Бу Юлдуз Усмонованинг биринчи марта тақиқланиши эмас

Би-би-си Ўзбек хизмати "Баҳс" рукнининг навбатдаги баҳси Ўзбекистоннинг машҳур хонандаси Юлдуз Усмонова билан. Таниқли қўшиқчи шу кунларда ўз мухлисларига тўртта янги қўшиғини тақдим этган. Улардан бири - "Оллоҳ қўллайди" деб номланади.

Ихлосмандлар Ўзбекистон давлат телевидениесида қўшиқлари намойиш этилмаётган санъаткорни сўнгги пайтда кўпроқ диний мавзудаги қўшиқларга эътибор қараётганини айтишади. Хўш бунинг сабаби нимада?

Юлдуз Усмонова: Сўнгги даврда кўпроқ диний мавзуга мурожаат қилаётганим рост. Чунки Оллоҳни кеча эслаганимиз йўқ, борлигимиздан бери Худога шукур Оллоҳникимиз.

Лекин нима десам бўлади? Бугун Оллоҳнинг отини айтган кўпу, лекин бевосита Исломни таниб, Қуръонни таниб Оллоҳни гапираётган одам камроқ. Яъни Оллоҳнинг номидан бир нарсалар ҳам деб юбораётган, айтиб ҳам юбораётганлар бор. Энди ҳаётнинг ўнқир-чўнқирларидан ўтиб бораверганингиздан кейин, кўпроқ ақлингиз киравергандан кейин Оллоҳга барибир мурожат қилар экансиз-да.

Би-би-си: Умуман олганда диний мавзуларда ашула айтиш қийинми Сизга?

Юлдуз Усмонова: Қийин эмас, севиб ижро этаман ва агар менда бир фанатизм ё бошқа бир нарса бўлганда, балки бу қўшиқлар одамлар кўнглига етиб ҳам бормасди, бу қўшиқлар тарқалмас ҳам эди. Чунки айримлар диний мавзуда коммерция йўналишида ҳам қўшиқ айтиб кўришаяпти, эътибор қилсангиз.

Би-би-си: Диний мавзулардаги қўшиқларни танлашда кимдандир маслаҳат оласизми?

Юлдуз Усмонова: Минг афсус, ҳозирча менга кимдандир маслаҳат олиш қийинроқ. Домла топиш осон эмас, ҳаммаси банд. Лекин менинг ўзим рус тилида чоп этилган Қуръоннинг уч таржимасини ўқидим. Шу билан бирга ўзим араб тилини ҳам ўрганиб бораяпман.

Мен ашулачиман. Мендан ўтаётган кечинмани менинг мухлисларим билишлари керак. Яъни мен Оллоҳга саловат қилаяпман. Мендаги бор нарса - мендаги омад, нечта чуқурга тушсам бутун чиқишим ҳаммаси Оллоҳдан. Мухлисларим ҳаётимни шу қўшиқларимга солиштириб тинглашади. Бу қуруқ сўз эмас.

Би-би-си: Ҳозир қандай чуқурга тушгансиз?

Мана менсиз ҳам байрам ўтди. Энди чиройли, чиройли эмаслигига халқнинг ўзи баҳо бериб олади. Мен ўйлайман - буниям бир ҳикмати бор Юлдуз

Юлдуз Усмонова: Энди одамзотга одамзот қилади чуқурни. Душманлар дейолмайман, чунки мен бировга ёмонлик қилганим йўқ душман дейиш учун. Ҳасадгўйлар бор. Олдинга қараб интилганингизда, албатта сизнинг интилганингизни кўриб, омадингизни кўриб, ютуқларингизни кўриб кимдир албатта оёғингизга болта уради. Яъни чуқур деганда, шу маънода айтаяпман, холос.

Би-би-си: Лекин охирги пайтда нега Ўзбекистон давлат телевидениесида чиқмай қолдингиз?

Юлдуз Усмонова: Энди мен нима десам бўлади? Зоримиз бор, зўримиз йўқ. Улар чиқармаяпти, мен бориб ялинаётганим йўқ.

