پاک ٹی ہاؤس دوبارہ آباد کرنے کی تیاریاں

پاک ٹی ہاؤس کو سنہ دو ہزار میں اس کے مالک نے مالی مسائل کے باعث بند کردیا تھا

صوبہ پنجاب کے دارالحکومت لاہور کی ضلعی حکومت شاعروں اور ادیبوں کے معروف اور پرانی بیٹھک یعنی پاک ٹی ہاؤس کو بارہ برس کے بعد دوبارہ کھولنے کی تیاریوں میں مصروف ہے۔

سٹی ڈسٹرکٹ گورنمنٹ لاہور کے مطابق پاک ٹی ہاؤس کو پچیس اکتوبر کو کھول دیا جائےگا۔

بی بی سی کے نامہ نگار کے مطابق مال روڈ پر واقع پاک ٹی ہاؤس کو سنہ دو ہزار میں اس کے مالک نے مالی مسائل کے باعث بند کردیا تھا۔ تاہم پنجاب حکومت نے اسے دوبارہ کھولنے کا فیصلہ کیا اور اس کی ذمہ داری ضلعی حکومت کے سپرد کی گئی۔

پاک ٹی ہاؤس آنے والی شخصیات میں انتظار حسین، احسان دانش ، حبیب جالب، قتیل شفائی، سلیم شاہد، یونس ادیب ، احمد راہی،اشفاق احمد ،احمد ندیم قاسمی، امجد اسلام امجد، سید اصغر ندیم سید نمایاں ہیں۔

سٹی ڈسٹرکٹ گورنمنٹ کے ترجمان طارق زمان نے بی بی سی کو بتایا کہ پاک ٹی ہاؤس کو بحال کرنے کا کام ضلعی حکومت نے اس سال اپریل میں شروع کیا تھا اور اب تیاریاں آخری مراحل میں ہیں۔

’پاک ٹی ہاؤس کی بحالی پر لگ بھگ پینتیس لاکھ روپے کی لاگت آئی ہے اور اس دو منزلہ عمارت میں ایک ہی وقت میں ساٹھ سے ستر افراد کے بیٹھنے کی گنجائش ہے۔‘

ضعلی حکومت کے ترجمان نے بتایا کہ پاک ٹی ہاؤس کو دوبارہ کھولنے کے لیے ینگ مین کرسچن ایسوسی ایشن یعنی وائی ایم سی اے کی انتظامیہ اور سٹی ڈسٹرکٹ گورنمنٹ کے درمیان معاہدہ ہوا ہے۔ اس معاہدے کے تحت بغیر کسی معاوضے کے اس عمارت کو دس سال کی لیز پر حاصل کیا گیا ہے جہاں پر پاک ٹی ہاؤس قائم تھا۔

ترجمان طارق زمان نے یہ بھی بتایا کہ پاک ٹی ہاؤس صبح سات بجے سے شام غروب آفتاب تک کھلا رہے گا اور یہاں چائے اور کھانے پینے کی اشیاء دستیاب ہوں گی۔

معروف ادیب ڈاکٹر یونس جاوید نے پاک ٹی ہاؤس کے دوبارہ کھلنے پر خوشی کا اظہار کیا۔ ان کا کہنا ہے کہ پاک ٹی ہاؤس آدمی سے آدمی کا رشتہ جوڑنے اور مکالمے کا ذریعے تھا اور اب کی اس کی بحالی کے بعد ادیبوں اور شاعروں کو شہر کے وسط میں اکٹھا ہونے کی ایک بہتر سہولت مل جائے گی۔