Hogganaan garee loltoota Waagnar kan Puutin irratti fincilan fashale gaggeesse, Piriigozhin, namoota xiyaara Raashiyaa kufee gubate keessaa tokko ture.
Hordoftoota keenya tamsaasa kallattii kan du'a hoogganaa mindeeffamtoota Garee Waaganar irratti xiyyaafachuun guyyoota lamaan darbaniif isin biraan gahaa turre hordufaa turu keessaniif isin galateeffanna.
Amma tamsaasa keenya as irratti golabneerra.
Tamsaas biraatiin hanga walitti deebiinuutti nagaan nuuf turaa.
Madda suuraa, EPA
Raashiyaan hooggannaan Garee mindeeffamtoota Waagnar akka ajjeeffamuuf ajaja kennitee jirti jedhamu haalte.
Dubbii HImaan Puuriin Dimitii Peeskoov BBCtti akka himaniitti, Raashiyaan Piriigozhiin akka ajjeeffamuuf ajaja kennite jirti jedhamuu ‘‘gonkumaa sobadha’’ jedhan.
Dubbii himaan kunis waa’ee balaa xiyyaaricha irra qaqabeen wal qabatee akkasumas waa’ee ‘‘du’a gaddisiisaa’’ namoota xiyyaaricha keessa turanii ‘‘waan hedduun jedhamaa jira’‘ jedhan.
‘‘Biyya Lixaatti ni ta’a jedhamee kan dubbatamu kallattii muraasa irraayi. Hundu gonkumaa soba. Waa’ee balaa kanaa yoo dubbanni odeeffannoofi dhugaa qofaan hogganamu qabna,’’ jedhan.
Itti dabalunis ‘‘ammaan tana odeeffannoo hedduun hin jiru. Ammattis qorannoo ifaan kan eegalame yoo ta’u, ragaaleen jiranis sakkata’amu qabaatu,’’ jedhan.
Lammiileen Raashiyaa hedduun balaa xiyyaara guyyaa Roobii lubbuu namoota 10 balleessee jedhame duuba Kiremiliin akka jirtu shakku.
Lammiilee Raashiyaatiin alattis biyyoon lixaas ajjeechaa raawwatame duuba harki aanga’oota Raashiyaa akka jiru eeru. Raashiyaan garuu kun gonkumaa ‘‘sobadha’’ jechuun haalti.
Kaleessa pirezidantiin Raashiyaa Puutiin maatiiwwan balaa xiyyaara sanaatiin firri jalaa du’aniif gadda saanii ibsanaiiru.
Pirezidanti Puutiin Hogganaa Garee Waagnar Pirigozhiin kanneen ajjeeffaman keessatti akka argaman mirkaneessaniiru.
Madda suuraa, Getty Images
Yunaayitid Kingidam (UK)n duuti hogganaa garee Waagnar Yevgenii Piriigozhin dhugaa ta’u hin ollee jette.
Ministirri Raayyaa Ittisa UK, hanga ammaatti hogganaan Waaganar dhuguma xiyyaara kufee caccabee keessa jiraachusaa mirkaneeffachuu baatanilleen, duuti isaa sirrii ta’uu hin ollee jedheera.
Xiyyaara Yevgenii Piriigozhin keessa ture jedhameefi Mooskoo irraa gara Seenti Piitarsibargiitti balali’aa ture erga kufee caccabeen booda hogganaan garee Waagnar du’uunsaa bai’inaan gabaafameera.
Haata’u malee, hanga ammaatti qaama kamiinuu Yevgenii Piriigozhiin du’uusaa ilaalchiisee mirkanneeffamuu baatulleen, tarree namoota balaan xiyyaaraa qaqabee keessa turan keessatti garuu maqaan isaa akka jiruufi imaltoonni xiyyaaricha keessa turan kurnan isaanii marti du’uun Raashiyaan beeksiifte jirti.
