میرا بٹوارہ

یہ دنیا کی شاید سب سے بڑی ہجرت تھی جس میں کم از کم دس ملین افراد گھر سے بےگھر ہونے پر مجبور ہوئے۔

آج سے ستر برس پہلے، اگست انیس سو سینتالیس کے ایک دن، انڈیا میں برطانیہ کےاقتدار کا سورج ہمیشہ کے لیے ڈوب گیا۔

ملک دو آزاد ریاستوں- ہندو اکثریتی انڈیا اور مسلم اکثریتی پاکستان میں تقسیم ہو گیا۔
لاکھوں مسلمان، پاکستان کے مغربی حصے اور مشرقی حصے (بنگلہ دیش) کی طرف روانہ ہوگئے۔

لاکھوں ہندو اور سکھ انڈیا کی نئی سرحدوں کے اندر بسنے کے لیے عازمِ سفر ہو
ئے۔ مختلف اندازوں کے مطابق تقریبا ایک ملین افراد کو موت نگل گئی
لاکھوں عورتیں ریپ ہوئیں۔ ہزاروں اٹھا لی گئیں۔

برطانیہ میں رہنے والے بارہ افراد، آج ستر برس بعد تقسیم کے کرب سے جڑی ہوئی اپنی اپنی کہانی سنا رہے ہیں۔ ان میں سے بعض کی زبان پر یہ کہانی پہلی بار آئی پروڈیوسر: کویتا پوری

تقسیم سے پہلے ہم ایک خاندان کی طرح تھے۔ ہندو، مسلم سکھ سب۔ کسی نے یہ
صور بھی نہیں کیا تھا کہ تقسیم ہوگی۔ میں آج تک یہ نہیں سمجھ سکا کہ لوگ اتنی
جلدی اور اتنی آسانی سے کیسے بدل گئے۔

باہر سے مسلمان آئے اور انہوں نے ہمارے گاؤں پر حملہ کیا۔ ایک زہر آلود نیزہ میرے بازو میں گھونپ دیا گیا اور مجھے مرنے کے لیے چھوڑ دیا گیا۔

میری بہن کی جان ایک مسلمان خاندان کے گھر میں چھپنے سے بچی۔ میرے والد
قتل ہو گئے۔

اس وقت کے بارے میں سوچ کر آج بھی مجھے ڈراؤنے خواب آتے ہیں۔ آج بھی میں نیند سے کانپ کر اٹھ جاتا ہوں۔

یہ اینٹ اس گھر کی ہے جسے میں چھوڑ کر آیا تھا۔ میں نے یہ اچھے دنوں کو یاد کرنے کے لیے رکھی ہوئی ہے۔ میرے والد اپنا ملک نہیں چھوڑنا چاہتے تھے۔ انہیں اس جگہ سے بے پناہ محبت تھی۔

مجھے یاد ہے کہ ہم نے تیرہ ستمبر 1947کو اپنا گھر چھوڑا تھا۔ اس دن میرا چھٹا جنم دن تھا۔ ہمیں انڈیا کی ٹرین پکڑنے کے لیے چالیس کلومیٹر پیدل چلنا پڑا تھا۔

ٹرین چلنے ہی والی تھی کہ میرے والد نے یہ دیکھتے ہوئے کہ اس میں میرے بھائی کے لیے جگہ نہیں ہے، فیصلہ کیا کہ ’بس بہت ہوا، چلو چلو باہر نکلو‘۔

یہ ان کا آخری لمحے میں کیا ہوا فیصلہ تھا۔ اگلے دن ہمیں پتہ چلا کہ اس ٹرین میں سوار سب لوگوں کو قتل کردیا گیا۔

انیس سو بیالیس میں ’بھارت چھوڑو‘ تحریک کے تحت میں اس گروہ کاحصہ تھا
جس نے ’ایمپیریل ٹبیکو‘ کے سگریٹ قبضے میں لیے تھے۔

ہمارا مقصد برطانوی راج کو تباہ کرنا تھا۔ جب مسلمان ہماری ہندو کالونی پر حملہ کرنے کے لیے آئے تو میں نے ان پر پیٹرول اور کیل سے بھرے بم پھینکے۔ اس سے ہجوم منتشر ہو گیا۔

مجھے اب پچھتاوا ہوتا ہے۔ لیکن ان کو بھگانا بھی ضروری تھا۔ میں نے یہ اپنی حفاظت کے لیے کیا۔

