لندن اولمپکس میں امریکہ نے بیجنگ اولمپک میں حاصل کی گئی چین کی برتری کو ختم کرتے ہوئے سب سے زیادہ میڈلز حاصل کیے ہیں۔
امریکہ نے کُل ایک سو چار تمغے جیتے جن میں سے چھیالیس طلائی تمغے ہیں۔ دوسرے نمبر پر چین رہا جس نے اڑتیس طلائی تمغوں سمیت کُل ستاسی میڈلز حاصل کیے۔
تیسویں اولمپک کھیلوں میں جس ملک نے ماضی کے مقابلے میں حیرت انگیز طور پر بہتر کارکردگی دکھائی وہ میزبان ملک برطانیہ تھا۔
بیجنگ اولمپکس میں انیس طلائی تمغے جیتنے والے اس ملک نے اس مرتبہ انتیس طلائی تمغے جیتے جبکہ اس کے کُل تمغوں کی تعداد چونسٹھ رہی۔ یہ ایک سو چار برس میں اولمپکس میں برطانیہ کی بہترین کارکردگی ہے۔
برطانیہ کے لیے انتیسواں اور آخری گولڈ میڈل کھیلوں کے آخری دن جوشوا انتھونی نے باکسنگ کے سپر ہیوی ویٹ مقابلے میں اٹلی کے رابرٹو کیمیریلی کو شکست دے کر حاصل کیا۔
لندن اولمپکس کا آخری مقابلہ خواتین کی ماڈرن پینٹاتھلون تھی جس میں لیتھوینیا کی لارا اسادوسکئیٹا نے طلائی تمغہ جیتا جبکہ برطانیہ کی سمانتھا مرے کے اس مقابلے میں چاندی کا تمغہ جیت کر ان کھیلوں میں برطانیہ کو مجموعی طور پر چونسٹھواں میڈل دلوایا۔
امریکی تیراک مائیکل فیلپس چھ تمغوں کے ساتھ لندن اولمپکس کے سب سے کامیاب کھلاڑی رہے
آخری دن کے مقابلوں کے ایک خاص بات یوگنڈا کے سٹیفن کپروٹک کا گولڈ میڈل تھ۔ انہوں نے مروں کی میراتھن میں چھبیس اعشاریہ دو میل کا مقررہ فاصلہ دو گھنٹے آٹھ منٹ میں مکمل کر کے یوگنڈا کے لیے انیس سو بہتّر کے بعد پہلا اولمپکس طلائی تمغہ حاصل کیا۔
لندن اولمپکس کے دوران مجموعی طور پر چوالیس نئے عالمی جبکہ ایک سو سترہ نئے اولمپک ریکارڈ قائم ہوئے۔ ان مقابلوں میں شریک دو سو چار ممالک میں سے پچاسی ممالک کے ایتھلیٹ کم از کم ایک تمغہ جیتنے میں کامیاب رہے جبکہ ان میں سے چوّن نے کم از کم ایک طلائی تمغہ جیتا۔
ان کھیلوں کے سب سے کامیاب کھلاڑی امریکہ کے تیراک مائیکل فیلپس رہے جنہوں نے لندن اولمپکس میں کُل چھ میڈلز جیتے جن میں سے چار طلائی اور دو چاندی کے تمغے تھے۔
فیلپس نے نہ صرف ان اولمپکس میں سب سے زیادہ تمغے حاصل کیے بلکہ وہ کل بائیس تمغوں کے ساتھ اولمپکس کی تاریخ میں سب سے زیادہ تمغے جیتنے والے شخص بن گئے ہیں۔
ایتھلیٹکس میں جمیکا کے یوسین بولٹ لندن اولمپکس کے دوران سو اور دو سو میٹر کی ریس میں اپنے اعزاز کا دفاع کرنے والے پہلے شخص بنے۔ انہوں نے بیجنگ اولمپکس کی طرح ان مقابلوں میں بھی سو، دو سو اور چار ضرب سو میٹر کی ریس میں طلائی تمغے جیت کر ہیٹ ٹرک مکمل کی۔
بارہ اگست کو اولمپک سٹیڈیم میں منعقد ہونے والی ایک رنگارنگ تقریب میں دو ہزار بارہ کے لندن اولمپکس اختتام پذیر ہوگئے
تقریب کا آغاز بگ بین کا گھڑیال بجنے سے ہوا جس کے بعد برطانوی پرچم پر لندن شہر کا منظر پیش کیا گیا۔
اختتامی تقریب میں لندن کے تمام مشہور مقامات کی شبیہیں پیش کی گئیں
اس تقریب میں چار ہزار ایک سو افراد اپنے فن کا مظاہرہ کیا
جب تمام ممالک کے ایتھلیٹ اپنے جھنڈے لے کر میدان میں پہنچے تو نظارہ دیکھنے کے قابل تھا
تقریب کا مرکزی خیال برطانوی موسیقی کے پچاس سال تھا اور برطانوی گروپ سپائس گرلز بھی اپنے فن کا مظاہرہ کرنے والوں میں شامل تھا
وکٹوریہ بیکھہم اور گیری ہالیویل نے اپنی گلوکاری سے شائقین کا دل موہ لیا
تقریب میں برطانوی ثقافت کے اہم جزو یعنی سرکس کو بھی نمائندگی دی گئی
تقریب کے اختتام پر اولمپکس مشعل بجھا دی گئی اور اولمپکس کا پرچم دو ہزار سولہ کے اولمپکس میزبان برازیلی شہر ریو ڈی جنیرو کے میئر کو سونپ دیا گیا
مشعل بجھائے جانے سے قبل اس سے ایک آتشی مشینی پرندہ نمودار ہوا جس نے سٹیڈیم کا چکر لگایا
سب سے آخر میں آتش بازی کا شاندار مظاہرہ کیا گیا جس نے سارے علاقے کو بقعۂ نور بنا دیا
برطانوی شہزادہ ہیری نے اس تقریب میں ملکۂ برطانیہ کی نمائندگی کی
ایک آٹھ منٹ طویل پروگرام میں ریو ڈی جنیرو کی کثیر الثقافتی روایات، موسیقی اور رقص کا نمونہ بھی پیش کیا گیا
