وسعت اللہ خان

محمد عبدالرحمٰان دہشت گرد اپنے قبیلے کو خانہ بدوشی سے نجات دلائے بغیر مر گیا۔

جیسا کہ میں نے کہا کہ محمد عبدالرحمٰان کا تعلق خانہ بدوش قبیلے سے تھا۔ لیکن یہ ویسے خانہ بدوش نہیں تھے جو ناچ گا کر یا چوری چکاری کے ذریعے یا سرکس میں کرتب دکھا کر یا پھر بھیک پر گزارہ کرتے ہیں۔ بلکہ یہ قبیلہ تو ان لوگوں پر مشتمل تھا جو ایک نسل پہلے تک اپنے کچے پکے مکانوں میں رہتے تھے۔کھیتی باڑی کرتے تھے اور شام کو ٹانگیں پسار کر حقہ گڑگڑاتے ہوئے فراغت کے مزے لوٹتے تھے۔

بس ایک دن مغرب کی سمت سے ایسی آندھی آئی کہ گھروں کی چھتوں سے لے کر دستار تک سب ہی کچھ اڑا کر لے گئی۔ محمد عبدالرحمٰان کا قبیلہ اسی طرح بیابانوں کی خاک چاٹنے پر مجبور ہوا جس طرح ڈھائی ہزار برس پہلے کسی فرعون نے بنی اسرائیل کو بیابان میں ہنکال دیا تھا۔ بنی اسرائیل کی طرح محمد عبدالرحمٰان کا قبیلہ بھی ایک جگہ سے چپت پڑنے پر دوسری جگہ، دوسری جگہ سے لات کھانے کے بعد تیسری جگہ اور تیسری جگہ سے ذلیل ہونے کے بعد جگہ پر جگہ بدلتا رہا۔ کوئی ہم نسل ممیرا چچیرا محمد عبدالرحمٰان کے قبیلے کو مستقل اپنے علاقے میں برداشت کرنے پر آمادہ نہیں تھا۔

ایک دن محمد عبدالرحمٰان نے سوچا کہ دو ہی راستے ہیں۔ یا تو بنی اسرائیل کی طرح ڈھائی ہزار برس تک مستقل خانہ بدوشی کی ذلت برداشت کی جائے اور کسی ایسے تاریخی حادثے یا لمحے کا منتظر رہا جائے کہ جب یہ خانہ بدوشی ختم ہو۔ یا پھر خم ٹھونک کر بندوق اٹھا کر حق طلب کیا جائے۔

محمد عبدالرحمٰان نے اپنے پانچ سات قریبی دوستوں کو جمع کرکے پوچھا کہ دونوں میں سے کونسا راستہ اختیار کیا جائے۔سب نے کہا جیسے آپ کہو۔

محمد عبدالرحمٰان نے کہا ایک بار پھر سوچ لو۔ بندوق کا راستہ روپوشی، مار، موت اور ذلت کی ایسی راہ سے گزرتا ہے جہاں سایہ بھی کبھی کبھی اپنا نہیں رہتا۔ تمھارا کوئی ہم نسل قبیلہ مدد کو نہیں آئے گا۔ سارا بوجھ خود اٹھانا پڑے گا۔ ہو سکتا ہے کہ جن کے لیے تم بندوق اٹھاؤ وہی ایک دن مایوس ہو کر منہ پر گالیاں دیں۔ محمد عبدالرحمٰان کے دوستوں نے کہا جیسے تم کہو۔

پچھلے ہفتے محمد عبدالرحمٰان دہشت گرد اپنے قبیلے کو خانہ بدوشی سے نجات دلائے بغیر مر گیا۔ لیکن جاتے جاتے وہ ایک کام کر گیا کہ اپنی قبر اس علاقے میں بنوا گیا جہاں سے اسکے قبیلے کو نکالا گیا تھا۔

خانہ بدوشوں کو ایک نشانِ ملکیت درکار ہوتا ہے اپنی جگہ دوبارہ بسنے کے لیے۔ محمد عبدالرحمٰان دہشت گرد کے دشمن نے جانے انجانے میں یہ نشانِ ملکیت اسکے قبیلے کو فراہم کرکے وہ کام کردیا ہے جو محمد عبدالرحمٰان عبدالرؤف عرفات القدوی الحسینی سے جیتے جی نہ ہو سکا۔