برطانیہ کے دارالحکومت لندن میں ایک ہیلی کاپٹر گرنے کے نتیجے میں دو افراد ہلاک اور تیرہ زخمی ہو گئے ہیں۔
بدھ کو وسطی لندن میں اس وقت پیش آیا جب ہیلی کاپٹر ایک کرین سے ٹکرانے کے نتیجے میں گر کر تباہ ہو گیا۔
پولیس کا کہنا ہے کہ بدھ کی صبح گرینج کے معیاری وقت کے مطابق آٹھ بجے ہیلی کاپٹر کے سینٹ جارج وارف میں ایک کرین سے ٹکرانے کے نتیجے میں یہ حادثہ پیش آیا۔
ڈاکٹرز کا کہنا ہے کہ ہلاک ہونے والوں میں ایک پائلٹ اور ایک عام شہری شامل ہے جب کہ زخمیوں میں سے چھ افراد کو ہسپتال منتقل کیا گیا ہے۔
زخمیوں میں سے ایک شخص کی ٹانگ ٹوٹ گئی جبکہ دیگر کو ممعولی زخم آئے ہیں۔ اس کے علاوہ سات افراد کو جائے حادثہ پر طبی امداد فراہم کی گئی۔
حکام کا کہنا ہے کہ پائلٹ کو خراب موسم کی وجہ سے قریبی ہیلی پیڈ کی جانب جانے کو کہا گیا تھا۔
لندن کی میٹروپولیٹن پولیس کے کمانڈر نیل باسو نے بی بی سی نیوز سے بات کرتے ہوئے کہا’یہ ایک معجزہ‘ تھا کہ حادثہ زیادہ خطرناک ثابت نہیں ہوا۔
ہیلی کاپٹر کے ملبے میں لگنے والی آگ پر نوے کے قریب فائر فائٹرز نے پچیس منٹ میں قابو پا لیا۔
لندن برج فائر بریگیڈ کا کہنا ہے کہ ہیلی کاپٹر کی دم عمارت کی چھت پر گری جب کہ باقی ملبہ زمین پر گرا اور اس کی ذر میں دو گاڑیاں بھی آئیں ہیں۔
ہیلی کاپٹر کے ملبے میں لگنے والی آگ نے دو قریبی عمارتوں کو لپیٹ میں لے لیا۔