Би-би-си: Наврўз байрамида ҳам чиқмадингиз, Мустақиллик байрамида ҳам чиқмадингиз. Одамлар ҳайрон бўлаяпти...

Юлдуз Усмонова: Мана менсиз ҳам байрам ўтди. Энди чиройли, чиройли эмаслигига халқнинг ўзи баҳо бериб олади. Мен ўйлайман - буниям бир ҳикмати бор. Мен яхшиликка йўйдим буни ҳам.

Би-би-си: Сиқилмадингизми?

Юлдуз Усмонова: Йўқ. Мен чиқмаганимга халқ байрамни гапирмаяпти, қани Юлдуз, деб гапираяпти.

Би-би-си: Энди баъзида фалончи қўшиқчи фалончи арбобнинг тўйига бормагани учун телевидениедан четлашибди, фалончи қўшиқни айтмагани учун концерт ўтказишга ижозат беришмас экан, деган тасдиқланмаган гапларни эшитиб қоламиз. Умуман шу гапларда қанчалар жон бор?

Юлдуз Усмонова: Энди бу тўйга боғлиқ эмас. Мен тўғрисини айтаман, ўзимга ниҳоятда яқин одам бўлса, ё ўзимнинг яхши оғайним бўлса, бир эҳсон қилиб пулини олмасдан тўйига боришим мумкин. Қолганига, у ким бўлишидан қатъий назар, ҳамма билади, азал-азалдан пулини оламан.

Би-би-си: Қўшиқчиларнинг телевидениеда чиқмаслигига ҳукумат мулозимларининг аралашуви бўладими?

одатим, кўрган нарсамни айтаман, билган нарсамни айтаман. Кўпинча шунинг учун ҳам кўпчилик билан уришиб қоламан Юлдуз

Юлдуз Усмонова: Давлатнинг телевидениесига давлат хўжайин-ку. Бу телевидениеда ўтирган раҳбар ҳам хўжайинмас-у.

Би-би-си: Одамлар, халқнинг дардини айтади, дейишади Сиз ҳақингизда гапирганда. Ҳозир халқнинг дарди нимада, деб ўйлайсиз?

Юлдуз Усмонова: Энди халқнинг дарди ҳам ҳар хил. Бир хил пайтда, биласизми, халққа ҳам қараб туриб, кўп нарсани тушунмай қоламан-да. Нима хоҳлаётганини билмайди. Ўзи бир нарсадан қийналиб турган бўлсаям, бир нарса бўлса, ҳалиги лаганбардорлик, сотқинлик...

Би-би-си: Парламент аъзоси эдингиз, энди ҳозир сиёсатдан четлашиб қолдингизми?

Юлдуз Усмонова: Иккинчи марта ҳам сайланишим мумкин эди. Иккинчи марта номзодимни қўймаганим сабаби, ижод қилиш мумкин эмас экан парламент икки палатали бўлгандан кейин. Ашула айтиб бўлмас экан, дейишди. Шундай дейишганидан кейин менга тўғри келмади. Мен, тўғрисини айтсам, мен ашулачиман.

Би-би-си: Яъни санъатми сиёсат, дейишганида Сиз санъатни танглагансиз-да?

Юлдуз Усмонова: Ҳа, энди мен сиёсатчи бўлиб нима қилиб бераман? Мен тинчгина ашуламни айтиб юрганим яхши, дедим-да.

Би-би-си: Яна одамлар айтишадики, Юлдузнинг орқасида фалончи одам турар экан, пистончи одам турур экан. Умуман сизни дастаклайдиган ҳукумат арбоблари борми?

Юлдуз Усмонова: Э, йўғ-э! Ҳукуматнинг манимча ҳаммаси ёмон кўрса керак мени.

Би-би-си: Нимага ёмон кўради деб ўйлайсиз?

