BBCUzbek

НАТО бош котиби Яп Де Хуп Схеффер ва Ўэбекистон ташқи ишлар вазири Содиқ Сафоев
НАТО бош котиби Яп Де Хуп Схеффер 19 октябр куни Қиргизистон пойтахти Бишкек шаҳридан Тошкентга келган.

Бу ерда у Президент Каримов, Ўзбекистон ташқи ишлар вазири Содиқ Сафоев ҳамда мудофаа вазири Қодир Ғуломов билан музокаралар олиб борган.

20 октябр куни минтақа бўйлаб сафарини давом эттириб, Тожикистон пойтахти Душанбега учиб кетган.

НАТО Ўзбекистонга янги ҳамкорлик турларини таклиф қилмоқда.

Ўзбекистонга ташриф буюрган НАТО бош котиби Яп Де Хоуп Схефер бундай буён Ўзбекистон НАТО муносабатлари ҳарбий соҳадаги ҳамкорлик билан чекланиб қолмайди, деб айтган.

НАТО Терроризмга қарши курашни Ўзбекистон билан ҳамкорликнинг асосий йўналиши деб белгилаган.

Мутахассисларга кўра Марказий Осиё минтақасида Россия АҚШ ҳамда НАТО қуролли кучларининг ҳарбий базалари жойлаштирилишининг сабаби айнан терроризмга қарши курашдир.

Ўзбекистон минтақада ўзининг НАТО билан ҳамкорлик ҳаракатлари режасини тақдим этган биринчи давлатдир.

Марказий Осиё минтақаси бўйлаб сафар қилаётган НАТО бош котиби Яп Де Хуп Схефферга кўра, ушбу режа асосида НАТО Ўзбекистонга армияни ислоҳ қилишда, терроризмга қарши курашда, табий офатлар ҳамда экологик муаммоларга бардош беришда кўмак кўрсатади.

Ўзбекистон ташқи ишлар вазири Содиқ Сафоев: "Бизнинг фикримизча ҳарбий ислоҳатлаpсиз жамиятни тўла такомиллаштиришга эришиш мумкин эмас. Бу борада НАТО бизга кўп ёрдам беряпти» деб айтган.

НАТО бош котиби Яп Де Хуп Схефер Маркизий Осиёга бундай буён стратегик минтақа сифатида асосий эътибор берилишини урғулар экан, бу мақсадда илк бор НАТО бош котибининг Марказий Осиёдаги махсус вакили лавозими жорий қилингани ҳақида айтган.

НАТОнинг минтақа билан ҳамкорликни кенгайтириш сабабларини изоҳлар экан, "...бунинг сабаблари барчамиз юз тутаётган замонавий таҳдидлардир. Терроризм ҳамда оммавий қирғин қуролларининг тарқалиш таҳдидига қарши биргаликда курашиш лозим. НАТО Афғонистонда ҳам узоқ муддатга қолиш ниятида. Сабаби - мамлакатнинг яна террорчилар таъминотчисига айланишига йўл қўймаслик лозим. Умид қиламан Ўзбекистон НАТОнинг Афғонистондаги фаолиятига кўмак кўрсатади”,- деб айтган.

НАТО бош котиби Ўзбекистондаги инсон ҳуқуқлари борасидаги вазият томонлар ўртасидаги ҳамкорликка тўсқинлик қилмайди дея умид билдирган.

Аммо терроризмга қарши кураш НАТО билан ҳамкорликнинг асосий йўналиши деб белгиланар экан, Яп Де Хуп Схеффер жаноблари асосий эътибор барибир демократик институтларни қўллаб қувватлашга уларни ҳимоя қилишга қаратилиши лозим деб ҳисоблайди.

Унга кўра, демократик тамойиллар ривожланмаган ёки таҳдид остида қолган шароитда терроризм томир отади.