Танлов ғолиби Мунаввара Ойматова

Тошкентда Би-би-си Ўзбек хизмати ташкил этилганининг 10 йиллиги ҳамда шу муносабат билан уюштирилган ижодий танлов ғолибини аниқлашга бағишланган тантанали кеча бўлиб ўтди.

Кечага танловда қатнашиб, унинг якуний босқичигача етиб келган 30 га яқин финалист, адабиёт, санъат намояндаларидан иборат меҳмонлар ҳамда радио ижодкорлари йиғилганди.

Тантанада Би-би-си Марказий Осиё ва Қавқоз хизмати раҳбари Ҳамид Исмоилов, Ўзбекистон Ташқи Ишлар вазирининг биринчи ўринбосари Владимир Норов ва радиомухлислар ижодкорларни Би-би-си Ўзбек хизмати ташкил этилганининг 10 йиллиги билан табриклашди.

Танлов иштирокчилари уч гуруҳга бўлиндилар.

Қуръа ташлаш асосида гуруҳ аъзоларидан “Адолат”, “Муҳаббат” ҳамда “Кенгфеъллик” мавзуларида шеър айтиш ёки ушбу тушунчаларни ифодалаб бериш сўралди.

Ҳакамлар ҳайъати ўзларига берилган мавзуда энг яхши чиқиш қилган уч қатнашчини аниқладилар.

Шоирлар Юсуф Жума ва Абдурасул Мамадалиев танлов совриндорлари бўлишди

Сўнг байрам кечасига йиғилган меҳмонлардан қайси номзодни ғолибликка муносиб ҳисобласа, ўша номзод рўпарасида тўпланиш сўралди.

Меҳмонларнинг аксарият кўпчилиги “Муҳаббат” мавзусида шеър ўқиган Мунаввара Ойматова атрофида жаъм бўлган эдилар.

Шундай қилиб, бир ойдан кўпроқ давом этган ижодий танловимизнинг ғолиби тожикистонлик шоира Мунаввара Ойматова бўлди.

Энди Мунавваранинг нафақат шеърлари, балки ўзи ҳам Лондонга саёҳат қилади.