الیکشن کمیشن کا سات حلقوں پر عمران خان کو کامیاب قرار دینے کا فیصلہ

لائیو کوریج

1. 24 جنوری 2023محسن نقوی کی تعیناتی کے خلاف منگل (آج) سے پنجاب کے پانچ بڑے شہروں میں احتجاج کیا جائے گا: رہنما تحریک انصاف فواد چوہدری

   

   ،تصویر کا ذریعہEPA

   پاکستان تحریک انصاف کے رہنما فواد چوہدری نے نگران وزیر اعلی پنجاب کی تعیناتی پر تحفظات کا اظہار کرتے ہوئے کہا ہے کہ محسن نقوی کی تعیناتی بدترین فیصلہ ہے، الیکشن کو چوری کرنے کی بنیاد رکھ دی گئی ہے۔

   اے آر وائے نیوز کے پروگرام الیونتھ آور میں بات کرتے ہوئے کہا ہے کہ تحریک انصاف کی جانب سے پانچ بڑے شہروں میں احتجاج کیا جائے گا۔ تحریک انصاف لاہور، راولپنڈی ملتان، فیصل آباد اور گوجرانوالہ میں احجاج کرے گی ان کے مطابق آج(منگل) کو احتجاج لاہور میں کیا جائے گا جبکہ بدھ کو راولپنڈی میں پھر فیصل آباد گوجرانوالہ اور ملتان میں احتجاج ہو گا۔ ان کے مطابق اس کے بعد احتجاج کو مزید آگے بڑھایا جا سکتا ہے۔

   فواد چوہدری نے ایک سوال کے جواب میں کہا کہ احتجاج کی ساری تحریک کو عمران خان نے لیڈ کرنا ہے وہ صحت یاب ہونے کے قریب ہیں ان کا آخری ایکس رے ہونا ہے جس کے بعد وہ احتاج کی قیادت خود کریں گے۔

   ان کا کہنا تھا کہ پنجاب اور خیبر پختون خوا کے گورنروں نے آرٹیکل 105 کی خلاف ورزی کرتے ہوئے انتخابات کی تاریخ کا اعلان نہیں کیا۔ ان کے مطابق آئین کے آرٹیکل میں واضح لکھا ہے کہ گورنر اسمبلی کی تحلیل کے وقت انتخابات کی تاریخ دیں گے۔

   فواد چوہدری کا کہنا تھا کہ سپیکر پنجاب اسمبلی نے گورنر پنجاب کو خط بھی لکھا ہے کہ آپ آئین کی خلاف ورزی کے مرتکب ہو رہے ہیں تاہم ابھی تک تاریخ کا اعلان نہیں کیا جس کے خلاف ہم سپریم کورٹ جا رہے ہیں۔

2. 19 جنوری 2023الیکشن کمیشن کے لگائے گئے چیف منسٹر کے خلاف عدالت میں جائیں گے:پرویز الہی

   وزیر اعلی پنجاب چوہدری پرویز الہی نے لاہور میں میڈیا سے گفتگو میں کہا ہے کہ الیکشن کمیشن کی سوچ اور نیت کا پتہ ہے۔ الیکشن کمیشن روزانہ عمران خان کے خلاف کیسز کر رہا ہے۔ ’الیکشن کمیشن کا لگایا گیا چیف منسٹر نہیں چلنے دیں گے اور اس کے خلاف عدالت میں جائیں گے۔‘

   پرویز الہی نے کہا کہ ’الیکشن جب بھی ہو جائیں ہمیں الیکشن لڑنا ہے۔ عمران خان جب بھی غلطی کرتے ہیں تو ہم ان کو روکتے ہیں۔ تاہم جب دشمن غلطی کرے تو اسے نہیں روکنا چاہیے بلکہ غلطی کرنے دیں وہ خود ہی ڈوبیں گے۔‘

   تحریک انصاف کے ٹکٹ پر الیکشن لڑنے کے حوالے سے پوچھے گئے سوال کے جواب میں انھوں نے کہا کہ اس پر ’مشاورت کا عمل جاری ہے، فیصلہ جلد ہو جائے گا۔‘

3. 19 جنوری 2023قومی اسمبلی کے جمعہ کو ہونے والے اجلاس کا شیڈول تبدیل، نوٹیفیکیشن جاری