Madda suuraa, Reuters
Peentaagon akka jedheetti haala fayyadama jeettiiwwan waraanaa F-16 irratti lammiilee Yukireeniif leenjiin Afaan Ingliizii Fulbaana dhufaa Teeksaas keessatti kennamuu eegala.
Baatii itti aanu keessa ammoo leenjiin balaliisuu Ariizoonaa keessatti kennamu akka eegalu eegama.
Dubbi-himaan Peentaagon Birgaadar Janraal Paat Raayidar, ammatti balaliiftonni Yukireen meeqa akka leenjiicha keessatti hirmaatan Peentaagon hin beeku jedhan.
Haata’u malee, balaliiftoonniifi hojjattoonni suphaa hedduun akka hirmaachuu danda’an himaniiru.
Yaadni qondaala kanaatis wayita garee michoota Lixaa lammiilee Yukireen leenjiisuu eegaluuf akka jiran baatii darbe keessa yeroo himanitti kana dubbatan.
Qondaalli olaanaan waraanaa kun leenjiin Ameerikaa kunis kan leenjisana ‘cimsuudha’ jechuun, Ameerikaanis waa’ee ulaagaalee balaliiftoota F-16 irratti michoota ishee warra Awurooppaa waliin walitti dhiheenyaa mari’atti jedhan.
Murteen Ameerikaan jalqaba bara kanaatti Yukireeniif jeettii waraanaa F-16 kennuu irratti taasifte jijjiramuuf jira fakkaata.
Kunis Ameerikaafi michoonni ishee kanneen duraan murticha morman, kun tarii gara mudama waranaa nikulaara Raashiyaatti geessuu mala jechuun sodaataa turan.
Madda suuraa, Getty Images
Ameerikaan xiinxalli xiyyaarri Piriigozhin keessa ture misaa’eliin lafarraa itti dhukaafameen rukkutamee kufe jedhu waan deemsisu miti jette.
Waajjirri humna ittisaa Ameerikaa, Pentaagon, taatee kana ilaalchisee ibsa kenneen xiyyaarichi tarii kan caccabe boombii itti hidhamee ture dhohuu hordofeeti jedheera.
Xiyyaarri hoganaan garee Waagnar Yevgeenii Piriigozhin keessa turte jedhame caccabdee lubbuun isa darbuun hin oolu jedhamuu hordofee, namoonni hedduun xiyyaarichi kufee akka caccabuuf sababa ta’an waan jedhan ibsaa turaniiru.
Fuulli Telegiraamii garee Waagnar waliin hidhata qabu xiyyaarichi ‘gantoota’ Mooskoo jiraniin misaa’ela lafarraa itti dhukaafameen rukkutamee kufe jedhe.
Haata’u malee, dubbi-himaan humna ittisaa Ameerikaa Birgaader Janaraal Paatiriik Raayidar xiyyaarichi caccabuu hordofee Yevgeenii Piriigozhin carraan du’uu isaa olaanaa ta’uu isaa dubbatanii, xiyyaarichi garuu misaa’elaan rukkutamee kufeera kan jedhu carraan dhugaa ta’uu isaa dhiphaadha jedhan.
Xiyyaarri imaltootaa Emibaariiyeer jedhamu kun misaa’elaan rukkutamee kufuu isaatiif ragaan mirkaneessu tokkollee akka hin jirre dubbatan dubbi-himaan kun.
Aaanga’aan olaanaa ameerikaa maqaan isaanii hin eeramne tokko haaluma walfakkaatuun CBS'tti yeroo dubbatanitti, xiyyaarichi kufaa kan caccabe misaa’elaan rukkutamee osoo hin taane tarii boombiin xiyyaaricharra ture erga dhohee balaan qaqqabeen booda jedhan.
Dhohinsa xiyyaaricharratti mul’ateef hanga ammaatti sababiin sirriin maal akka ta’uu danda’u ifa ta’uu baatus carraan boombii ta’uu isaa bal’aa ta’uu ibsan aanga’aan Ameerikaa kun.
