عنبر خیری بی بی سی اردو ڈاٹ کام

عدم اعتماد کی تحریک نے بے نظیر کی حکومت کو ہلا کر رکھ دیا

پندرہ برس پہلے اس روز پارلیمان میں بے نظیر بھٹو کی دس ماہ کی حکومت کے خلاف ایک عدم اعتماد کی تحریک پیش ہونے کے بعد اس پر ووٹنگ ہوئی۔

یہ پاکستان کی تاریخ میں ایک منتخب وزیر اعظم کے خلاف پہلا ایسا ووٹ تھا۔

یہ پاکستان کی تاریخ میں ایک منتخب وزیر اعظم کے خلاف پہلا ایسا ووٹ تھا۔

لیکن یہ صرف ایک پارلیمانی کارروائی نہیں تھی۔ انیس سو اناسی کے اس ڈرامے میں متعدد کردار اور قوتیں شامل تھیں۔ یہ تحریک چھبیس اکتوبر کو مخلوط اپوزیشن یعنی کمبائنڈ آپوزیشن پارٹی(سی او پی) کی طرف سے پیش کی گئی اور ووٹ کے مرحلے تک حکومت اور اپوزیشن کے درمیان ایک عجیب مقابلہ شروع ہوا۔

ممبران پارلیمان کی ’حفاظت‘
حکومت اور اپوزیشن نے اپنے اپنے ممبرانِ پارلیمان کو ’محفوظ‘ کرنے کے لیے ان کو مخصوص مقامات پر منتقل کر دیا۔ حزب اختلاف کے ارکان کو یا تو اکبر بگٹی کی نگرانی میں بلوچستان ہاؤس اسلام آباد میں رکھا گیا یا پھر مری لے جایا گیا جو کہ اسلام آباد کے نزدیک بھی تھا اور اس صوبے کا حصہ بھی جس میں حکومت پیپلز پارٹی کی نہیں بلکہ بے نظیر کے حریف نواز شریف کی جماعت مسلم لیگ کی تھی۔

اس وقت پنجاب میں نواز شریف کی حکومت

اس پورے معاملے کو پاکستان کی سیاسی تاریخ کا ایک اہم موڑ اس لیے کہا جا سکتا ہے کہ اس کے دوران پیپلز پارٹی اور فوج یا سول ’اسٹیبلِشمنٹ‘ کے درمیان تضاد صاف ظاہر ہو گیا۔

کچھ دن بعد یہ بھی معلوم ہوا کہ ملک کا ایک خفیہ ادارہ آئی ایس آئی اس تحریک کے پیچھے تھا ۔ فوج کے سربراہ جنرل اسلم بیگ نے اس کارروائی سے لاتعلقی کا اظہار کیا لیکن اس میں ملوث آئی ایس آئی کے دو افسران بریگیڈیر امتیاز اور میجر عامر کو فوج سے نکال دیا۔

اس وقت کے اخبارات اور سیاسی مبصرین کے مطابق حزب اختلاف کی اس تحریک کے بارے میں صدر غلام اسحاق خان کو علم تھا۔ صدر اور وزیر اعظم کے درمیان اختلافات پائے جاتے تھے ۔ سی او پی کے کئی رہنماؤں نے یہ عندیہ دیا کہ ان کو صدر کی پوری حمایت ہے۔ بقول صحافی زاہد حسین کے ’یہ تحریک اس لیے اس وقت پیش کی گئی تھی کہ مارچ 1990 میں آٹھویں ترمیم کے تحت صدر کے وزیر اعظم کو نامزد کرنے کا اختیار ختم ہونا تھا۔‘

1988 کے انتخابات جنرل ضیا کے گیارہ سال کی حکمرانی کے بعد ہوئے تھے اور اس نئے جمہوری دور کے ابتداء کے کچھ ہی ماہ کے بعد اس تحریک نے حکومت کو چونکا دیا۔

ہارس ٹریڈنگ
یکم نومبر کے ووٹ سے پہلے کی صورتحال ایک جنگ کی شکل اختیار کر گئی اور ارکانِ پارلیمان کو جس طرح سے خریدا گیا اس کی شاید ہی کوئی مثال ملے۔ پاکستان میں ’ہارس ٹریڈنگ‘ اس وقت سے سیاست کا ایک عام فہم لفظ بن گیا جس کا مطلب سیاستدانوں کو وعدوں اور پیسوں کے ذریعے خریدنا تھا۔

یکم نومبر کے ووٹ سے پہلے کی صورتحال ایک جنگ کی شکل اختیار کر گئی اور ممبران پارلیمان کو جس طرح سے خریدا گیا اس کی شاید ہی کوئی مثال ملے۔