Юлдуз Усмонова: Мени ким дастаклайди, бундоқ ўзингиз ўйлаб қаранг! Мени дастаклайдиган одам бўлганда, мен хато ҳам қилмас эдим. Менга подсказка бўлиб турар эди тепада, тўғрими? Қанақа дастак?

Би-би-си: Демак дастак йўқ?

Ким керакли гапни ашула қилиб чиқаяпти? Ҳамма соққасини ўйлаяпти. Майли мен бунга қарши эмасман, мен ҳам соққани ўйлайман. Лекин санъаткорнинг ҳам ўзининг вазифаси бор Юлдуз

Юлдуз Усмонова: Менинг бу тилим билан қанақа дастак?

Би-би-си: Яъни тилингиз бунга панд беради, шундайми?

Юлдуз Усмонова: Э, энди нима десам бўлади, менинг одатим, кўрган нарсамни айтаман, билган нарсамни айтаман. Кўпинча шунинг учун ҳам кўпчилик билан уришиб қоламан. Тўғри гап ёқавермайди ҳаммага.

Би-би-си: Кейин баъзилар айтадики, шу Юлдузхон янги чиқаётган артистларни кўра олмайди, дейди. Шу гаплар тўғрими?

Юлдуз Усмонова: Энди ўзингиз бундоқ таҳлил қилинг, мени ўзимнинг янги артистларгача қўлим тегадими-йўқми? Бир йилда иккитадан альбом чиқараман. Неварали аёл бўлсам. Қани менга айтинг, қайси янги "даҳшат" санъаткор чиқибдики, мен қизиқсам? Кўриш у ёқда турсин, қизиқишга вақтим йўқ.

Би-би-си: Энди янги ижодкорлар билан қизиқасизми? Қайси санъатчилар чиқаяпти ҳозир Ўзбекистонда янги, ёш, истеъдодли?

Юлдуз Усмонова: Мен умуман қизиқмайман. Чунки пичоққа илинадигани йўқ, мен сизга айтсам.

Би-би-си: Ўзбекистонда санъаткор, деганда сиз кимни ўрнак қилиб кўрсата оласиз?

Юлдуз Усмонова: Э, санъатчиман деган миллион одам бор. Чиққан рэпперлар ҳам ўзини катта санъаткор деб билади.

Би-би-си: Сиз ҳурмат қиладиган санъаткор-чи?

Юлдуз Усмонова: Қани менга айтингчи, мен кимни ҳурмат қилишим керак? Ким керакли гапни ашула қилиб чиқаяпти? Ҳамма соққасини ўйлаяпти. Майли мен бунга қарши эмасман, мен ҳам соққани ўйлайман. Лекин санъаткорнинг ҳам ўзининг вазифаси бор. Масалан ким ўзининг вазифасини қилаяпти? Овоз эшакда ҳам бор.

Энди мен қўллаб-қувватлаб нима қилишим керак? Мен халқ олдида чиқиб ёлғон гапиришим керакми, мана бу зўр санъаткор деб? Халқ ўзи топиб олади ўзига кераклигини.

Би-би-си: Яқинда эшитиб қолдик бу йил ҳам Ҳаж зиёратига тайёргарлик кўраётган экансиз.

Юлдуз Усмонова: Мен бу ҳақда гапиришни хоҳламайман. Бу нарсанинг спекуляция бўлишини ҳам хоҳламайман. Борсам, ўзим учун бораяпман. Энди ҳар ким ибодатни ўзи учун қилади. МИсол учун кимдир таътилда у ёққа бориб дам олади, бу ёққа бориб дам олади.

Мен ҳаддан ташқари кўп ишлайман, биласизми? Кўп санъаткорларнинг юзини ҳам кўрмайман. Мана ҳозир шу йилги иккинчи альбомимни ёзаяпман. Бу нисбатан интернационал альбом бўлаяпти. Ҳозир хитойча қўшиқ ёзаяпмиз. Иккита туркча ёздим. Уйғурча, қозоқча қўшиқлар ҳам бор. Ўтган йили тожикча альбом ёздим.

Би-би-си: Раҳмат!