سمندری طوفان ’ارما‘ سے کیریبیئن جزائر پر تباہی، دس ہلاک

بحر اوقیانوس میں آنے والے سمندری طوفان ارما نے کریبیئن جزائر میں تباہی مچا دی ہے اور اس کی زد میں آ کر اب تک کم از کم دس افراد کی ہلاکت کی تصدیق ہوئی ہے۔

ارما گذشتہ ایک دہائی میں اس سمندر میں آنے والا سب سے شدید طوفان ہے اور یہ اپنے ساتھ 295 کلومیٹر فی گھنٹہ کی رفتار سے چلنے والی ہوائیں لایا ہے۔

٭ ہوسٹن: ’سڑکوں پر نہ نکلیں اور طوفان ختم نہیں ہوا‘

٭ امریکہ میں ’تباہ کن‘ سمندری طوفان، دو ہلاک

بدھ کو طوفان کا نشانہ بننے والے جزیرے باربودا کے وزیراعظم گیسٹن براؤنی نے کہا ہے کہ تباہی اتنی زیادہ ہوئی ہے کہ اب یہ جزیرہ رہائش کے قابل نہیں رہا جبکہ فرانس کے زیرِ انتظام جزیرے سینٹ مارٹن میں حکام نے بتایا ہے کہ وہاں 95 فیصد عمارتیں تباہ ہو گئی ہیں۔

حکام کا کہنا ہے کے طوفان سے باربودا میں ایک بچہ اور سینٹ مارٹن میں کم سے کم چھ افراد ہلاک ہوئے ہیں جبکہ سینٹ مارٹن جزیرے کا ہوائی اڈہ بھی تباہ ہو گیا ہے۔ سینٹ مارٹن طوفان سے سب سے بری طرح متاثر علاقوں میں سے ایک ہے۔

متاثرہ علاقوں میں نقصانات کا جائزہ لینے کا عمل جاری ہے اور حکام کے مطابق ہلاکتوں میں بھی اضافہ ہو سکتا ہے۔ فلاحی ادارے ریڈ کراس کا کہنا ہے کہ باربودا میں جیسی تباہی جیسی طوفان سے ہوئی اس طرح کی تباہی کی مثال نہیں ملتی اور متاثرہ علاقوں کی دوبارہ تعمیر میں کروڑوں ڈالر لگیں گے۔

ارما سب سے پہلے باربودا سے ٹکرایا تھا جہاں کی آبادی صرف 1600 ہے۔ جزیرے کے وزیرِاعظم گیسٹن براؤنی نے اس سے ہونے والے نقصان کا ابتدائی جائزہ لینے کے بعد کہا ہے کہ 'یہ مکمل تباہی ہے۔ جزیرہ مکمل طور پر زیرِ آب ہے اور میرے خیال میں اب یہ رہائش کے قابل ہی نہیں رہا ہے۔'

درجہ پانچ کا سمندری طوفان

امریکہ کے قومی ہریکین سنٹر کے مطابق ارما جو کہ سب سے شدید یعنی درجہ پانچ کا سمندری طوفان ہے اب پورٹوریکو کے شمال سے گزر رہا ہے۔

اس طوفان کی وجہ سے ہونے والی شدید بارشوں اور تیز ہواؤں نے جزیرے میں بجلی کا نظام درہم برہم کر دیا ہے اور جزیرے کی 30 لاکھ آبادی میں سے نصف بجلی سے محروم ہے اور حکام کے مطابق یہ صورتحال کئی دن تک برقرار رہے گی۔

ہریکین سینٹر کے اہلکاروں کے مطابق ارما جمعرات کو ڈومینکن ریپبلک کے شمالی ساحل کے قریب سے گزر سکتا ہے اور پھر وہ سپنیولا اور کیوبا سے ہوتا ہوا سنیچر تک امریکی ریاست فلوریڈا تک پہنچ جائے گا۔

فلوریڈا میں حکام نے مغربی علاقوں میں لوگوں کو لازمی طور پر علاقہ چھوڑنے کے احکامات جاری کر دیے ہیں۔

امریکی صدر ڈونلڈ ٹرمپ نے فلوریڈا، پورٹو ریکو اور یو ایس ورجن آئی لینڈز میں ایمرجنسی نافذ کر دی ہے۔

کیریبیئن جزائر پر ایئرپورٹ کو بند کر دیا گیا ہے اور لوگوں سے کہا گیا ہے کہ وہ محفوظ پناہ گاہوں میں ہی رہیں۔

بہاماس کے وزیر اعظم نے اپنی تاریخ کے سب سے بڑے انخلا کی تیاری کا اعلان کیا ہے اور لوگوں کو جہازوں کے ذریعے جنوب مشرقی جزائر میں لے جایا جا رہا ہے۔