   قومی اسمبلی سیکریٹریٹ سے جاری اعلامیہ کے مطابق کل بروز جمعہ دن 11 بجے ہونے والے اجلاس کا شیڈول تبدیل کر دیا ہے اور اب یہ اجلاس 20 جنوری کے بجائے مورخہ 27 جنوری بروز جمعہ دن 11 بجے منعقد ہو گا۔

   

   ،تصویر کا ذریعہNational Assembly of pakistan

4. 19 جنوری 2023تمام سات حلقوں سے عمران خان کی کامیابی کا نوٹیفیکیشن جاری کیا جائے: الیکشن کمیشن

   الیکشن کمیشن نے چیئرمین پی ٹی آئی عمران خان کو ضمنی انتخابات میں جیتی تمام سات نشستوں سے کامیاب قرار دیا ہے۔

   الیکشن کمیشن نے یہ ہدایت جاری کی ہے کہ تمام حلقوں سے عمران خان کی کامیابی کا نوٹیفیکیشن جاری کیا جائے۔

   ضمنی الیکشن میں اخراجات کی فہرست جمع نہ کرانے پر چیف الیکشن کمشنر سکندر سلطان راجہ کی زیر صدارت الیکشن کمیشن کے پانچ ارکان نے 20 دسمبر کو فیصلہ محفوظ کیا تھا۔

   تاہم اب الیکشن کمیشن نے آج اپنے فیصلے میں کہا ہے کہ سابق وزیر اعظم نے تمام ضروری تفصیلات فراہم کر دی ہیں لہذا تمام نشستوں سے ان کی فتح کا نوٹیفیکیشن جاری کیا جاسکتا ہے۔

5. 19 جنوری 2023شہباز گل کی سپیشل پراسیکیوٹر کو فوری کام سے روکنے کی استدعا مسترد

   اسلام آباد ہائیکورٹ نے اداروں کو بغاوت پر اُکسانے کے الزام میں تحریک انصاف کے رہنما شہباز گل کی سپیشل پراسیکیوٹر کو فوری طور پر کام سے روکنے کی استدعا مسترد کر دی ہے۔

   عدالت نے ریمارکس دیے کہ ’ابھی تو ٹرائل شروع ہی نہیں ہوا۔ آپ کی درخواست جلدی سن کر فیصلہ کریں گے۔‘

   اسلام آباد ہائیکورٹ کے چیف جسٹس عامر فاروق نے سماعت کرتے ہوئے کہا ’مختصر تاریخ رکھ رہے ہیں۔ جلدی سن کر فیصلہ کریں گے۔‘

   وکیل علیم عباسی نے کہا ’کمشنر کی طرف سے سفارش گئی، وزارت داخلہ نے تعیناتی کی ہے۔ ملزم کا حق ہے وہ اپنا وکیل کرے لیکن اپنی مرضی کا پراسیکوٹر نہیں لے سکتا۔ اسلام آباد انتظامیہ اور وفاقی حکومت کی جانب سے تعینات کردہ پراسیکوٹر ہے۔‘

   عدالت نے ریمارکس دیے کہ ’درخواست گزار کا کہنا ہے جہاں حکومت کے ایشوز ہیں وہاں آپ پرائیویٹ وکیل نہیں کر سکتے۔‘

   شہباز گل کے وکیل نے استدعا کی کہ ’عدالت سپیشل پراسیکیوٹر کو عارضی طور پر کام سے روک دے۔‘

   چیف جسٹس نے ریمارکس دیے کہ ’ٹرائل تو ابھی شروع ہی نہیں ہوا۔ تب شروع ہو گا جب چارج فریم ہو گا۔‘

   عدالت نے کیس کی مزید سماعت آئندہ ہفتے کے لیے ملتوی کر دی ہے۔

6. 19 جنوری 2023نصابی کتب میں غلطیوں کے خلاف درخواست: سیکرٹری تعلیم اور چیئرمین فیڈرل بورڈ ذاتی حثیت میں طلب

   

   ،تصویر کا ذریعہAFP

   اسلام آباد ہائیکورٹ کے چیف جسٹس عامر فاروق کی عدالت نے نصابی کتب میں غلطیوں کے خلاف درخواست میں سیکرٹری تعلیم اور چیئرمین فیڈرل بورڈ کو ذاتی حثیت میں طلب کر لیا ہے۔

   اسلام آباد ہائی کورٹ خاتون وکیل کی نصاب کی عدم نگرانی اور سٹینڈرڈ آف ایجوکیشن ایکٹ پر عملدرآمد کے لیے دائر درخواست پر سماعت کے دوران درخواست گزار نے موقف اختیار کیا کہ نصاب میں غلطیاں بھی موجود ہیں جو انھیں ’بچوں کو پڑھاتے ہوئے نظر آیا۔‘

