Видеоклипдан сиёсий мақсад кўзланган бўлиши мумкин

Шарқона кураш бўйича қора белбоғ, Гарвард дипломи, заргарлик буюмлари дизайнери, тадбиркор...

"Унинг отаси бешафқат диктатор бўлиши мумкин, аммо Гулнора Каримова эришган ютуқларнинг расмий рўйхати узунлиги бир қулоч", деб ёзади Лондонда чоп этиладиган "Гардиан" газетаси.

Ўзбекистон президентининг жозибадор қизи Гулнора Каримова ўз видеоклипини чиқариб бу рўйхатни яна бир янги талант билан бойитди, дейилади рўзнома мақоласида.

"Гардиан"нинг тахмин қилишича, Гулнора Каримованинг ижодий тахаллуси Гугуша, отаси ёшлигида эркалаб чақирган исмга асосланган.

Газетада айтилишича, таҳлилчилар Гулнора Каримованинг қўшиқ айтиб видеоклип яратишини отасидан сўнг мамлакат раҳбарлигини мерос қилиб олиш йўлида олиб борилаётган кампаниянинг бир қисми сифатида талқин қилмоқдалар.

Анънавий мусулмон жамиятида раҳбар бўлмоқчи бўлган аёл ўнгида яратилувчи тўсиқларга қарамай, дейилади "Гардиан"да, Гулнора Каримова отасининг моддий бойликлари ва яқин атрофдагиларини ҳимоя қила олувчи ягона шахс сифатида кўрилмоқда.

Аммо танқидчиларнинг сўзларига қулоқ тутсак, бу клипнинг яратилиши Каримованинг имиджини у қадар кўтара олмайди деб ёзади рўзнома.

"Гардиан" Британиянинг Ўзбекистондаги собиқ элчиси Крэйг Маррейнинг "Бу худди император Неронинг мусиқа чалишига ўхшайди, ҳамма чапак чалиб олқишлаши шарт" деган сўзларини келтирган.

Ўзбек матбуоти Гулнора Каримованинг хайрия фаолиятига таяниб "Ўзбек маликаси" деб аташини ҳам рўзнома эслатиб ўтган ва шунингдек мусиқашунос Татьяна Петренконинг Каримова хислатлари ҳамиша олийлик билан боғлиқ, деган сўзларидан иқтибос келтирган.

Гулнора Каримова қўшиғи қандай қаршиланди?