ہلاک ہونے والوں میں سات کا تعلق حافظ گل بہادر کے گروپ سے ہے اور تین پنجابی طالبان ہیں
پاکستان کے قبائلی علاقے شمالی وزیرستان کی انتظامیہ کے مطابق اتوار کے روز دو امریکی ڈرون حملوں میں کُل دس افراد ہلاک ہوئے ہیں۔
شمالی وزیرستان کی انتظامیہ کے مطابق ہفتے کے روز دونوں حملے شمالی وزیرستان کے صدر مقام میرانشاہ سے ساٹھ کلومیٹر کے فاصلے پر واقع شوال میں کیے گئے۔
انتظامیہ کا کہنا ہے کہ پہلا حملہ میرانشاہ سے شوال کی جانب جانے والی ایک گاڑی پر کیا گیا۔ انتظامیہ کے بقول امریکی ڈرون نے گاڑی پر میزائل داغے جس کے نتیجے میں سات افراد ہلاک ہوئے۔
ہلاک ہونے والوں کا تعلق کمانڈر حافظ گل بہادر کے گروپ سے تھا۔
اس حملے کے چند گھنٹے بعد ہی امریکی ڈرون نے شوال ہی میں ایک مکان کو نشانہ بنایا۔ اس حملے میں تین افراد ہلاک ہوئے۔
مقامی افراد کا کہنا ہے کہ ہلاک ہونے والے پنجابی طالبان ہیں۔
یاد رہے کہ سنیچر کو شمالی وزیرستان میں عیدالفطر کے موقع پر امریکی جاسوس طیارے کے حملے میں چھ شدت پسند ہلاک ہوئے تھے جن کا تعلق حافظ گل بہادر گروپ سے تھا۔
شمالی وزیرستان میں مقامی انتظامیہ کے ایک اہلکار نے بی بی سی کو بتایا کہ ڈرون حملہ صدر مقام میرانشاہ سے ساٹھ کلومیٹر دور تحصیل شوال کے علاقے شوئی دار غر میں ایک مکان پر کیا گیا۔ اس حملے کے نتیجے میں چھ شدت پسند ہلاک ہوئے ہیں۔
