جب میں نے اسقاطِ حمل کروایا

فہیمہ صرف 16 برس کی تھیں جب ان کی شادی ان سے 11 برس بڑے شخص سے کر دی گئی۔ وہ ایک قدامت پسند خاندان میں پلی بڑھی تھیں۔ ’میری والدہ کا خیال تھا کہ لڑکیوں کو سیکس یا ماہواری کے بارے میں بتانے کی ضرورت نہیں‘۔
شادی کے بعد وہ اپنے شوہر کے گھر آ گئیں

آغاز سے ہی فہیمہ کو معلوم ہو گیا تھا کہ وہ یہ رشتہ قائم نہیں رکھنا چاہتیں لیکن وہ یہ بات اس خوف سے خاندان والوں کو بتاتے ہوئے ڈرتی تھیں کہ وہ نہیں سمجھیں گے۔
سیکس اور مانع حمل ادویات کے بارے میں نہ جاننے کی وجہ سے فہیمہ فوراً ہی حاملہ ہو گئیں۔
عالمی ادارۂ صحت کے مطابق ترقی پذیر ممالک میں 20 کروڑ خواتین کو جدید مانع حمل ذرائع تک رسائی نہیں اور فہیمہ ان میں سے ایک تھیں۔
انھوں نے اپنے خاوند سے کہا کہ وہ یہ بچہ پیدا کرنا نہیں چاہتیں اور وہ اس سلسلے
میں ان کی مدد کرے۔

آخرِکار وہ ان کی مدد پر تیار ہو گیا۔ ایران میں اسقاظ حمل غیرقانونی ہے تاوقتیکہ حمل ماں کی جان کے لیے خطرہ ہو یا پیدا ہونے والا بچہ معذور یا مہلک بیماری کا شکار ہو
اسقاطِ حمل کی گولی ایران میں دستیاب نہیں اس لیے فہیمہ کے شوہر نے بلیک مارکیٹ سے ہارمونز کے انجکشنز خریدے۔ پھر یہ جوڑا ایک دائی کے پاس گیا جو یہ انجکشن لگانے کو تیار تھی۔
فہیمہ کو ایک سیلن زندہ تہہ خانے میں ایک گندے صوفے پر لٹایا گیا۔ دائی نے انھیں کہا تھا کہ اسقاط میں مدد کے لیے وہ گھر پر وزنی اشیا اٹھائیں لیکن اس نے خبردار بھی کیا تھا کہ عین ممکن ہے کہ یہ عمل کامیاب نہ ہو۔

چند گھنٹے بعد فہیمہ کی طبیعت خراب ہونے لگی جیسے کسی نے انھیں زہر دے دیا ہو۔ انھیں چکر آنے لگے اور انھیں ہسپتال لے جایا گیا اور ان کے والدین کو بلا لیا گیا۔ یہ جان کر کہ ان کی بیٹی اسقاطِ حمل کی کوشش کر رہی تھی وہ فہیمہ کو اپنے ساتھ لے گئے اور اس کے خاوند سے کہا کہ وہ اپنی اہلیہ سے رابطہ نہ کرے

فہیمہ کے والدین انھیں ایک گائناکالوجسٹ کے پاس لے گئے۔ ڈاکٹر نے انھیں بتایا کہ انجکشنز نے ممکنہ طور پر بیضہ دانی کو متاثر کیا ہے اور اس نے اسقاط کا مشورہ دیا۔ تاہم فہیمہ کی والدہ نے یہ کہتے ہوئے انکار کر دیا کہ یہ گناہ ہے۔ فہیمہ کے پاس بچہ رکھنے کے سوا کوئی چارہ نہ تھا اور انھیں واپس اپنے شوہر کے گھر بھیج دیا گیا۔

فہیمہ کا بیٹا پھیپھڑوں کی بیماری کے ساتھ پیدا ہوا اور پھر اسے مرگی کے دورے پڑنے لگے۔ دو برس بعد فہیمہ کے شوہر نے اسے چھوڑ دیا اور وہ اپنے بیٹے کو پالنے کے لیے تنہا رہ گئی۔

مہبود کہتے ہیں ’یہ سب میرا قصور ہے۔ ایک سادہ سی بھول‘۔
ان کی آواز میں پچھتاوا واضح تھا۔ سات برس قبل وہ ڈاکٹر بن رہے تھے اور ان کی منگنی کی بات چل رہی تھی۔
ان کا کہنا ہے کہ انھوں نے اپنی ساتھی کی ماہواری سے متعلق غلط اندازہ لگایا اور وہ حاملہ ہو گئی۔ چونکہ وہ میڈیکل کے طالبعلم تھے اس لیے وہ ایسے لوگوں کو جانتے تھے جو کہ غیرقانونی طور پر اسقاطِ حمل میں استعمال ہونے والے انجکشن فروخت کرتے تھے۔
مہبود نے خود ہی یہ انجیکشن لگائے۔