Madda suuraa, EPA-EFE/REX/Shutterstock
Qondaalli Peentaagon Birgaadar Janaraal Paatriik Rayidar, kanaan booda gareen Waagnar waraana Yukireen keessatti akka hin hirmaane himan.
Qondaalli waraanaan kun kana kan jedhan wayita gareen Waagnar gara fuulduraatti maaltu mudachuu mala jedhamuun gaafatamanitti ture.
Akkasumas, oduun du’a Piriigozhiin dhiibbaa inni waraanaa Yukireen irratti qabaachuu malurratti gaafatamanii ture.
Birgaadar Janraal Raayidar kana booda dirree waraana Yukireen keessatti hin argamu jedhan. Kanaafis sababii yoo eeran, fincila garichaa baatii Waxabajjii keessa hoggansa waraana Raashiyaa irratti gaggeesseen walitti fidu.
Loltoonni gare mindeeffamtootaa ‘‘dirree waraanaarratti humnoota baayyee milkaa’oo’’ Raashiyaa akka ta’an ibsuudhaan, garuu ammoo olaantummaan isaanii gadi bu’ee jira jedhan.
Itti dabalunis, miseensoonni Waagnar hedduun ammatti Belaarus keessa jiraachuu kan kaasan qondaalli olaanaan waraanaa kun, isaanis loltoota Belaarus leenjiisaa jiraachuu kaasan.
Waliigalteen Belaalus waliinii kunis erga fincilli gareen Waaganar baatii lamaan dura gaggeesse fashalaa’een booda haaldureewwan ijoo keessa tokko ture.
Madda suuraa, EPA
Erga jeettiin dhuunfaa dhiheenya Mooskootti kufee caccabee guyyaa tokkoon ol ta’eera. Balaa kanaanis hogganaa Garee Waagnar Yevheny Piriigozhin dabalatee namoonni kudhan du’uutu gabaafame.
Odeeffannoon ammalleen dhufaa jira garuu ammoo wantoonni ijoon hanga ammaatti beeknu jiru.
1. Piriigozhiin tarii ‘ajjeeffameera’ ta’a
Qondaaltoota US dabalee hogganaan Waagnar xiyyaara balaan irra gahe keessa ‘jiraachuu’ danda’a jedhan. Garuu ammoo odeeffannoon sirrii waan kana ifatti mirkaneessuu hin jiru. Jechi Pirezidantii Raashiyaa Vilaadmiir Puutin kanuma mul’isa. Piriigozhiin tarree imaltoota xiyyaarichaa keessa akka ture qondaaltoonni humna qilleensaa Raashiyaa battaluma balaan qaqqabeetti gadhiisanii ture.
2. Balaa xiyyaarri kufee caccabuu sana dhohinsatu uumee ta’e
Xiyyaaricha maaltu kufise dhimma jedhaurratti yaadiwwan hedduun ka’aa jiru. Misaa’eela qilleensa samiirratti haleeluu danda’a (surface-to-air missile) jedhamuun rukutameera ta’a jedhameera. Haata’u malee, Peentaagon (Humna Ittisaa Ameerikaa) misaa’eelli akkasii faayyidaarra oolfamuuf wanti mul’ate hin jiru jedhe.
Qondaaltoonni Ameerikaa BBCtti akka himaniitti, dhohinsii xiyyaara keessaa tarii sababii qabatamaa ta’uu danda’a. Inni tarii boombiitu harkaa dhohee ta’uu danda’a.
3. Taphni himannaa ammas itti fufeera
Qubni baayyeen gara hoggntoota Raashiyaatti kan qabamaa jiru. Haata’u malee, eenyumtuu gahee keessaa qabaachuuf ragaan omtuu hin argamne. Puutin dhimmicharratti erga callisaa tureen boda ‘‘balaa gaddisiisaa’’ jechuun qorannoon gaggeeffamaa jiraachuu irra deebiin hime.
Isaan dura ammoo pirezidantiin Yukireen Volodmiir Zelensikiin biyyisaa balaa xiyyaarichaa waliin hidhata omaatu hin qabdu jedhee ture.
