امریکہ کے نومنتخب صدر ڈونلڈ ٹرمپ نے ملک کے 45 صدر کی حیثیت سے حلف اٹھا لیا ہے جبکہ اس موقع پر ان کے حامیوں اور مخالفین کی جانب سے امریکہ سمیت دنیا کے مختلف ممالک میں ریلیاں نکالی جارہی ہیں۔
پوپ فرانسس نے ڈونلڈ ٹرمپ کو امریکی صدر بننے کے بعد مشورہ دیا ہے کہ وہ غریبوں کا خیال رکھیں اور اخلاقی اقدار سے رہنمائی حاصل کریں۔
انھوں نے لکھا: (میری دعا ہے کہ) ’آپ کی قیادت میں امریکہ غریبوں، محتاجوں اور مدد کے طالب افراد کے لیے تشویش کے لیے جانا جائے۔‘
فروری 2016 میں ٹرمپ نے پوپ کو ’شرمناک‘ قرار دیا تھا۔ وہ پوپ کی اس تنقید کا جواب دے رہے تھے جس میں پوپ نے کہا تھا کہ دیواریں بنانا ’غیرمسیحی‘ قدم ہے۔
،تصویر کا ذریعہGetty Images
واشنگٹن ڈی سی کی پولیس کے ایک اہلکار نے بی بی سی کو بتایا کہ اب تک تقریباۙ 95 مظاہرین کو گرفتار کیا گیا ہے۔
اس دوران دو پولیس اہلکار زخمی ہوئے ہیں جنھیں ’غیر جان لیوا چوٹیں‘ آئی ہیں۔
ان اہلکاروں کو علاج کے لیے ہسپتال منتقل کر دیا گیا ہے۔
پولیس نے نائجیریا میں ٹرمپ کی حمایت میں نکالے جانے والے ایک جلوس میں آنسو گیس پھینکی ہے۔
ایک علیحدگی پسند تنظیم کے مطابق اس واقعے میں 11 افراد مارے گئے ہیں تاہم پولیس نے ہلاکتوں کی تردید کی ہے۔
یہ جلوس جنوبی ریورز ریاست میں ان مظاہرین نے نکالا تھا جو چاہتے ہیں کہ صدر ٹرمپ ان کے الگ ملک کی حمایت کریں۔
،تصویر کا ذریعہNwokoleme Samuel
عہدۂ صدارت چھوڑنے سے قبل سابق امریکی صدر اوباما نے انسدادِ دہشت گردی کی دو بڑی کارروائیوں کا حکم دیا ہے۔
ایسوسی ایٹڈ پریس کے مطابق ڈونلڈ ٹرمپ کی تقریبِ حلف برداری شروع ہونے سے کچھ ہی دیر پہلے ایک بی 52 بمبار نے شام میں القاعدہ کے ایک تربیتی مرکز پر حملہ کر کے ایک سو سے زیادہ افراد کو ہلاک کر دیا۔
ایک دفاعی عہدے دار نے مارے جانے والوں کو ’مرکزی‘ ارکان قرار دیا جو پچھلے سال وہاں اپنے قدم جمانے کے لیے اکٹھے ہوئے تھے۔
اس سے قبل پینٹاگون کے ترجمان پیٹر کک کے مطابق بی 2 سٹیلتھ بمبار طیاروں اور ڈرونز نے لیبیا میں دو فوجی کیمپوں پر حملہ کر کے 90 جنگجوؤں کو ہلاک کر دیا۔
،تصویر کا ذریعہGetty Images
بعض لوگوں نے شکایت کی ہے کہ ٹرمپ نے اپنی تقریر میں اپنی انتخابی حریف ہلیری کلنٹن کا شکریہ ادا نہیں کیا حالانکہ وہ تمام تر اختلافات کے باوجود اپنے خاوند بل کلنٹن کے ساتھ ان کی تقریبِ حلف برداری میں شریک ہوئی ہیں۔
تاہم واشنگٹن پوسٹ کے مطابق ٹرمپ لنچ کی تقریب کے موقعے پر کلنٹن کی میز کی طرف چل کر گئے اور ان سے مصافحہ کیا۔
اطلاعات کے مطابق انھوں نے کہا: ’یہاں آنے کا شکریہ۔‘
،تصویر کا ذریعہGetty Images
ٹرمپ کانگریس میں اپنے اعزاز میں دیے گئے لنچ میں شرکت کر رہے ہیں، لیکن اس سے قبل انھوں نے بطورِ صدر پہلے احکامات جاری کر دیے ہیں۔
ٹرمپ کے ترجمان نے کہا کہ انھوں نے قانون میں چھوٹ دیتے ہوئے وزیرِ دفاع کے عہدے کے امیدوار جیمز میٹس کو عہدہ سنبھالنے کرنے کی اجازت دی ہے۔
قانون کی تحت سابق فوجیوں کے لیے کوئی حکومتی عہدہ سنبھالنے سے قبل نوکری چھوڑے ہوئے سات برس کا عرصہ گزرنا لازمی ہے۔