   دوران سماعت فریقین کے وکلا کی جانب سے عدالتی سوالات کا جواب دینے میں ناکامی پر چیف جسٹس نے برہمی کا اظہار کرتے ہوئے استفسار کیا کہ ’نصاب ڈیزائن کون کرتا ہے، اس پر فیڈرل بورڈ کے وکلا سمیت لا افسران کوئی جواب نہ دے سکا۔‘

   چیف جسٹس نے کہا کہ ’آپ لوگوں کو اپنے کیس کا ہی پتہ نہیں؟ سادہ سا سوال پوچھا ہے بتا دیں کون نصاب تیار کرتا ہے؟‘

   ’آپ لوگوں کو کچھ پتہ نہیں کہ کون نصاب بنا رہا ہے تو سیکرٹری کو بلاتے ہیں‘

   عدالت نے سماعت دو ہفتوں کے لیے ملتوی کی ہے۔

7. 19 جنوری 2023توشہ خانہ ریفرنس کیس: اسلام آباد ہائیکورٹ نے 25 جنوری کے لیے نوٹس جاری کر دیے

   اسلام آباد ہائی کورٹ میں توشہ خانہ ریفرنس کیس کی سماعت کے دوران چیف جسٹس عامر فاروق نے ریمارکس دیے ہیں کہ ’دوسری سائیڈ کو کچھ اعتراضات ہیں ان کو سنیں گے۔‘

   عمران خان کی نااہلی سے متعلق الیکشن کمیشن کے فیصلے کے خلاف دائر درخواست واپس لینے کی درخواست پر اسلام آباد ہائیکورٹ نے 25 جنوری کے لیے نوٹس جاری کر دیے ہیں۔

   بیرسٹر علی ظفر نے سماعت کے دوران کہا کہ وہ درخواست واپس لینا چاہتے ہیں جس پر چیف جسٹس نے ریمارکس دیے کہ دوسری سائیڈ کو کچھ اعتراضات ہیں، ان کو سنیں گے اور ’مرکزی کیس 25 جنوری کے لیے رکھا ہوا ہے، اسی دن سنیں گے۔‘

   عدالت نے کیس کی مزید سماعت 25 جنوری کے لیے ملتوی کردی ہے۔

   بیرسٹر علی ظفر نے کہا کہ یہ معاملہ لاہور ہائی کورٹ میں بھی زیر التوا ہے، اس لیے پٹیشن واپس لینا چاہتے ہیں۔ چیف جسٹس نے ریمارکس دیے کہ آج صرف پٹیشن واپسی کی متفرق درخواست سماعت کے لیے فکس ہے۔ ’ آپ کی مرکزی پٹیشن 25 جنوری کو سماعت کے لیے مقرر ہے۔ فریقین نے تحفظات کا اظہار کیا تھا، آئندہ سماعت پر وہ بھی ہوں گے۔

   ’آپ کو اسی روز سن کر پٹیشن واپسی کی درخواست پر فیصلہ کریں گے۔‘

8. 19 جنوری 2023الیکشن کمیشن کاعمران خان کے 7 قومی اسمبلی کے حلقوں سے کامیابی کے نوٹیفکیشن جاری کرنے کا حکم

   

   الیکشن کمیشن کے پانچ رکنی بینچ نے چیئرمین پی ٹی آئی عمران خان کے تمام حلقوں سے نوٹیفیکیشن جاری کرنے کا حکم دے دیا ہے۔

   الیکشن کمیشن نے 20 دسمبر کو فیصلہ محفوظ کیا تھا۔ عمران خان نے قومی اسمبلی کے حلقہ این اے 22, 24, 31, 108 میں انتخابی اخراجات کی تفصیل جمع نہیں کروائی تھیں جبکہ این اے 118, 239 اور 45 کے انتخابات میں خرچ ہونے والے اخراجات کی تفصیلات الیکشن کمیشن کو فراہم نہیں کی تھی۔

   مقررہ وقت میں جمع نہ کروانے کے باعث الیکشن کمیشن نے ان کی کامیابی کا نوٹیفیکیشن روک لیا گیا تھا۔ تاہم ان کی جانب سے تفصیلات فراہم کئے جانے کے بعد آج الیکشن کمیشن نے محفوظ فیصلے سنا دیا اور ان ساتوں حلقوں سے چیئرمین پی ٹی آئی عمران خان کی کامیابی کا نوٹیفیکیشن جاری کرنے کا حکم دے دیا ہے ۔