سخت تکلیف اور خون بہنے کے باوجود اسقاطِ حمل کی کوشش ناکام ہوئی اور مہبود نے مدد مانگی تو انھیں قریب ہی گاؤں میں موجود ایک ڈاکٹر کا بتایا گیا جو انھیں اس کام کے لیے گولیاں دے سکتا تھا۔ مہبود کی ساتھی ناقابل برداشت تکلیف سہہ رہی
تھی اور بہت زیادہ دباؤ میں تھی۔
ایران میں شادی سے قبل سیکس ممنوع ہے اور چونکہ وہ دونوں شادی کی منصوبہ بندی کر رہے تھے اس لیے یہ حمل ان کے لیے مشکلات کا باعث بن سکتا تھا۔

ڈاکٹر نے کچھ گولیاں لکھ دیں اور انھیں بھیج دیا۔ مہبود کو یاد ہے کہ ’دوا فروش مجھ سے بار بار پوچھتا رہا کہ یہ دوا کس نے تجویز کی تھی اور کیوں‘۔ مہبود اور ان کی ساتھی اس وقت بھی اپنے والدین کے ساتھ رہتے تھے۔ گولیاں لینے کے بعد وہ گھر نہیں جا سکتے تھے۔ اس کی بجائے انھوں نے کئی گھنٹے باہرگزارے تاکہ اسقاط کا عمل شروع ہو۔

سات گھنٹے بعد آخرکار یہ عمل پورا ہو گیا۔ مہبود کہتے ہیں کہ اس تجربے سے انھیں اندازہ ہوا کہ اسقاطِ حمل کتنا خطرناک ہو سکتا ہے اور کتنا اہم ہے کہ یہ عمل محفوظ طریقے سے اور ماہرین کی زیرِ نگرانی سرانجام دیا جائے۔

تم حاملہ ہو۔ اس مختصر جملے سے میری تو دنیا ہی گھوم کر رہ گئی۔ زہرہ یاد کرتی ہیں۔ وہ ایک بالکل مختلف وجہ سے سکین کروانے گئی تھیں۔ وہ شادی شدہ نہیں تھیں اور اس حمل کے ان کے لیے ایران میں خطرناک نتائج برآمد ہو سکتے تھے۔ ان کے دماغ میں لاکھوں سوال گردش کرنے لگے۔

ڈاکٹر پر یہ واضح تھا کہ زہرا کو دھچکا لگا ہے۔ اس نے انھیں کہا کہ وہ پریشان نہ ہوں۔ اس نے تفصیلات بتائے بغیر کہا کہ ’یہاں سے باہر بہت سے ایسے ڈاکٹر ہیں جو تمھارے لیے اس کا خیال کریں گے۔‘

زہرا اپنے حمل کو جلد ازجلد ختم کروانا چاہتی تھیں۔ وہ ایک مڈ وائف کے پاس گئیں جس کےبارے میں انھیں معلوم تھا کہ وہ غیر قانونی اسقاطِ حمل کرتی ہے۔
زہرہ کیونکہ چھ ہفتوں کی حاملہ تھی اس لیے دائی نے اس کے لیے سرجری کے ذریعے اسقاط تجویز کیا اور اگلے دن ہی اسے بلا لیا۔

جب زہرہ اپنے مقررہ وقت سے تھوڑی دیر پہلے وہاں پہنچیں تو مڈ وائف کی معاون نے انھیں کہا کہ اس سے پہلے کہ تمھیں کوئی دیکھ لے جلدی سے آجاؤ۔ انھیں کہا گیا کہ وہ تمام وقت خاموشی اختیار کریں۔ اسقاطِ حمل ایک ایسے مقام پر ہوا جو شاید عارضی طور پر اس کام کے لیے بنایا گیا تھا۔

ایک ہفتے بعد زہرہ نے دوبارہ سکین کروایا تاکہ اس بات کی تسلی کر لیں کہ سب کچھ ٹھیک ہوا ہے تو وہ حیران رہ گئیں کیونکہ ان کے رحم میں اب بھی جنین موجود تھا۔

وہ بتاتی ہیں ’میں دوبارہ مڈ وائف کے پاس گئی۔ اس نے مجھے اسقاطِ حمل کی گولیاں دیں اور کام ہو گیا‘۔

حقیقت یہ ہے کہ میں بہت پریشان تھیں کہ لوگ جان لیں گے کہ میں نےجلد بازی کی ہے۔ مجھے معیاری اور پیشہ ورانہ مشورہ نہیںدیا گیا تھا‘۔

زہرہ سمجھتی ہیں کہ ابتدا میں ہی اسقاط گولیوں کے ذریعے ہو سکتا تھا اور لوگوں نے انھیں آسان ہدف جان کر فائدہ اٹھایا۔

زہرہ کہتی ہیں کہ مڈ وائف نے انھیں کبھی بھی یہ مشورہ نہیں دیا کہ وہ گولی کھا لے اور آپریشن گولیوں کے مقابلے میں دس گنا مہنگا تھا۔ وہ کہتی ہیں کہ مڈ وائف تو بس کاروبار کر رہی تھی۔

غیر شادی شدہ خواتین کے حاملہ ہونے سے جڑی بدنامی کی وجہ سے وہاپنی زندگی کو خطرے میں ڈالنے کے لیے تیار ہوتی ہیں۔ عالمی ادارۂ صحت کا کہنا ہے کہ محفوظ طریقے سے اور قانونی طور پر اسقاطِ حمل کے لیے رسائی نہ ہونا زچگی کے دوران موت کی ایک بڑی وجہ ہے۔