolaas Maduuroo to'annaa jala oolun dhugaa ta'uufi mana murtii UStti ni dhiyaata.

    Yeroo ammaa mana hidhaa US keessa jiraachuu kan ibsan senaatarri kun, himanni yakkaa irratti banamuuf jedha.

    "Inni [Maarkoo Ruubiyoo] akka naaf akeeketti kana booda haleellan waraanaa dabalataa Venezuweelaa irratti hin gaggeeffamu," jedhan.

    Dabaluunis, US haleellaa waraanaa gaggeessunshee "kanneen Maaduroo to'annaa jala oolchuf ergaman tiksuuf ture."

14. 3 Amajjii 2026Kan hidhate hundi ni bobbaafama- Ministeera Ittisaa Venezuweelaa

    

    Madda suuraa, Reuters

    Ameerikaan haleellaa biyyattiirratti raawwatteen pirezidantii fi haadha waraasaanii to'achuu erga ibsitee booda Ministeerri Ittisaa Venezuweelaa biyyattii keessa qaamoleen hidhannoo qaban hundi akka bobbaafaman ibse.

    Vilaadimiir Paadiriinoo Looppeez ibsa afaan Ispeeniin kennaniin tokkummaan ''weerara hamaa'' irratti raawwatame dura akka dhaabbatan waamicha dhiheessan.

    ''Venezuweelaan ajaja Maduuroon qaamoleen hidhatan hundi irree tokkoon bobba'uu qabu'' jechuun dabarsan hojjrra oolchaa jiraachuu ibsan.

    ''Nu haleelaniiru, weerara hamaa nurratti raawwataniiru. Garuu harka nu kennachiisuu hin danda'an,'' jedhan Ministiirri Ittisaa kun.

    Ameerikaan gamasheen erga Pirezidant Maduuroo to'attee booda haleellaa itti fufuuf akeeka akka hin qabne ibsaa jirti.

    Ministirri Dhimma Alaa US Maarkoo Ruubiyoo haleellaan akka itti hin fufne ibsuu seeneetarri warra Ribbaalikaan tokko ibsaniiru.

    Maayik Lii erga Maark Ruubiyoo waliin bilbilaan dubbatanii booda Pirezidantiin Venezuweelaa Nikoolaas Maduuroo qabamuu mirkaneeffachuu ibsan.

    Ameerikaan erga bara 1989 Paanaamaa irratti tarkaanfii waraanaa fudhattee as Ameerikaa Kibbaatti haleellaa akkasii raawwattee hin beektu.

    Yeroo sanas Humni Addaa US Pirezidantii Paanaamaa Maanu'eel Nooriyeegaa qabanii turan.

15. 3 Amajjii 2026Pirezidaantii Ittaantuun Venezuweelaa Nikoolaas Maduuroo eessa akka jiran hin beeknu jedhan

    US haleellaa waraanaa Venezuweelaa irratti banuun pirezidaantii biyyattii Nikoolaas Maduuroofi Giiftii Duree to'achuun biyyaa baasuu beeksisuu hordofee pirezidaantii ittaantuun Venezuweelaa Delsi Rodirigeez ibsa kennan.

    Mootummaan Venezuweelaa achi buutee pirezidaantii biyyattii hin beeku jechuun ibsan.

    Pirezidaant Nikoolaas Maduuroofi Giiftii Dureen biyyattii lubbuu jiraachuusaanii [US] irraa "ragaa hatattamaa barbaanna" jedhan.

    Tiraamp ibsa miidiyaa hawaasaa Truth irratti baaseen, US haleellaa raawwachuun Pirezidaant Nikoolaas Maduuroofi haadha warraasaanii qabuun biyyaa baasuu beeksise.

    Miidiiyaan CBS qondaalota US waabeffachuun akka gabaasetti humni waraanaa US "Delta Force" jedhamuun beekamu oppireeshinii gaggeessen Pirezidaant Nikoolaas Maduuroo to'ate.

16. 3 Amajjii 2026Amma nu gahe, US Pirezidaantii Venezuweelaa haadha warraasaa waliin to'annaa jala oolchite - Tiraamp

    

    Madda suuraa, Reuters

    US haleellaa waraanaa cimaa gaggeessiteen pirezidaantii Venezuweelaa kan ta'an Nikoolaas Maduuroo to'annaa jala oolchuu Doonaald Tiraamp beeksise.

    "US haleellaa waraanaa cimaa Venezuweelaa irratti raaawwachuun Pirezidaant Maaduuroofi haadha warraasaa to'annaa jala oolchite" jechuun fuula miidiyaa hawaasaa irratti barreesse.

    Tiraamp ibsa miidiyaa hawaasaa irratti maxxanseen US Nikoolaas Maaduuroo haadha warraasaa waliin qabuun Venezuweelaa keessaa fuutee baaste.

    "Oppireeshiniin kun humnoota seera kabachiistota US waliin ta'uun kan raawwatameedha. Odeeffannoo bal'aan ni kennama," jechuun har'a yeroo muraasa booda ibsa bal'aa akka kennu Tiraam beeksise.

17. 3 Amajjii 2026Waraanni US erga waraana hololaatii as tarkaanfii guddaa ta'e akkamiin Venezuweelaarratti fudhachuu ga'e?

    

    Madda suuraa, Getty Images

    Tarkaanfiin humni waraanaa US magaalaa guddoo Venezuweelaa, Karakas irratti fudhate erga bara waraana hololaa as isa guddaadha jedhameera.

    US akkamiin sadarkaa kanarra geesse?