تعجب کی بات تو یہ ہے کہ آئی ایس آئی کی اس کارروائی کی تفصیل بعد میں منظر عام پر آگئی لیکن اب شاید سب اس کو بھول چکے ہیں۔ اس خفیہ ادارے کے افسران اپنے ہی ملک کی حکومت کا تختہ الٹنے کی سازش میں ملوث تھے اور اس پر انہوں نے لاکھوں بلکہ کروڑوں روپے لگائے۔ نہ صرف یہ بلکہ بعد میں نواز شریف نے بریگیڈیر امتیاز کو خفیہ ادارے آیی بی کا سربراہ بنا دیا۔

آپریشن مِڈ نائٹ جیکلز
1989 کے اس پورے ڈرامے کا ایک اور حیران کُن باب ’آپریشن مِڈنائٹ جیکلز‘ نامی خفیہ آپریشن کے انکشاف کا ہے۔ آپریشن مِڈ نائٹ جیکلز کے تحت حکومت کے ارکان کو خریدنے کی کوشش کی گئی۔ حکومت کے ایک ایم این اے محمد عارف اعوان نے حزب اختلاف اور آئی ایس آئی کے افراد کے ساتھ اپنی کئی ملاقاتوں کے دوران ہونے والی بات چیت کو ٹیپ کیا تھا۔ ان ٹیپوں پر ان کو اور ان کے دو ساتھیوں کو حکومت کے خلاف ووٹ دینے کے لیے پچاس لاکھ روپے کی پیشکش کی گئی تھی۔

بے نظیر بھٹو کی پارٹی کے رکن اور سابق وزیر داخلہ جنرل نصیر اللہ خان بابر نے بتایا کہ اس موقع پر آّڈیو اور ویڈیو ٹیپ دونوں بنائی گئی اور انہوں نے پھر فوج سے جا کر اس پر بات کی اور انہیں کہا کہ وہ ان فوجی افسروں کے بارے میں فیصلہ کریں۔ فوج نے ان دونوں کو جبری ریٹائر کر دیا۔

یہ انکشافات نواز شریف کے دور میں سامنے آئے اور ان کی سنسنی خیز اور حیران کن ہونے کے باوجود ان کو زیادہ توجہ نہ مل سکی۔ روزنامہ ’دی نیوز‘ اور ماہ نامہ ’نیوزلائن‘ میں انیس سو اکیانوے میں چھپنے والی یہ رپورٹیں ہماری سیاسی یاد داشت کا حصہ نہ بن سکیں۔

اسی دور میں تحریک استقلال کے سربراہ ائیر مارشل اصغر خان کے اس سلسلے میں سپریم کورٹ کو لکھے ہوئے ایک خط کے نتیجے میں چلنے والے ایک کیس میں آئی ایس آئی کی سیاسی سرگرمیوں کے بارے میں بہت معلومات حاصل ہوئیں جس سے یہ بھی معلوم ہوا کہ اس خفیہ ایجنسی نے 1990 کے انتخابات میں نہ صرف ’اسلامی جمہوری اتحاد‘ (آئی جے آئی) قائم کی بلکہ اس کو رقم بھی فراہم کرتی رہی اور انتخابی مہم میں پیپلز پارٹی کے خلاف آئی جے آئی کی منصوبہ بندی میں بھی سر گرم رہی۔

آج پندرہ برس بعد پاکستان میں پارلیمانی جمہوریت کا عمل ایک پتلی تماشہ لگنے لگا ہے۔ ایک فوجی صدر نے ’کِنگز پارٹی‘ قائم کر کے جمہویت کے روپ میں پارلیمان سے اپنا ہر کام ’جمہوری طریقے ‘ سے کروا لیے ہیں۔ ملک کی اسٹیبلِشمنٹ اب بھی سیاستدانوں کو بدنام اور چھوٹے انسان ثابت کرنے کی کوشش کرتی ہے۔

یکم نومبر 1989 کے واقعات ہمیں کہاں سے کہاں لے آئے ہیں۔ صحافی عامر احمد خان کا کہنا ہے کہ اس سارے مرحلے میں بے نظیر بھٹو کی کارکردگی اس لیے بہت مایوس کن رہی کہ بجائے اس کے کہ وہ جمہوری اور سیاسی طریقے سے ملک کی غیر جمہوری قوتوں سے نمٹتیں انہوں نے انہیں قوتوں کے طریقے اپنا لیے۔

اسامہ کی حمایت؟
عدم اعتماد کی اس تحریک کے بارے میں ایک اور دلچسپ دعویٰ سابق وزیِر اعظم بے نظیر بھٹو نے کئی مرتبہ کیا ہے کہ اس کارروائی میں ان کے خلاف استعمال ہونے والی رقم کا بڑا حصہ اسامہ بن لادن کی طرف سے آیا تھا کیونکہ
وہ ایک عورت کے وزیر اعظم بننے کے سخت مخالف تھے۔ اس دعوے کی کبھی تصدیق نہیں ہوئی ہے لیکن اس الزام سے سے بھی آئی ایس آئی اور سخت گیر مذہبی تنظیموں کے درمیان تعلقات کے بارے میں سوال پیدا ہوتا ہے۔