رانچی ٹیسٹ: آسٹریلیا کے 451 رنز، انڈیا کا محتاط جواب
،تصویر کا ذریعہReuters
آسٹریلیا اور انڈیا کے درمیان چار کرکٹ ٹیسٹ میچوں کی سیریز کے تیسرے ٹیسٹ میچ کے دوسرے روز کھیل کے اختتام تک انڈيا نے مہمان ٹیم کی پہلی اننگز کے 451 رنوں کے جواب میں اپنی پہلی اننگز میں ایک وکٹ کے نقصان پر 120 رنز بنا لیے ہیں۔
انڈیا کی جانب سے آوٹ ہونے والے کھلاڑی اوپنر کے ایل راہل تھے جو کہ اپنی نصف سنچری مکمل کرنے کے بعد 67 رنز پر آوٹ ہوئے۔
دوسرے دن کھیل کے اختتام کے وقت مرلی وجے 42 اور پجارا 10 رنز کے ساتھ کریز پر موجود تھے۔
رانچی میں کھیلے جارہے ٹیسٹ میچ کے پہلے دن آسٹریلیا نے ٹاس جیت کر پہلے بیٹنگ کا فیصلہ کیا تھا۔
جمعے کی دوپہر بعد آسٹریلیا کی پوری ٹیم 451 رن بنا کر آؤٹ ہوگئی۔ کپتان سمتھ نے 176 رن سکور کیے اور وہ آخر تک آؤٹ نہیں ہوئے۔ انھوں نے 361 گیندوں کا سامنا کیا اور 17 چوکے لگائے۔
بلے باز گلین میکسویل نے بھی ٹیسٹ میچوں کی اپنی پہلی سنچری مکمل کی اور نو چوکوں اور دو چھکّوں کی مدد سے 104 رن سکور کیے۔
انڈيا کی جانب سے اجے جڈیجا نے پانچ وکٹیں حاصل کیں جبکہ اومیش یادو نے تین کھلاڑیوں کو آؤٹ کیا۔
End of سب سے زیادہ پڑھی جانے والی
جمعرات کو جب پہلے دن کا کھیل ختم ہوا تھا تو سمتھ 117 اور گلین میکسویل 82 رنز کے ساتھ کریز پر موجود تھے۔
سمتھ نے اپنا 53واں ٹیسٹ میچ کھیلتے ہوئے اپنے 5000 ٹیسٹ رنز بھی مکمل کیے۔
،تصویر کا ذریعہReuters
رانچی ٹیسٹ کے لیے آسٹریلیا کی ٹیم میں زخمی ہونے والے بولر مچل سٹارک کی جگہ بیٹ کمنز کو شامل کیا گیا ہے جو پانچ سال کے وقفے کے بعد اپنا دوسرا ٹیسٹ میچ کلھیل رہے جبکہ انڈیا کی ٹیم میں اوپنر وجے مرلی کی واپسی ہوئی ہے۔
واضح رہے کہ دونوں ٹیموں کے درمیان جاری چار ٹیسٹ میچوں کی سیریز ایک، ایک سے برابر ہے۔
پونے میں کھیلے جانے والے پہلے کرکٹ ٹیسٹ میچ میں آسٹریلیا نے انڈیا کو 333 رنز کے بڑے مارجن سے شکست دی تھی جبکہ بنگلور ٹیسٹ میں انڈیا نے 75 رنز سے فتح حاصل کر کے سیریز ایک،ایک سے برابر کر دی تھی۔