4. Haala balaa xiyyaarichaa
Xiyyaarri Embraer-135 (EBM-135BJ) jedhamtu guyyaa Roobii Mooskoo irraa gara St Piitarsibargiitti balalii’aa turte. Xiyyaaricha keessas imaltoota torbaafi hojjattoota xiyyaaraa saditu ture, akka Abaan Taayitaa Aviyeeshinii Raashiyaa jedheetti. Xiyyaarichi dhiheenya Kuzhenkinoo wallakkeessa Mooskoo fi St Piitarsibarg jidduutti kufe. Namoonni xiyyaaricha keessa turan 10nu du’un himameera.
Madda suuraa, Getty Images
Balaa xiyyaaraa lixa Raashiyaatti mudateen ajjeefamuu hogganaa garee Waagnar, akkasumas Yukireen haleellaawwan diroonii hedduu Kireemiyaa keessatti banuu dabalatee oduu gama sana jiran kallattiin isini biraan gahuu eegalleerra.
Nu hordofaa!
Du'a hogganaa Garee Waaginar irratti ergaa dabarsaniin Pireezidantiin Raashiyaa Vilaadmiir Putiin ''daldalaa jabaa'' jechuun leellisan.
Waajira Waaginar fuuldurattii hojjettoonni mootummaa Raashiyaa kaan ergaa gaddaa isaanii dabarsaa jiru.
Loltoonni Waaginaris iddoo garaagaraa ergaa gaddaa hogganaa isaaniif dabarsaa jiru.
Tamaasaasa Kallattii dhimma ajjeechaa hogganaa Garee Waaginar irratti isin biraan gahaa turree goolabne.
Nagaatti bulaa!
Madda suuraa, EPACopyright
Puutiin nama yeroo tokko 'cheefii' (nyaata isaaf bilcheessaa) tureef ergaa gaddaa ibsan. Waliigaltee bu'aa qabeessa taheen mootummaa Raashiyaaf nyaata dhiyeessaa ture.
''Piriigoozhiniin yeroo dheeraadhaafan isa beeka, jalqaba bara 1990 irraatii,'' jedhan Puutiin ibsa karaa Tv'n kennaniin.
Fincila Gareen Waagnar baatii Waxabajjiitti taasiseen wal-qabsiisuun:
''Namni kuni nama carraa jireenyaa wal-xaxaa tahe qabu ture. Jireenyasaa keessatti dogoggora baayyee hojjeteera. Ofiisaafis tahe yeroon isa gaafadhetti immoo dhimma waloo keenyaaf fiixaan bahumsaa barbaachisaa argamsiiseera.
Shoora Waagnar Yukireen keessatti qabu hin dagannu jedhan Puutiin.
Xiyyaara Piriigoozhiin ajjeeffame keessa namni harka mirgaasaa jedhamu Dimtrii Utkiin fi miseensonni Waaganar shan akkasumas hojjettoonni xiyyaaraa sadii turan.
Hojjettoonni Waaginar xiyyaaricha keessa akka turan isa himamaa tures Puutiin mirkaneessaniiru.
''Namoonni ajjeefaman kunneen lola nuti Naazii-haaraa mootummaa Yukireen irratti taasisnuuf qooda murteessaa qabani dha,'' jedhan.
''Kana ni yaadanna, ni beeknas, tasuma hin irraanfannu''
Pireezidantiin Raashiyaa Vilaadmiir Puutiin balaa xiyyaaraa kaleessaan booda yeroo jalqabaaf dubbatan.
Maatii namoota balaa kanaan du'aniif ergaa gaddaa dabarsaniiru. Hogganaan Garee Waaginar Yivgeenii Piriigoozhiin nama dandeettii daldalaa qabutti ibsan.
Ergaa karaa TV'n dabarsaniin waan dhalaterratti qorannoon ni taasifamaa jedhan-garuu kun waan yeroo fudhatu dhas jedhaniiru.
