شام میں باغیوں نے دعویٰ کیا ہے کہ انھوں نے حلب شہر کے قریب ایک سرکاری دفاعی ہوائی آڈہ پر قبضہ کر لیا ہے ۔
التنیہ نامی ہوائی اڈہ حلب کے مشرق میں واقع ہے جہاں پر سکیورٹی فورسز اور باغیوں کے درمیان مہینوں سے لڑائی جاری رہی۔
دوسری طرف سرکاری میڈیا کے مطابق شامی فوجیوں نے باغیوں کے چودہ اسلحہ سے بھرے ٹرکوں کو تباہ کیا ہے۔
دریں اثناء ترکی کی طرف سے شام کے لیے جانے والے ہوائی جہاز کو روکنے کے معاملے پر روس نے کہا ہے کہ جہاز پر ریڈار کے پرزے قانون کے مطابق بھیجے جا رہے تھے۔
شام کے وزیرِ خارجہ نے ترکی کے وزیر اعظم طیب اردگان کے اس دعوی کو چیلنج کیا ہے اور کہا ہے اگر انھوں نے شام کے مسافر طیارے سے ’غیر قانونی سازو سامان‘ ضبط کیا ہے تو وہ عوام کے سامنے وہ پیش کریں۔
واضح رہے کہ اس سے قبل روس نے اس الزام سے انکار کیا تھا کہ شامی طیارے پر غیر قانونی سازوسامان لدا ہوا تھا۔