    • Jalqaba dooniiwwan Vennezuweelaa qoricha sammuu namaa hadoochu fe'aniiru jechuun galaana biyyattiirratti haleellaa eegalte
    • Haleellaan US kun hanga baha Kaaribaan, Paasifik fi iddoowwan garaagaraatti babal'ate- hanga ammaatti namoonni 110 ajjeefamaniiru
    • Humnoonni US hanga ammaatti taankariiwwan boba'aa qoqqobbii jala jiran lama to'ataniiru, tokko ammoo adamsaa jiru
    • Guyyaa ayyaana qillee Tiraamp waa'ee haleellaa lafoo isa jalqabaa akeekee ture
    • Sanarratti odeeffannoo bal'aan hin jiru, BBCn dhimma kanarratti ragaa argateen haleellaan jalqabaa bulchiinsa qabeenya boba'aan badhaate- Zuuliyaatti raawwatamuu hubateera

    Haleellaa kana hordofuun mootummaan Venezuweelaa US himachuun ibsoota jajjaboo baasaa jira.

    Deeggartoonni fi michoonni biyyattii yeroo murteessaa kanatti akka bira dhaabbatan gaafateera.

    Keessattuu michuuwwan isaanii sooshaalistoota ta'an akka birmataniif gaafataniiru Pirezidant Nikolaas Maaduroo.

    Amma kana ammoo Pirezidantichi to'annoosaa jala ooluu Tiraamp himaniiru.

    Garuu waa'ee qabamuu Pirezidant Maaduuroo ilaalchisee odeeffannoo bal'aan hin jiru.

18. 3 Amajjii 2026Iraan akeekkachiisa Tiraamp hiriira mormii biyyattii ilaalchisuun gidduu seenuf dabarse balaaleffatte

    

    Madda suuraa, EPA

    Iraan lammiilee biyyattii karaa nagaan hiriira mormii bahan itti dhukaasufi ajjeesuu hin dhaabdu taanan US gidduu seenuf akka dirqamtu akeekkachiisa dabarse Iraan fudhatama dhabsiiste.

    Ministeerri Dhimma Alaa Iraan akeekkachiisa Tiraamp kana dubbii "maal na dhibdeefi balaafamaadha" jechuun balaaleffate.

    Ministiirri Dhimma Alaa Iraan Abbaas Araagchii sodaachisa Tiraampif deebii kennaniin, "Humni Waraanaa Iraan qophiidha, haleellaan yoo baname maalirratti akka qiyyeeffatee deebii kennu sirriitti beeka" jedhan.

    Tiraamp fuula midiyaa hawaasaa irratti ergaa akeekkachiisaa Iraaniif dabarseen, Iraan namoota nagaa hiriira mormii bahan ni ajjeesti taanan US isaan baraaruf gidduu seenti jechuun "hidhannee deemuuf qophoofnerra!" jedhe.

    Mormii jabaa Iraan keessatti itti fufee jiruun hanga ammaa yoo xiqqaate namoonni saddeet ajjeefamuun ibsame.

    Pirezidaantiin US Doonaald Tiraamp mormii Iraanitti gaggeeffamuun namoota hiriira nagaa bahan baraaruud gidduu seenuuf akeekkachiisus bifa maaliin gidduu akka seenu garuu hin ibsine.

    Ganna darbe waraana guyyaa 12 Israa'eliifi Iraan gidduutti gaggeeffameen, bulchiinsi Tiraamp Israa'el irra goruun buufataalee gabbisa nikularaa Iraan haleeluun ni yaadatama.

19. 3 Amajjii 2026Venezuweellaan haleellaa US ilaalchisuun labsii yeroo muddamaa labsite

    

    Pirezidantiin Venezuweelaa haleellaa US biyyasaaniirratti raawwatte erga balaaleffatanii booda labsii yeroo muddamaa labsaniiru.

    US albuudotaa fi boba'aa Venezuweelaa saamuuf haleellaa eegalte jechuunis ibsaniiru.

    Ibsi Pirezidant Maaduuroo ''US biyya walaba taate cabsite humnaan seenuun qabeenya uumamaa akkaan barbaadamoo ta'an, albuudotaa fi boba'aa saamuuf'' haleellaan Karakas irratti raawwatte fudhatama kan hin qabnedha jedha.

    Pirezidantichi haleellaa US kana akka weeraraa fi jeequmsa qaama alaan raawwatameetti labsaniiru.

    Gocha kana dura dhaabbachuuf labsii ba'errattis mallatteessaniiru.

    Yeroo fi haala barbaachisu keessatti tarkaanfii fudhachuufis humna biyyattii qopheessaniiru.

20. 3 Amajjii 2026US haleellaa narratti raawwatte jechuun Venezuweelaan himatte

    

    Madda suuraa, Reuters

    Veneezuweelaa US haleellaa waraanaa irratti raawwachuu balaaleffachuun himatte.

    Mootummaan Venezuweelaa ibsa baaseen, US seera idiladdunyaa cabsuun haleellaa waraanaa daangaa biyyattii sarbe gaggeessuu beeksise.

    "Venezuweelaan haleellaa waraanaa cimaa US daangaa isheeraatti gaggeessite seera idila addunyaa duratti ni balaaleffatti, hin fudhattus," jechuuni mootummaan Nikoolaas Maaduroo kan ibsa baase.

    Buufataalee waraanaa Venezuweelaa irratti tarkaanfiin waraanaa akka fudhatamu US ajaja kennuu miidiyaan CBS News qondaalota olaanoo waabeffachuun gabaase.