9. 19 جنوری 2023استعفوں کی منظوری سپیکر قومی اسمبلی کی اپنے عہدے سے ناانصافی ہے،ان اقدامات سے سے تحریک انصاف مزید طاقت ور ہوگی:سابق سپیکر اسد قیصر

   

   ،تصویر کا ذریعہGetty Images

   سابق سپیکر قومی سامبلی اور تحریک انصاف کے رہنما اسد قیصر نے پی ٹی آئی کے 35 ارکان قومی اسمبلی کے استعفوں کی منظوری کو اسپیکر راجا پرویز اشرف کی ناانصافی قرار دے دیا ۔

   جیو نیوز کے پروگرام 'کیپٹل ٹاک' میں گفتگو کے دوران اسد قیصرکا کہنا تھا کہ سپیکر راجہ پرویز اشرف نے انہیں خود اسمبلی میں واپسی کی دعوت دی اور اس کے بعد استعفے قبول کرلیے۔اسپیکر راجا پرویز اشرف نے اپنے عہدے کے ساتھ انصاف نہیں کیا تاہم تحریک انصاف اس اقدام کو عدالت میں چیلنج نہیں کرےگی۔

   ان کا کہنا تھا کہ اگر حکومت حکومت پی ٹی آئی کے خلاف جتنے اقدامات عمران خان کوگرفتارکرنےکا منصوبہ بنا رہی ہے تو اس سے تحریک انصاف مزید طاقت ور ہوگی۔

   اسد قیصر نے کہا کہ جب آپ ایک آئینی منصب پر ہوں تو آئین اور قانون کو سامنے رکھتے ہوئے فیصلے کرنے چاہیےنہ کہ سیاسی لوگوں کی خواہشات پوری کی جائیں۔

   ان کے مطابق چند دن پہلے ہونے والی ملاقات میں سپیکر نے واضح طور پر کہا تھا میں سپریم کورٹ کے فیصلے کے مطابق ایک،ایک کو بلا کر وہ تسلی کریں گے کہ کسی کے اوپر دباؤ تو نہیں ہے۔

   

   ،تصویر کا ذریعہGetty Images

   اسد قیصر نے کہا کہ ’اب 35 سیٹوں پر پنجاب اور خیبرپختونخوا میں انتخاب ہوگا جو بڑا انتخاب ہوگا اور ہم چاہتے ہیں نیا مینڈیٹ ہو۔ ہم پنجاب اور خیبرپختونخوا میں بھاری اکثریت سے جیتیں گے اور پھر ان کو قومی اسمبلی میں کون ووٹ دے گا۔ ‘

   رہنما پی ٹی آئی نے کہا کہ وہ سمجھتے تھے کہ یہ لوگ سیاسی طور پر میچیور لوگ ہیں لیکن یہ جتنے کارڈز پلے کر رہے ہیں لیکن یہ تو اپنے خلاف ہی پتے پھینک رہے ہیں۔

   ایک سوال کے جواب میں اسد قیصر نے کہا کہ ’جب تحریک انصاف کی حکومت تھی اس وقت ہم حزب اختلاف کے ساتھ انتخابی اصلاحات پر بات چیت کرنے کے لئے کمیٹیاں تشکیل دے کر انہیں مدعو کرتے تھے اور جب بھی وہ ٹال مٹول سے کام لیتے تھے اور میں نہ مانوں کی رٹ لگاتے تھے۔‘

   اسد قیصر نے کہا کہ اب بھی ہم نے کہا تھا کہ اگر وہ ہماری دی گئی انتخابات کی تاریخ پر متفق ہو جاتے ہیں تو ہم اصلاحات کے لیے تیار ہیں۔ ہم چاہتے ہیں کہ انتخاب شفاف ہو جس پر کسی کو اختلاف نہ ہو تاہم حکومت کو کسی آئین و قانو ن کی فکر نہیں صرف اپنے اقتدار کی فکر ہے۔

10. 19 جنوری 2023سعودی عرب کا مستقبل میں بغیر کسی شرط مالی امداد نہ دینے کا عندیہ

    

