سنجیو شری واستو نامہ نگار، بی بی سی، دلی

لالو پرساد یادو بجٹ پیش کرنے جاترے ہوئے

جی ہاں، اب ہندوستانی ریل میں کوک، پیپسی اور منرل واٹر یعنی معدنی پانی کی بجائے لسی کو ذیادہ ترجیح دی جائےگی۔

نا حادثات کی زیادہ بات چیت، نہ ریل گاڑیوں میں لوٹ مار کی، اور نا ہی وقت کی پابندی کی۔ ہاں اتنا اعلان ضرور کیا گیا ہے، کہ بھارتی ریل کو دنیا کی بہتر، جی نہیں سب سے ذیادہ بہتر سفر کی سواری بنا دیا جائے گا۔

ریل بجٹ کیا ہے شگوفوں کا پلندہ ہے،وعدوں کی ایک ایسی لمبی فہرست، جیسے سنہرے خوابوں کی نہ ختم ہونے والی رات، نا کوئی حیران ہے اور نا ہی پریشان۔

ہندوستانی سیاست میں سب سے مشہور اور کامیاب ساحروں میں سے ایک لالو پرساد یادو کے پٹارے سے اس سے مختلف ریل بجٹ کی کسی کو امید بھی نہیں تھی۔

ہاں لالو نے اپنے مسخرے پن، لسی، اور کھادی کی باتوں کے ساتھ ساتھ اپنے خاص حلقۂ انتخاب یا پچھڑے اور غریب ان لوگوں کا ساتھ اپنے پہلے ریل بجٹ میں بھی نہیں چھوڑا جن کا ایک طویل عرصے سے استحصال ہوتارہا ہے یا جنہیں فراموش کیا جاتا رہا ہے۔
قلیوں کی بیویوں کا ریزرویشن اور ٹکٹ اب مفت ہوگا، ریلوے ملازمت میں پچھڑے طبقے کے لوگوں کا ریزرویشن کوٹا جو کئی برسوں سے خالی پڑا ہوا ہے اسے ایک مہم کے تحت اب پر کیا جائےگا اور ملازمت کے لیے انٹرویو دینے جانے والے لوگوں کو ریل ٹکٹ مفت فراہم کرایا جائےگا وغیرہ وغیرہ

تقریبا پندرہ سال سے ہندوستان کے ۔۔۔۔ سوٹڈ بوٹڈ متوسط درجے کے رئیسوں اور اعلیٰ ذاتوں کی آنکھوں میں کھٹک رہے لالو پرساد یادو اپنے تمام ناقدین سے بے پروا ہندوستان کے سب سے پسماندہ غریب اور لاقانونیت کا شکار ریاست بہار پر ایسے حکومت کر رہے ہیں کہ گزرے ہوئے زمانے کے راجا مہاراجہ اپنی جاگیریں کیا چلاتے ہونگے۔

پہلے تو وہ خود ہی بہار کے وزیراعلیٰ تھے پھر چارہ گھوٹالے یعنی جانوروں کے چارے بدعنوانی کے معاملے اور پولس مقدمے کے سبب انہوں نے اپنی بیگم رابڑی دیوی کو بہار کا اقتدار سونپ دیا اور اب عالم یہ ہے کہ اگر لالو بہار کے نمبر ون کے رہنما ہیں توان کی بیگم نمبر دو پر آتی ہیں۔

بجٹ اور امیدیں ہندوستانی سیاست میں سب سے مشہور اور کامیاب ساحروں میں سے ایک لالو پرساد یادو کے پٹارے سے اس سے مختلف ریل بجٹ کی امید کسی کو بھی نہیں تھی۔

انیس سو ستر کی دہائی میں جے پرکاش نارائین کے ذریعے کانگریس کی خلافت چلائی جانے والی طلباء تحریک میں سامنے آنے والے پٹنہ یونیورسٹی سے پولیٹکل سائنس میں ایم اے کی ڈگری حاصل کرنے والے لالو پرساد یادو کا سیاسی گراف تقریبا یک رخہ ہے، یعنی اوپر کی طرف ہی رہا ہے۔ کبھی شرد پوار ،جارج فرنینڈس اور وی پی سنگھ کو اپنا سیاسی استاد ماننے والے لالو پرساد یادو ان سبھی کو بہت پیچھے چھوڑ چکے ہیں۔

