Оврўпо Иттифоқи ўтказмоқчи бўлган анжуман санаси ҳали маълум эмас

Оврўпо Иттифоқи душанба куни Тошкентда бошланган матбуот эркинлигига доир анжуманга алоқаси йўқлигини айтди.

Би-би-си билан суҳбатда Иттифоқнинг Ташқи алоқалар бўйича мулозими Кристиан Хоман Тошкентда ўтаётган матбуот йиғинининг ўзлари режалаган матбуот форумига "мутлақо алоқаси йўқ"лигини таъкидлади.

Унинг сўзларига кўра, Оврўпо Иттифоқи иштирокида режаланган анжуман бошқа ва унинг санаси ҳали маълум эмас.

"Ўзбек томони бу анжуманнинг ўтказилишига рози ва биз ҳозирда муддатлар устида ишлаяпмиз", -деб айтди Хоман хоним Би-би-си билан суҳбатда.

Халқаро ташкилотлар: 'Тошкентдаги матбуот анжумани-майнавозчилик'

'Бир кечада ўзгармайди'

Айни пайтда Тошкентдаги йиғинда иштирок этаётган Оврўпода Хавфсизлик ва Ҳамкорлик ташкилотининг матбуот бўйича вакили Миклош Харашти ўзбек томони билан матбуот форуми ўтказиш ғоясини ҳимоя қилган.

"Оврўпода Хавфсизлик ва Ҳамкорлик ташкилоти бир кечада ўзгаришларни талаб қилаётгани йўқ. Ислоҳотлар ҳали олдинда... ва биз Ўзбекистон қисқа муддатда уларни амалга оширади, деб умид қиламиз", - деб айтган жаноб Харашти Тошкентдаги анжуманда қилган чиқишида.

Анжуман иштирокчиларидан бирининг айтишича, нотиқларнинг кўпчилиги "эркин матбуотнинг масъулияти"га урғу қаратишган.

Иштирокчилар орасида Америка, Британия ва жанубий кореялик мутахассисларнинг борлиги айтилмоқда.