Жонатан Кент Би-би-сининг Куала-Лумпурдаги мухбири

	Малайзия 2007 йили фазога ўз космонавтини чиқаришни мўлжаллаган

Малайзияда бошланган анжуман фазода Ислом ва ҳаёт мавзусига бағишланган. Ушбу йиғилиш мусулмон намозхон фазогир очиқ космосда юзма-юз келиши мумкин бўлган саволларга жавоб топиш мақсадини кўзлайди.

Кейинги йили Малайзия ўзининг фазогирини Россия космонавтлари билан бирга космосга учириши керак.

Бу мамлакатнинг дастлабки фазогири мусулмон бўлиши кераклигига ҳеч ким шубҳа қилаётгани йўқ.

Аммо мусулмон намозхоннинг фазода шариат амалларини қандай адо этиши масаласи кўпчиликни ўйлантирган.

Мисол учун, таҳорат олиш. Беш вақт намоздан олдин таҳорат олиш керак, аммо фазо станциясида бир қултум сув тиллога тенг.

Бунинг устига вазнсизлик ҳолатида қандай таҳорат олиш мумкин?

Куала-Лумпурда йиғилган уламолар космосдаги фазогир Қиблани қандай аниқлаши кераклиги юзасидан ҳам маслаҳат ишлаб чиқишлари керак бўлади.

Тинимсиз айланиб турган космик кемада намозхон Маккага юзланиб туролмайди.

Ер юзида бир кунда бир марта тонг отиб, бир марта кун ботса, фазода кунига ўн маротаба қуёш чиқиб ботади.

Шунинг учун ҳам Малайзия Фан вазирлиги юзага келган ана шу саволларга жавоб топиш мақсадида уламоларни бир анжуманга йиғишга қарор қилган.

Ушму мажлиснинг бу йўлдаги биринчи муҳокама экани айтилмоқда.

Ушбу тадбир Малайзия ҳукумати рағбатлантираётган Хадҳари Ислом - яъни мусулмонларнинг илм-фан, техникани ўзлаштиришга иштиёқини ошириш йўналишидаги тадбир ҳамдир.

Мусулмон олимларининг замонавий тараққиёт муаммоларининг ечимини топишга қаратилган ушбу анжумани бошқа Ислом дунёсида ҳам эътиборсиз қолмаслиги тайин.

Мусулмонлар жаҳон илм-фанига қандай ҳисса қўшганлар?

Мақолага муштарийлар фикр-мулоҳазалари:

Ville Valo

Bu kabi qurultoylar dinni mazaxlashga aylanib ketmasmikan? Axir, islom va boshqa dinlar paydo bo`lgan vaqtda insonning sayyoralararo fazoda yashashi va ishlashi mumkinligi hech kimning hayolida ham yo`q edi. Bunday bahslar ko`tarishdan ehtiyot bo`lish kerak: e`tiqod maynavozchilik emas! Fazoviy stanciya ilmiy-tadqiqotlar uchun yaratilgan. Qolaversa, koinotga harholda fanatikni yuborishmasa kerak?

Шавкат

Бу саволларга Ислом уламоларининг жавоблари қандай?

Мақсуд Каримов, Ўзбекистон

Бундай исломий анжуманлар бизнинг диёримизда ўтказилса. Шунда айримлар бизда ҳам Ислом учун кенг йўл очилганини билардилар. Бу анжуман бизнинг динимиз ҳар соҳада илм-фан билан бирга эканлигини кўрсатади.