اس کے علاوہ ٹرمپ نے اپنی کابینہ کے ارکان کے نام سینیٹ کو بھیج دیے، اور ساتھ ہی انھوں نے حب الوطنی کا قومی دن منانے کا مطالبہ بھی کیا ہے۔
سابق امریکی صدر بش سینیئر کے ترجمان نے کہا ہے کہ انھوں نے اپنی اہلیہ باربرا بش کے ہمراہ ڈونلڈ ٹرمپ کی حلف برداری کی تقریب ریاست ٹیکسس کے شہر ہیوسٹن کے ہیوسٹن میتھوڈسٹ ہسپتال سے ٹیلی ویژن پر دیکھی۔
92 سالہ بش کو اس ہفتے چکر آنے اور سانس کی تکلیف کی وجہ سے ہسپتال میں داخل کیا گیا تھا۔
صدر ڈونلڈ ٹرمپ نے وقت ضائع کیے بغیر چھ ایگزیکٹیو آرڈرز پر دستخط کیے ہیں۔
،تصویر کا ذریعہAP
سابق نائب امریکی صدر جو بائیڈن اور ان کی اہلیہ جل بائیڈن ٹرین کے ذریعے اپنی آبائی ریاست ڈیلاویئر روانہ ہوگئے ہیں۔
جو بائیڈن کئی دہائیاں سینیٹر رہے اور وہ دارالحکومت میں رہنے کی بجائے روزانہ ڈی سی کے لیے صبح کے وقت ٹرین کا سفر کرنے کے لیے معروف تھے۔
یہ سفر دو گھنٹے پر محیط ہے۔
نیو یارک میگزین کے مدیر کائل بکینن کا کہنا ہے کہ ڈونلڈ ٹرمپ نے اپنے سرکاری صدارتی ٹویٹر اکاؤنٹ پر نئی تصویر لگائی ہے جس میں کیپیٹل ہل کے سامنے لوگ امریکی پرچم لہرا رہے ہیں۔ اصل میں یہ تصویر 2009 میں براک اوباما کی حلف برداری کی تصویر ہے۔
کچھ لوگوں نے یہ نوٹ کیا کہ اوباما کی تقریب میں لوگوں کا ہجوم زیادہ تھا جبکہ ٹرمپ کی تقریب میں لوگ کم آئے تھے۔
حلف اٹھانے کے بعد صدر ڈونلڈ ٹرمپ نے امریکی صدر کے آفیشنل ٹوئٹر اکاؤنٹ کے بجائے اپنے ذاتی ٹوئٹر اکاؤنٹ کا استعمال کرتے ہوئے اپنی تقریر کی کچھ حصے ٹویٹ کیے ہیں۔
امریکی اخبار وال سٹریٹ جرنل کی صحافی کے مطابق وائٹ ہاؤس کی ویب سائٹ پر اوباما انتظامیہ کے پالیسی صفحات پر سے مواد ہٹا دیا گیا ہے۔
ڈونلڈ ٹرمپ حلف اٹھا رہے ہیں جبکہ خاتون اول میلانیا اور ان کا بیٹا بیرن ان کے پہلو میں موجود ہیں۔
،تصویر کا ذریعہReuters
صدر ڈونلڈ ٹرمپ کے حلف اٹھانے کے ساتھ ہی امریکی خاتون اول کا آفیشل ٹوئٹر اکاؤنٹ بھی ملانیا ٹرمپ کو منتقل کر دیا گیا ہے۔
،تصویر کا ذریعہtwitter
صدر ڈونلڈ ٹرمپ سابق صدر براک اوباما اور مشیل اوباما کو ایگزیکٹیو ثن ہیلی کاپٹر تک لے جا رہے ہیں۔ سابق صدر اس ہیلی کاپٹر کے ذریعے میری لینڈ روانہ ہوں گے۔
ڈونلڈ ٹرمپ نے اپنے تقریر کا اختتام ان الفاظ میں کیا: ’یہ الفاظ سنیں۔ آپ کو دوبارہ کبھی نظر انداز نہیں کیا جائے گا۔‘ اور اس کے ساتھ ہی انھوں نے اپنا نعرہ دہرایا ’امریکہ کو دوبارہ عظیم بنائیں۔‘
اس دوران اوباما کو ’بہت اچھا، بہت اچھا‘ کہتے دیکھا گیا۔
،تصویر کا ذریعہAFP
ٹرمپ نے اس عزم کا اظہار کیا ہے کہ ان کی انتظامیہ ملازمت اور تعلیم کو فروغ دے گی۔
ان کا کہنا تھا کہ ہمارے درمیانے طبقے سے ان کے گھر چھینے گئے اور دنیا بھر میں تقسیم کیے گئے۔ ’آج کے بعد سے سب سے پہلے صرف امریکہ ہوگا، صرف امریکہ‘
ٹرمپ کا کہنا تھا وہ اپنے لوگوں کو کام فراہم کریں گے۔ ’ہم صرف دو اصولوں پر چلیں گے۔
’امریکی خریدیں اور امریکیوں کو ملازمت دیں۔‘
ڈونلڈ ٹرمپ نے کہا کہ ’ہم اسلامی شدت پسندانہ دہشت گردی کے خلاف مہذب دنیا کو متحد کریں گے، جو ارض زمین سے اس کا مکمل خاتمہ کر دیں گے۔‘
حلف اٹھانے کے ساتھ ہی امریکی صدر کا آفیشل ٹوئٹر اکاؤنٹ بھی ڈونلڈ ٹرمپ کو منتقل کر دیا گیا ہے۔