    ،تصویر کا ذریعہReuters

    سعودی وزیر خزانہ نے بدھ کو ایک بیان میں کہا ہے کہ اتحادی ممالک کو دی جانے والی مالی معاونت کے طریقہ کار کو تبدیل کیا جا رہا ہے، یعنی بغیر کسی شرط کے براہ راست گرانٹس اور ڈپازٹس کی پالیسی کو بدل کر اب دوست ممالک میں اصلاحات پر زور دیا جائے گا۔

    خبر رساں ادارے روئٹرز کے مطابق ڈیوس میں ورلڈ اکنامک فورم کی تقریب کے دوران محمد الجدعان نے کہا کہ سعودی عرب خطے کے ممالک میں معاشی اصلاحات کی حوصلہ افزائی کرتا ہے۔ انھوں نے کہا کہ ’ہم براہ راست گرانٹس اور ڈپازٹس دیتے ہیں جن میں کوئی شرائط عائد نہیں کی جاتیں اور اب ہم اسے تبدیل کر رہے ہیں۔

    ’ہم کئی اداروں کے ساتھ کام کر رہے ہیں تاکہ یہ بتا سکیں کہ ہم اصلاحات دیکھنا چاہتے ہیں۔‘

    وہ کہتے ہیں کہ ’ہم اپنے لوگوں پر ٹیکس لگا رہے ہیں اور یہی امید کرتے ہیں کہ دوسرے بھی ایسا ہی کریں تاکہ وہ اپنی کوششیں بھی کرسکیں۔ ہم مدد کرنا چاہتے ہیں لیکن ہم یہ بھی چاہتے ہیں کہ آپ اپنے طور پر کام کریں۔‘

    سعودی عرب، متحدہ عرب امارات اور قطر جیسے خلیجی ممالک براہ راست مالی امداد کے بجائے سرمایہ کاری پر زیادہ توجہ دے رہے ہیں۔

    محمد الجدعان نے یہ بھی کہا ہے کہ وہ امریکی ڈالر کے علاوہ دوسری کرنسیوں میں تجارت کرنے کے لیے بات چیت کو تیار ہے۔

    رواں ماہ کے اوائل میں سعودی عرب نے پاکستان میں سرمایہ کاری 10 ارب ڈالر تک لے جانے اور سٹیٹ بینک آف پاکستان میں ڈپازٹس بڑھا کر پانچ ارب ڈالر تک لے جانے کا اعلان کیا تھا۔

    دوسری طرف خبر رساں ادارے اے ایف پی کے مطابق سعودی وزیر برائے معیشت فیصل ال ابراہیم نے ڈیوس میں بتایا کہ وہ تیل کی برآمد پر انحصار کم کرنا چاہتے ہیں۔ ’سعودی عرب میں بعض شعبوں کو نئے طرز پر شروع کیا گیا ہے اور ابھی اتنی دیر نہیں ہوئی۔

    ’سیاحت، ثقافت، کھیل اور تفریح۔۔۔ ان سے معیشت میں تنوع آئے ہیں۔‘

    انھوں نے کہا کہ کان کنی اور صنعتکاری میں بھی کوششیں تیز کی جائیں گی۔

11. 18 جنوری 2023کراچی میں بلدیاتی انتخابات میں مبینہ دھاندلی کے خلاف احتجاج، کشیدگی اور سیاسی رابطے, ریاض سہیل، بی بی سی اردو ڈاٹ کام کراچی

    

    ،تصویر کا ذریعہscreen grab

    کراچی میں بلدیاتی انتخابات کے نتائج میں مبینہ طور پر تبدیل کرنے کے خلاف جماعت اسلامی، تحریک انصاف اور پاکستان پیپلز پارٹی کی جانب سے احتجاج کیے جارہے ہیں، جس کے دوران کشیدگی کے واقعات بھی پیش آئے ہیں۔

    کیماڑی میں تحریک انصاف نے ڈسٹرکٹ ریٹرننگ افسر کے دفتر کے باہر دھرنا دیا اس دوران پاکستان پیپلز پارٹی کے کارکن بھی وہاں پہنچ گئے اور دونوں میں تصادم ہوگیا۔ پولیس نے انھیں منشتر کرنے کی کوشش کی۔

    سابق وفاقی وزیر علی زیدی کا کہنا ہے کہ سندھ پولیس کی سربراہی میں ان پر دھاوا بولا گیا، پنجاب میں شکست کا بدلا کراچی والوں سے لیا جارہا ہے، نتائج بدلے جارہے ہیں، کارکنان کو ہدایت ہے کہ غیر قانونی قدم نہیں اٹھانا وہ پرامن رہیں۔

