Бухоро вилоятида Юсуф Жумага қарши кўрсатувлар намойиш этилган

Бухорода таниқли шоир ва мухолифат фаоли Юсуф Жуманинг оилавий норозилик пикетини ҳуқуқ-тартибот органлари ходимлари куч билан тарқатиб юборганлар.

Юсуф Жуманинг оиласи аъзолари ўз норозилик чиқишларини ўтган ҳафта бошлаганлар.

Улар ўзлари истиқомат қиладиган Бухоро вилоятининг Қоракўл туманидан автомобилда пойтахт Тошкентга қадар йўл-йўлакай пикет ўтказиб боришни режалаштирганликларини эълон қилганлар.

Би-би-си билан суҳбатда Юсуф Жуманинг айтишича, ўғли Машрабнинг ноҳақ ҳибсга олингани, маҳаллий телевидениеда оиласига қарши мазмундаги кўрсатувлар уюштирилаётганига қарши норозилик амалиётини бошлаганлар.

"Бухоро вилоятининг Қоракўл туманидан ўтган халқаро йўлда автомобил олдига "Диктатор Каримов, истеъфо бер! Кет!", деб ёзилган ёзувни жойлаштириб, суратга олаётганимизда бир автомобилда келиб ўғлимга ташланишди. Биз у ердан қочиб яширинишга мажбур бўлдик", деб айтди Юсуф Жума.

У ўғли Машрабнинг иккинчи марта ноҳақ ҳибсга олинганини айтади.

Юсуф Жума ва ўғиллари норозилик пикетини ўтказиш тўғрисида маҳаллий идораларга мурожаат қилишган, бироқ ўзларининг хатларига расмий идоралардан жавоб олмаганлар.

Шоирнинг айтишича, Ўзбекистон Президенти Ислом Каримовнинг Бухоро вилояти сайловчилари билан учрашувга борганидан сўнг ўзининг оиласига босимлар кучайган.

"Менинг ҳақимда Бухоро вилоят телевидениеси бир соатлик кўрсатув берди. Ва туманларда бир ойдан буён бу кўрсатув такрор-такрор кўрсатилаяпти. Давлат телевидениеси "Юсуф Жумаевни оиласи билан йўқ қилиш керак", деган гапни айтаяпти", дейди Юсуф Жума.

"Бирлик" халқ ҳаракати фаолларидан бўлган Юсуф Жума 2001 йилда қатор шеърлари учун Бухоро вилояти Миллий Хавфсизлик хизмати томонидан ҳибсга олинган.

Конституциявий тузумга тажовуз қилишда айбланиб, у олти ойга қамалган.

Халқаро босимлар туфайли Юсуф Жума озодликка чиқарилган.