پاکستانی فٹبالر کے شہر میں امریکی سکول

امریکہ میں پروفیشنل لیگ کھیلنے والے پاکستانی فٹبالر کلیم اللہ نے ایک امریکی تعلیمی ادارے سے معاہدہ کیا ہے جس کے تحت یہ ادارہ کلیم اللہ کے آبائی شہر چمن میں سکول قائم کرے گا۔

کلیم اللہ نے سان فرانسسکو سے بی بی سی اردو سروس کو دیے گئے انٹرویو میں کہا کہ اس تعلیمی ادارے کے پاکستان سمیت متعدد ممالک میں سکولز موجود ہیں اور اب وہ ان کے شہر چمن میں بھی سکول قائم کرنا چاہتا ہے جس کی تعمیر جلد شروع ہو جائے گی اور وہاں آئندہ سال سے تعلیم شروع ہوجائے گی۔

پاکستان فٹبالر کلیم اللہ امریکی لیگ میں

کلیم اللہ کا کہنا ہے کہ ان کی دیرینہ خواہش رہی ہے کہ ان کا شہر بھی تعلیم اور کھیل کی بنیادی سہولتوں کے ساتھ نمایاں نظر آئے۔

کلیم اللہ جو سان فرانسسکو کے کلب سیکرامینٹو ری پبلک کی نمائندگی کر رہے ہیں اس بات پر بہت خوش ہیں کہ یہاں کھیلتے ہوئے انھیں بہت زیادہ پذیرائی ملی ہے اور ان کے کھیل کو کافی سراہا گیا ہے۔

کلیم اللہ نے کہا کہ انھوں نے امریکہ میں کھیلتے ہوئے یہ پیغام دینے کی بھی کوشش کی ہے کہ پاکستان ایک پرامن ملک ہے اور پاکستانی امن پسند لوگ ہیں۔

امریکی کلب میں آنے سے قبل کلیم اللہ نے گذشتہ برس کرغستان کے کلب ڈورڈئی کی نمائندگی کی تھی اور ان کے 18 گول نے کلب کو لیگ جتوانے میں اہم کردار ادا کیا تھا۔

کلیم اللہ پاکستانی فٹبال کی تاریخ کے مہنگے ترین کھلاڑی ہیں۔ ڈورڈئی نے ان سے ایک لاکھ ڈالرز کے عوض دو سالہ معاہدہ کیا تھا۔

کلیم اللہ پہلے ہی کہہ چکے ہیں کہ انگلش فٹبال لیگ ان کی اصل منزل ہے اور وہ اپنے بہترین کھیل سے انگلش فٹبال لیگ کا حصہ بننا چاہتے ہیں۔