Waa'ee balaa xiyyaaraa Roobii galgala Kamisa ganaman dhagee jedhan Puutiin.
Puutiin,''akkan ani beekutti,'' Piriigoozhin ''Roobii kaleessaa ture Afrikaa irraa kan inni deebi'e. Achitti qaondaalota argatee ture,'' jedhan.
Madda suuraa, Rooyitarsi
Yuukireen guyyaa walabummaa ishee yeroo kabajataa jirtutti bulchiinsa Kireemiyaa Raashiyaadhaan qabamtee turte keessatti oppireeshinii gaggeessuun injifannoo argachuu himte.
Dubbii himaan Ministeera Ittisaa Yuukireen Andirii Yuusoov akka jedhanitti, loltoota isaaniirra miidhaan qaamaa hin geneye.
Raashiyaan bara 2014 seeraan ala Kireemiyaa ofitti dabalte. Dubbii himichi Raashiyaan waraana gaggeeffame irratti loltoota hedduu dhabde. Raashiyaan garuu kana irratti deebii hin laatne.
Kun yeroo hogganaan Waagner, miindeffamuun Raashiyaaf lolaa ture balaa xiyyaaraan ajjeefamanitti dhagahame.
Piriigoozhiin ''diina baayyee'' qaba, kutaa addunyaa garaagaraatti duutisaa namoota baayyeef mallattoo haara-galfii dha,'' jedhan gorsaan imaammataa duraanii Raashiyaa Andiree Koortunoov.
Namoonni baayyeen Piriigozhiniin akka yaaddoo nageenyaatti ilaalu.
Ajjeechaa nama kanaa Raashiyaan ajajjeetti yoo taheef jechuun gaafatamnaan, ''Puutiin akka isa hin adamsine ifatti dubbateera, warreen Puutiin deeggaran ammoo waadaa isaa akka hin cabsinetti amanu,'' jedhan.
Piriigoozhin lubbuun jiraachuu danda'u jedhanii akka yaadanis gaafatamaniiru, Koortuunvoon, ''waan tahe irratti odeeffannoo himamu kan gatnu hin jiru, tahus ''jettee jettee amanuuf garuu shakkii akka qaban himan.
Dhimma kanarratti waan dimshaashaa himuuf odeeffannoo gahaa hin qabnu jedhan.
Nagaafi tasgabbiin jiraachuu mootummaa Puutiin irrattis, Koortunoov, ''kana irratti waan himuun rakkisaa dha.
Garuu sirni isaanii ammallee nagaa akka qabun yaada,diinagdeenis akka ogeessonni jedhanitti rakkoo hammaataa keessa waan jiru miti, mormitoonnis hangas mara jaboo miti, '' jedhan
Madda suuraa, Reuters
Madda suuraa, Getty Images
Yeevgeen Piriigoozhin waraana Waagner ijaaruuf waggoota kurnan isaanitti fudhate.
Waraana Raashiyaan Yuukiren irratti bante keessatti shoora olaanaa qabu ture.
Dabalataan dhiibbaa Raashiyaan qabdu addunyaa gutuu irratti akka babal’atus gargaareera.
Afrikaa fi Sooriyaa keessa Puutin michoota akka argatan gargaaraniiru. Amma duuti isaanii fuuldureen waraanichaa maal taha gaaffii jedhu kaasaa jira.
Qondaalonni nageenyaa biyyoota Lixaa humna kana eenyu hoggana kan jedhu baruuf hawwiin eegaa jiru.
Rooyitars miseensa waraanaa Waagner waajjira isaanii St Piitersbargi ala jiran keessaa tokko dubbiseera.
‘’Jecha akkamiin akkan ibsu hin beeku,’’ jedhe loltuun kun.
‘’Ajajoota keenya dhabne, ajajoota waraanaa keenya lama dhabne,’’ jedhe. Ajajaa olaanaa Waagner, Piriigoozhinii fi itti aanaa isaanii fi harka mirgaa Piriigoozhin nama jedhaman Dimitirii Uutkiin jechuu isaati.
