Ar y teledu a'r radio
Mae ein rhaglenni teledu lleol ar gael ar BBC ONE Wales & BBC Wales HD, BBC TWO Wales, BBC iPlayer ac S4C. Rydym hefyd yn cynnig dwy orsaf radio genedlaethol, BBC Radio Cymru yn Gymraeg a BBC Radio Wales yn Saesneg.
Mae ein portffolio o raglenni radio i'r rhwydwaith yn cynnwys ffefrynnau megis The Choir a Composer of the Week i Radio 3, ac amryw gynhyrchiad drama i Radio 4.
Ar gyfer teledu, gyda chwmnïau annibynnol yng Nghymru rydym yn cynhyrchu rhaglenni i sianeli digidol y BBC sef BBC Three, Four a CBBC, ac mae ein cynyrchiadau teledu rhwydwaith, gan gynnwys Doctor Who a Casualty, yn denu miliynau o wylwyr drwy'r byd i gyd.
S4C
Mae gennym berthynas unigryw gyda S4C ac rydym yn cyfrannu tua 540 awr o raglenni BBC Cymru Wales at amserlen gyfan S4C bob blwyddyn, wedi ei hariannu gan y drwydded deledu. Adnewyddodd y BBC ac S4C Gytundeb Partneriaeth Strategol fis Tachwedd 2012 a thrwy hyn y mae rhaglenni'r BBC i S4C yn cael eu cytuno.
Mae Ymddiriedolaeth y BBC hefyd yn sefydlu cylch gwaith ar gyfer cynnyrch teledu iaith Gymraeg y BBC. Mae'r ddwy broses yma yn sicrhau bod rhaglenni'r BBC ar S4C yn cyfrannu'n uniongyrchol i strategaeth rhaglenni S4C gan ddarparu'r dibenion cyhoeddus sydd eu hangen gan y BBC yn ei Siarter a'i Gytundeb.
Ar-lein
Mae gwasanaethau ar-lein BBC Cymru yn cyrraedd dros dair miliwn o ddefnyddwyr unigryw bob wythnos, gyda chynnwys yn cael ei weld ar gyfrifiaduron, setiau teledu â chyswllt â’r we, ffonau symudol a dyfeisiau tabled.
Ar gyfer fersiiynau Cymru a Wales o BBC Online, mae’r gwasanaeth yn darparu cynnwys Newyddion a Chwaraeon, iPlayer, yr Hafan, Bitesize, Tywydd, Teithio, Radio a Cherddoriaeth, CBBC a CBeebies.
Mae cyfryngau cymdeithasol ar lwyfannau megis Twitter a Facebook yn dod yn fwyfwy pwysig, gyda chynnydd enfawr yn y defnydd ohonyn nhw dros y flwyddyn ddiwethaf.
Mae Cymru Fyw hefyd yn darparu golwg unigryw ar Gymru yn Gymraeg.
Ynghyd â chynnwys lleol, mae BBC Cymru hefyd yn cynhyrchu cynnwys digidol ar gyfer cynyrchiadau rhwydwaith, o Doctor Who a Sherlock i Crimewatch a Wizards vs Aliens.
Cerddorfa a Chorws Cenedlaethol Cymreig y BBC
Ers 90 mlynedd a mwy, mae Cerddorfa a Chorws Cenedlaethol Cymreig y BBC (BBC NOW) wedi bod yn rhan ganolog o fyd cerddoriaeth yng Nghymru. Dyma’r unig gerddorfa symffoni broffesiynol yng Nghymru, ac mae’n perfformio cyngherddau a darllediadau byw gydag arweinyddion ac unawdwyr blaenllaw, gan gynnwys y Prif Arweinydd Ryan Bancroft. Mae BBC NOW yn falch o ddathlu diwylliant Cymru ac mae’n rhoi llwyfan i gerddoriaeth a thalentau lleol, sy’n aml yn perfformio yn Gymraeg. Mae hefyd yn mynd â cherddoriaeth i ysgolion, i ysbytai ac i gymunedau o Fôn i Fynwy, gan ysbrydoli cerddorion y dyfodol drwy weithdai a gwaith yn y gymuned. Mae’r gerddorfa’n ymddangos yn rheolaidd ym Mhroms y BBC ac yng nghystadleuaeth BBC Canwr y Byd Caerdydd, ac fe gaiff ei pherfformiadau eu darlledu ar BBC Radio 3, Radio Wales a Radio Cymru. Yn ogystal â chynnal cyngherddau a digwyddiadau, mae BBC NOW hefyd yn recordio cerddoriaeth ar gyfer rhaglenni teledu poblogaidd fel Doctor Who, Planet Earth III, Prehistoric Planet, The Pact a Plant mewn Angen. Yn ei chartref, sef Neuadd Hoddinott y BBC ym Mae Caerdydd, mae BBC NOW yn defnyddio stiwdio recordio o’r radd flaenaf sydd â chamerâu ar gyfer ffrydio’n fyw a darlledu ar y teledu er mwyn mynd â cherddoriaeth BBC NOW i gynulleidfa ehangach ym mhob cwr o Gymru a’r byd! Mae rhagor o wybodaeth ar gael yn www.bbc.co.uk/bbcnow.
