حسن مجتبیٰ سان ڈیاگو، امریکہ

ضیاالحق نے گیارہ سال حکومت کی

یہ پانچ جولائی انیس سو ستتر کی شب کو پاکستان میں آنے والا جنرل محمد ضیاء الحق اور اس کا مارشل لاء تھا جس کے بارے میں پھر احمد فراز نے کہا تھا:

دیکھنے والوں نے دیکھا ہے
اک شب جب شب خون پڑا
گلیوں میں بارود کی بو تھی
کلیوں پر سب خون پڑا
رکھوالوں کی نیت بدلی
گھر کے مالک بن بیٹھے
جو غاصب محسن کش تھے
صوفی سالک بن بیٹھے
جو آواز جہاں سے اٹھی
اس پر تیر و تبر برسے
ایسے ہونٹ سلے لوگوں کے
آوازوں کو بھی ترسے

اپنے ہی ’باس‘ اور پروموٹر ذوالفقار علی بھٹو کی ’انا‘ اور ’قضا‘ ( کیا آپ کو بھٹو کی لاہور کے قذافی سٹیڈیم میں جلسے والی وہ تقریر یاد ہے جو اس نے پہلی بار روس کے دورے پر جانے سے پہلے کی تھی اور جس میں کے ایل سہگل کے گانے کے ان بولوں کو دھرایا تھا: ’لائی حیات آئے قضا لے چلی چلے‘ اور پھر اپنے مخصوص انداز میں بھٹو نے کہا ’یہ حیات سہگل اور آدم جی کو بھی لے جائے گی۔ سرمایہ داروں اور وڈیروں کو لے جائے گی۔) سے نکلے ہوئے اس جنرل ضیاءالحق بھی بھٹو کی طرح بہت سارے لوگوں کی نفرت کا قبلہ اورچاہت کا کعبہ بنا۔ یہ تب اپنی عمر عزیز کے پچاس سالوں میں سے تیس سال فوجی بوٹوں تلے راج کیے جانے والی وطن عزیز کی گزشتہ دھائیوں سے لے کر آج تک چلتی فلم اور سیلف سینسر ہوتی ہوئی تاریخ کا سب سے بڑا اینٹی ہیرو ہے۔ اب اس کا ’سائڈ ہیرو‘ جنرل مشرف کو کہہ سکتے ہیں جو انیس سو ستتر والے ضیاالحق کا لبرل ایڈیشن ہے۔ دونوں میں وہی فرق ہے جو مودودی اور اتاترک میں تھا۔

آج بھی اسلام آباد کے ایف ٹین یا ویسٹرج راولپنڈی کے بنگلوں میں اسے ’ضیا صاحب‘ اور ’جنرل صاحب‘ کہا جاتا ہے۔ فوجی جرنیلوں کے خانوادے میں شادی کرنے والے ایک سندھی نوجوان نے پہلی مرتبہ جب اپنے سسرال کو جنرل ضیاء کو ’ضیا صاحب‘ کہتے سنا تو اسے صدمے کی حد تک حیرت ہوئی تھی۔ وہ ضیاء الحق جسے جی ایم سید نے بھی ’شریف النفس‘ قرار دیا تھا تو اس پر شیخ ایاز نے ایک ہائیکولکھا تھا:
’صبح کے سائیں!
کہیں تم نے آنکھیں سانپ کی
شبنم کے قطرے سمجھنا‘