Hoggantootni lameen balaa xiyyaaraa mudateen lubbuu dhaban.
‘’Ajajoota biro akkaataa seera keenyaatti hojjetan qabna, akkaataa ittiin bulmaata Waagneriin kana caalaa hojjenna,’’ jedhe.
‘’Waanti tahe taheera, amma wal qabannee dhaabbachuu qabna,’’ jedhe.
Madda suuraa, Getty Images
Du'a hoogganaan garee Waagnar Vegenii Piriigozhiin keessatti Yukireen gahee omaatuu akka hin qabne pirezidantiin Volodmiir Zelenskiin dubbatan.
''Haala kana keessatti dhugaatti hirmaannaa omaatu hin qabnu. Taatee kana keessatti harki eenyuu akka jiru ammoo namni hundi ni beeka jedheen yaada,'' jedhan pirezidantiin Yukireen wayita magaalaa mummee biyyasaaniitti gaazexessitootaaf ibsa kennaniitti.
Weerara Raashiyaan Yukireen irratti raawwattee keessatti hoogganaan Garee Waagnar, Piriigozgiin, waraana Raashiyaa maddii hiriiruun lolaa turan.
Waraana magaala waraana Baakmut jedhamtu keessatti gaggeeffameen olaantummaa Raashiyaan argattee keessatti gahee olaanaa bahuusaaniitu himama.
Madda suuraa, Rooyitarsi
Duuti Piriigoozhiin- yoo dhugaa tahe, hooggansa Vilaadmir Puutin jalatti waan kufuuf inumaayyuu human yaaddessaa taha jedhan Ministirri muummee Poolaandi Maayisiz Moraawiikii.
''Waagner hooggansa Puutin jala gala. Mee namni hunduu gaaffii kana ofiif haa deebisu. Yaaddoon Waagnar ni xiqqatamoo ni guddata jettu?
''Akkakootti kun gaaffii akkasumaan gaafatamudha,’’ jedhan.
Ji’a Waxabajjii keessa humni Waagnar gara Beelaarusitti galuu irraa kan Poolaandi daangaa Beelaarus waliin qabdu irratti eegumsa cimsiteetti.
Madda suuraa, Reuters
Maddi balaa xiyyaarichaa waan fedhee ta’eyyuu, namootni akka “ haaloofi ijaa ba’uu” ilaalu jechuun xinxaltuun siyaasaa Raashiyaa Taatiyaanaa Istanovayaa dubbateetti.
“Kireemlin ammoo ilaalcha kana falleessuuf homaa waan hojjetu miti,” jetti Dabaluunis, balaa kana keessaa Puutin harka qaba jedhanii amanuuf sababni gaarii jira jetti.
“Humna qabeessa, gammadaafi nama yaadaan guute kan ta’e Piriigozhin, bulchiinsa Raashiyaaf rakkoo akka ture shakkiin hin jiru, qaanii siiyaasaa Puutin mul’isa ture,” jetti Istanovayaa
“Du’i Piriigozhin namoota isa waliin hanga dhumaatti turan ykn kan ifatti isa deeggaraniif dorsisa kallattiidha. Kun mormiitota kakaasuu caalaa waan isaan dorsisaan sodaachisudha.”
Kireemlin hanga ammaatti wa’ee balaa xiyyaarichaahomaa hin dubbanne.
Loltoonni Waagnar fi deeggartoonni isaanii Raashiyaa keessatti bakka yaadannoo uumuun du’a Yivgeenii Piriigozhin irratti gadda itti dhaga’ame ibsachaa jiru.
Waajjira Waagnar St Piitarsibargiifi Novosibiriskii jiru fuulduratti suuraa hogganaa garichaa cinaatti ababoon ka’amee, dungoon qabsiifameera.
Madda suuraa, Getty Images
Madda suuraa, Reuters
Madda suuraa, Getty Images
Madda suuraa, Getty Images
