Дунё мудом ҳаракатда. Унда кечаётган ҳар қандай ўзгариш, ҳар қандай янгиланишларнинг инсоният тақдирида, инсонлар тақдирида изсиз кечмаслиги аниқ. Бугун дунёнинг қайсидир бир бурчагида кимдир қуролли низолар, яна қай бир қиррасида табиий офатлар, бошқа бир бурчида эса, ижтимоий-иқтисодий беқарорликлар гирдобида. Кимлардир иқтисодий фаровонликдан баҳраманд бўлса, яна бирлари қашшоқлик азобидан азиятда...Дунёнинг қай бир қисмида бўлманг, сизнинг ҳаётингиз қандай кечмоқда? BBCUzbek.com нинг янги лойиҳаси қаҳрамонлари бугунги кун ҳаётини яшаётган ана шундай инсонлардир.

Мумбай ўнлаб инсонларнинг умрларига зомин бўлган қатор ҳужумлар ортидан ўзига келишга ҳаракат қилмоқда. Қуйида биз мазкур зўравонликларни ўз бошидан кечирган инсонларнинг ҳикояларини эътиборингизга ҳавола этиш ниятидамиз:

Мумбай шаҳрига ҳордиқ чиқариш учун борган Ҳарниш Пател "Леопольд" қаҳвахонасида қуролли шахслар томонидан очилган ўт оқибатида икки оёғи ва кўкрагидан яраланган. Ҳозир шифохонада даволанаётган жаноб Патель отишма бошланган чоғда нималар юз берганини мана бундай тасвирлайди:

"Қуроллилар дуч келган тарафга қараб, мунтазам ва узоқ ўт очишди. Бироздан сўнг отишма бутунлай тинди.

Бир нечта киши бўлди, ҳаммаси тугаган бўлса керак, деган хаёлда ўринларидан турмоқчи бўлишди.

Бироқ қуроллилар ҳануз бинони тарк этишмаган экан, яна ўт очишни бошлашди. Одамлар дуч келган нарсанинг орқасига яшириниб, ўзларини ҳимоя қилмоқчи бўлишди.

Қуроллилардан бири барнинг бир бурчагига қараб юрди. Сўнгра мени ва бар орқасида яшириниб олган яна бир нечта кишини кўриб, бизларга қарата ўқ узишни бошлади.

Ҳатто менга ўқ келиб текканини кўриб ҳам, у ўт очишни тўхтатгани йўқ. Мен барнинг бошқа томонида бўлганим учун менга кўзгу ва бошқа ҳамма нарса яққол кўриниб турарди.

Мен қилт этмасликка ҳаракат қилдим. Мен ўзимнинг яраланганлигимни билсам-да, бунинг қанчалик жиддий эканини ўша пайтда фаҳмлай олмасдим. Фақат қимирламасликка интилардим.

Ва ниҳоят қуролли шахс қаҳвахонадан чиқиб кетди. Отишмадан омон қолган ёнимдаги йигит қон оқиб ётган оёғимга сочиқ боғлаб, қонни тўхтатишга ҳаракат қилди..."

Босқин маҳалида худди шу қаҳвахонада бўлган ва ҳозир Лондонга қайтган бошқа бир саёҳатчи Жой Жетун ўз кўрган-кечирганларини мана бундай ҳикоя қилади:

"Австралиялик, америкалик ва британияликларнинг ҳаммаси бир жойга тўпланиб олишганди.

Ҳиндистонлик официант йигит жойимиздан қимирламаслигимизни айтди. Ҳамма ёқини ғала-ғовур тутиб кетган ва биз қуролли шахсларнинг яна қайтиб келиш-келмасликларини билмасдик.

Ҳаммамиз яшириниб олган, жуда-жуда қўрқиб кетгандик. Биз нималар юз бераётганидан бехабар эдик.

Официант жуда яхши йигит экан, у мени ерга ётишга ундаб, бир маънода ҳаётимни асраб қолди. Ундан беҳад миннатдорман.

Ҳамма ёқда қон. Ўзим ҳам қонга беланиб кетган бўлсам-да, лекин бошимда битта ғурра билан қутулибман, холос.

Мени ерга ётишга ундаган официант йигит атрофга юриб, ярадорларнинг яраларини боғлай бошлади.

У менга ҳушсиз ётган бир йигитни ҳушига келтиришим лозимлигини айтди. Мен официант йигит айтгандек иш тутишга ҳаракат қилдим.

Бироқ бир вақтнинг ўзида жуда ҳам қурқинчли вазият эди, биз уларнинг ҳануз шу ерда ёки йўқликларини билмасдик..."

Мумбайга ишлаш учун борган Стив Винсент душанба кун тунда қуролли шахслар бостириб кирган маҳалларида "Тожмаҳал" меҳмонхонасида бўлган. У ўз кўрган-кечирганларини мана бундай тасвирлайди:

"Соат кечки 9:45 лар атрофида эди. Отишма ва портлаш садолари қулоғимга чалинган маҳал мен хонамда эдим.

Ҳамма ёқда тало-тўп, кўчалар ола-ғовурга тўлиб кетган, одамлар дуч келган ёққа қараб югуришарди. Жуда-жуда қўрқинчли эди. Гўё қирғинбарот кечаётгандек эди.

Мен хонамда қамалиб олиб, эшикни қулфлаб олдим. Ҳамма чироқларни ўчириб, овоз чиқармасликка ҳаракат қилдим.

Бу мен ўз бошимдан кечирган энг қўрқинчли ҳодиса эди. Жуда ҳам даҳшатли эди. Бунинг барчаси якун топганидан ниҳоятда мамнунман."

Давоми бор.

Глобал молиявий инқироз сизнинг ҳаётингизда қандай кечмоқда? - қозоғистонлик Бейсигул ҳикояси билан танишиш учун бу ерга босинг.