مشرقی پاکستان میں یوم آزادی پر ہم نے انڈیا کا پرچم لہرایا۔ لیکن ہم سے کہا گیا کہ اِس کو اتار دیں۔ تب ہمیں احساس ہوا کہ ہمارا راج ختم ہوگیا ہے۔

تقسیم نے میری زندگی تباہ کر دی۔ انڈیا کبھی بھی پہلے جیسا انڈیا نہیں رہے گا۔

وہ ہمیں مارنے کے لیے جتھوں میں آئے۔ ہم نے سنا کہ وہ عورتوں کو اٹھا کر لے جا رہے تھے۔

میرے چچا کہتے تھے کہ ’ہم اپنی عورتوں کو مار دیں گے اوران غنڈوں سے مرتے دم تک لڑیں گے لیکن کبھی بھی اپنا وطن چھوڑ کر نہیں جائیں گے‘۔ لیکن میری دادی ڈٹ گئیں اور کہنے لگیں کہ عورتوں کو بھی بولنے کا حق ہونا چاہیے۔

وہ ایک بہت بہادر خاتون تھیں۔ انہوں نے گھر کے مردوں کو حکم دیا کہ وہ ہماری جان بخش دیں۔ مردوں نے ان کی بات سنی۔

لیکن انہوں نے مردوں کو بھی ہجرت کرنے کے لیے راضی کرلیا۔

اگست انیس سو سینتالیس تک ہماری تعداد کافی کم ہو چکی تھی۔ آزادی کے دن میں لاہور میں تھا اور میری منزل برطانیہ تھی۔ مجھے یاد ہے لوگ مجھ سے ہاتھ ملا رہے تھے اور کہہ رہے تھے ’شکریہ، ہماری آزادی کا شکریہ‘۔

سٹیشن پر لاشوں کے ڈھیر تھے۔ وہ بہت خوفناک وقت تھا۔ ایک طرف سے ہندوؤں
اور سکھوں کی لاشوں سے بھریہوئی ٹرین آتی تو دوسری طرف سے مسلمانوں کی۔

ہم سب یعنی میرے جیسے لوگ اور برطانوی افسر سمجھتے تھے کہ بٹوارہ بہت جلد بازی میں ہوا ہے۔ یہ کام سوچ سمجھ کر نہیں کیا گیا۔

میرا خیال ہے اس وقت کی برطانوی حکومت وہاں سے جلدی نکلنا چاہتی تھی۔ یہ بہت بڑی غلطی تھی۔

میری دادی کے خاندان نے پاکستان چھوڑنے کا اس وقت فیصلہ کیا جب ان کے مسلمان پڑوسی نے ایک میٹنگ کے بعد آکر یہ بتایا کہ اگلے دن مسلمان انکی بیٹیوں کو لے جائیں گے۔

میری والدہ ہمیشہ اپنے اس پڑوسی کی بات کرتی اور ان کی جان بچانے کے لیے اس شخص کی شکر گزار تھیں۔

تقسیم نے میری والدہ کی ابتدائی زندگی کو بےحد متاثر کیا تھا۔ اور کسی نے کسی طرح میری زندگی کو بھی۔

گھر میں بٹوارے پر بات نہیں ہوسکتی تھی۔ اس موضوع کے ساتھ بہت سے تکلیف جڑی ہوئی تھی۔

ایک ایسے مسلمان کے لیے جس کے خاندان نے انڈیا میں رہنے کا فیصلہ کیا یہ یقیناً اتنا ہی مشکل رہا ہو گا جتنا ان کے لیے جو شہر چھوڑ کر چلے گئے۔

میرے والد کا خاندان پاکستان چلا گیا تھا لیکن میرے والد کے گھر والے تقسیم کے خلاف تھے۔ یہ میری والدہ کے لیے بہت تکلیف دہ رہا ہوگا۔ ان کا اپنے گھر والوں سے پھر کبھی رابطہ نہیں ہوا۔

زخم کا بھرنا بہت اہم ہے۔ یہ زخم بظاہر تو بھر گیا ہے لیکن درد اندر ہی اندر بر صغیر میں اور بیرون ملک آباد ہونے والوں کو کھا رہا ہے۔

یہ حقیقت آج کی بھی ہے۔ میرے نزدیک تقسیم کی بازگشت ہماری روز مرہ زندگی میں موجود ہے۔