اس زبردست کامیابی کے پیچھے ہے ایک نہایت ہی سلجھا ہوا سیاسی دماغ اور سمجھ ہے جس کی وجہ سے لالو نے کبھی بھی یہ کوشش نہیں کی کہ وہ سب کو پسند آئیں انہوں نے اپنے ووٹ بینک بہت پہلے ہی جان لیا تھا اور اسے ایسا پکڑا کہ بس۔ ان کے سیاسی رقیبوں کی ریل جیسے ایک بار نہیں بلکہ لگاتار چھوٹتی رہی۔

بہار کی ذات پات میں تقسیم سیاست میں وہ غریبوں اور اقلیتوں کے حامی بن گئے اور باقی سب کو ٹھینگا دکھا دیا، لالو بہت پہلے ہی یہ سمجھ گئے تھے کہ ذات پات کی سیاست پر چاروں طرف سے ان کی برائی جتنی کی جائے گی اتناہی زیادہ وہ اس طبقے کے مسیحا بنتے جائيں گے اور حقیقت میں ہوا بھی ایسا ہی۔

لالو کی خاص بات یہ بھی رہی ہے کہ انہوں نے شگوفے بھی بہت چھوڑے مثلا انکا ’بہار کی سڑکوں کو ہیما مالنی کے گالوں جیسا چکنا کردینے کا وعدہ‘ یا پھر اپنے خاص انداز میں یہ کہنا کہ ’جب تک سموسے میں آلو رہے گا بہار میں لالو تیرا نام رہیگا‘ پر کسی بھی موقع پر انہوں نے اپنے خاص حلقہ انتخاب کو فراموش نہیں کیا۔

سب کو پسند نہ آنے کی سیاست اس زبردست کامیابی کے پیچھے ہے ایک نہایت ہی سلجھا ہوا سیاسی دماغ اور سمجھ ہے جس کی وجہ سے لالو نے کبھی بھی یہ کوشش نہیں کی کہ وہ سب کو پسند آئیں

پر لالو پرساد یادو کے لیے ان سب باتوں سے کوئی فرق نہیں پڑتا، نہ ہی انہیں اس بات کا ملال ہے کہ ان کی حکومت کے پندرہ سالہ دور میں بہار مستقل اور غریب اور مزید پسماندہ ہوتا چلا گیا ہے۔ ترقی کی ہے تو صرف جرم کے گراف نے،
لالو نے کبھی اس بات کی فکر بھی نہیں کی کہ میڈیا ان کے بارے میں کیا لکھتا اور کہتا ہے۔ ان کے بقول لالو کے خلاف اٹھنے والی ہر آواز ان لوگوں اور ان طاقتوں کی بے چینی ہے جو نہیں چاہتے کہ اقتدار کی باگ ڈور اونچی ذات کے لوگوں کے ہاتھوں سے کبھی بھی نکلے۔

لالو کے ہر طرح کے ناٹکوں اور باتوں سے ان کا ووٹ بینک پکا ہی ہوا ہے۔ حال ہی میں ہونے والے پارلیمانی انتخابات میں بی جے پی اور جنتادل (یو) کو لالو کی پارٹی نے جو زبردست شکست دی ہے وہ اس بات کا ثبوت ہے کہ لالو تن تنہا بہار پر قابض ہیں۔

لیکن شاید اب تک کی کامیابی مستقبل کی ضمانت نہیں ہے ریل بجٹ پیش کرتے ہوئے لالو پرساد یادو بار بار سونیا گاندھی کے نام کا حوالہ دیتے رہے اور انہیں ایک طرح سے اپنا اور حکومت کے رہنما کی شکل میں پیش کرتے رہے اس سے ایسا لگتا تھا کہ شاید لالو کے شاطر سیاسی دماغ میں کہیں کوئی گھنٹی بج رہی ہے۔

آنے والے دنوں میں لالو کو خطرہ بی جے پی سے نہیں بلکہ آج کی حلیف جماعت کانگریس پارٹی کی رہنما سونیا گاندھی سے ہوگا کیونکہ کانگریس ہی ان کے پچھڑے، غریب اور اقلیتوں کا ووٹ بینک ان سے چھین سکتی ہے۔

لالو کو درپیش خطرہ لالو کو خطرہ بی جے پی سے نہیں بلکہ آج کی حلیف جماعت کانگریس پارٹی کی رہنما سونیا گاندھی سے ہوگا کیونکہ کانگریس ہی ان کا پچھڑے، غریب اور اقلیتوں کا ووٹ بینک ان سے چھین سکتی ہے