سی 17: افغانوں کو ملک سے بحفاظت نکالنے کی ڈیوٹی پر مامور ملٹری طیارہ
،تصویر کا ذریعہUS Air Mobility Command
15 اگست کو جب طالبان افغان دارالحکومت کابل میں داخل ہوئے تو امریکی فضائیہ کے ایک طیارے نے 823 افغان شہریوں کو جن میں 183 بچے بھی شامل تھے، بحفاظت وہاں سے نکال لیا۔
یہ تعداد بوئنگ سی 17 گلوب ماسٹر تھری کے لیے ایک ریکارڈ تھا، چار انجن والا یہ ٹرانسپورٹ طیارہ حامد کرزئی ایئرپورٹ سے لوگوں کو لے جانے میں مرکزی کردار ادا کر رہا ہے۔
80 کی دہائی میں تیار کیا گیا یہ طیارہ پہلی بار 90 کی دہائی میں اڑایا گیا تھا اور اب سے اسے دنیا بھر کے ممالک میں فوجیوں، سازو سامان اور بعض اوقات خطرے میں گھرے لوگوں کو ایک جگہ سے دوسری جگہ منتقل کرنے کے لیے استعمال کیا جاتا ہے۔
ایک افغان خاتون نے اتوار کو سی 17 طیارے پر ایک بچی کو جنم بھی دیا ہے۔ جب وہ جرمنی کے رامسٹین ایئر بیس کی طرف جا رہی تھی تو انھیں در زہ شروع ہوا اور طبی عملے نے طیارے کے لینڈ کرنے کے بعد سامان رکھنے والے حصے میں بچی کی ڈلیوری میں مدد کی۔
،تصویر کا ذریعہGetty Images
،تصویر کا ذریعہEPA
امریکی فضائیہ کی اس طیارے سے متعلق فیکٹ شیٹ کے مطابق اس پر 77 ہزار پانچ سو 19 کلوگرام وزن لادا جاسکتا ہے۔
بکتر بند گاڑیاں، لاریاں اور یہاں تک کہ ایم 1 ابرامس جنگی ٹینک بھی اس طیارے پر سوار ہو سکتے ہیں۔
یہ بھی پڑھیے
End of سب سے زیادہ پڑھی جانے والی
اس طیارے کا عملہ تین افراد پر مبنی ہوتا ہے، جس میں دو پائلٹ اور ایک ’لوڈ ماسٹر‘ شامل ہوتا ہے۔ سامان کو طیارے کے عقبی حصے میں کارگو ریمپ کے ذریعے لادا جاتا ہے۔
خلیجی ریاستوں نے امریکہ اور دیگر ممالک کی پروازوں کو انخلا کے عمل کے دوران اپنے فضائی اڈے استعمال کرنے کی اجازت دی ہے۔
،تصویر کا ذریعہGetty Images
امریکہ کو جمعہ کے روز اپنی انخلا کی پروازوں کو تھوڑے عرصے کے لیے اُس وقت روکنا پڑا تھا جب قطر کے دارالحکومت دوحہ میں ان کی پروسیسنگ کی سہولیات بڑی تعداد میں آنے والوں کی وجہ سے دباؤ کا شکار ہو گئی تھی۔
برطانیہ نے طویل مدتی منصوبے کے تحت 20 ہزار افغان مہاجرین کو پناہ دینے کا وعدہ کیا ہے اور کینیڈا نے بھی اتنی ہی تعداد میں لوگوں کو پناہ دینے کے منصوبے کا اعلان کیا ہے۔
تاہم امریکہ اور جرمنی سمیت کئی دیگر ممالک نے ابھی یہ نہیں بتایا کہ وہ کتنے مہاجرین کو پناہ دیں گے۔
حکام انخلا کے عمل کو تیز کرنے کی کوشش کر رہے ہیں۔ اتوار کو پینٹاگون کے ایک بیان میں کہا گیا تھا کہ حکومت 18 کمرشل طیارے استعمال کرے گی تاکہ لوگوں کو ملک سے باہر منتقل کیا جا سکے۔