    میئر کے ڈپٹی کمشنر آفس جو ڈسٹرکٹ رٹرننگ افسر بھی کہ دفتر میں پاکستان پیپلز پارٹی اور جماعت اسلامی کے کارکنوں میں تصادم ہوا یہاں جماعت اسلامی نے دھرنا دیا تھا، ایس ایس پی ملیر عرفان بہادر کا کہنا ہے کہ کشیدہ صورتحال کو فوری کنڑول کرلیا گیا۔

    جماعت اسلامی اور پی پی کارکنان آمنے سامنے گئے تھے۔ دوسری جانب جماعت اسلامی کے ترجمان کا کہنا ہے کہ پولیس حملہ آور وں کو روکنے کے بجائے پُرامن کارکنوں پر ٹوٹ پڑی۔

    کارکنان پُر امن رہیں اور اپنی چھینی گئی نشستوں کے لیے احتجاج جاری رکھیں۔ تحریک انصاف کی جانب سے قیوم آباد اور جماعت اسلامی کی جانب سے ملیر ہالٹ پر احتجاج کیا جا رہا ہے۔

    تحریک انصاف کے رکن قومی اسمبلی عالمگیر کا کہنا ہے کہ جماعت اسلامی کے لوگ ضلع شرقی میں ووٹ کی گنتی کرنے نہیں دے رہے۔

    انھوں نے دوبارہ گنتی روکنے کے لیے دھرنا دیا ہے اگر انھوں نے دھاندلی نہیں کی تو پھر کسی بات کا ڈر ہے۔

    دوسری جانب وزیر اعلیٰ سندھ سید مراد علی شاہ نے امیر جماعت اسلامی کراچی حافظ نعیم الرحمان سے ٹلیفونک رابطہ کیا، جماعت اسلامی کے مطابق حافظ نعیم الرحمان نے انھیں کہا کہ جماعت اسلامی کے مینڈیٹ کو تسلیم کیا جائے اور فارم 11 کے مطابق تمام نشستیں دی جائیں جس کے مطابق انھوں نے 94 نشستیں جیتی ہیں۔

    حافظ نعیم الرحمان کے مطابق وزیر علیٰ سندھ نے حافظ نعیم کو خدشات دور کرنے کی یقین دہانی۔

    اس سے قبل سندھ کے صوبائی وزیر سعید غنی نے پریس کانفرنس سے خطاب کرتے ہوئے کہا تھا کہ ووٹ سوشل میڈیا یا فیس بک نہیں بلکہ عوام پولنگ سٹیشن میں جا کر بیلٹ باکس میں ڈالتے ہیں۔

    کراچی کے عوام نے پیپلز پارٹی اور جماعت اسلامی دونوں کو مینڈیٹ دیا ہے تاکہ اس شہر سے دہستگردی، نفرت اور بدتمیزی کی سیاست کا خاتمہ کیا جاسکے۔ اس لیے ان کی جماعت اسلامی سے درخواست ہے کہ وہ کچھ اشو کو بنیاد بنا کر اس شہر کے ماحول کو خراب نہ کرے۔

12. 18 جنوری 2023جماعت اسلامی کی کراچی انتخابات میں بے قاعدگیوں سے متعلق درخواست پر الیکشن کمیشن 23 جنوری کو سماعت کرے گا

    

    ،تصویر کا ذریعہGetty Images

    الیکشن کمیشن نے جماعت اسلامی کی درخواست پر کراچی میں ہونے والے بلدیاتی انتخابات میں مبینہ دھاندلی کی شکایات کو سماعت کے لیے مقرر کر دیا ہے۔ اس درخواست پر سماعت 23 جنوری کو ہو گی۔

    ایک پریس ریلیز میں کمیشن نے بتایا کہ جماعت اسلامی کی درخواست پر الیکشن کمیشن نے نوٹس لیتے ہوئے ان تمام کیسز کو سماعت کے لیے 23 جنوری کو الیکشن کمیشن میں مقرر کر دیا ہے اور کیسز میں صوبائی الیکشن کمشنر سندھ، متعلقہ ڈسٹرکٹ ریٹرننگ افسران، آر اوز، جیتنے والے اور دوسرے نمبر پر آنے والے امیدواروں کو نوٹس جاری کیے گئے ہیں۔

    الیکشن کمیشن نے کراچی کی جن چھ یونین کونسل میں جیتنے والے اور دوسرے نمبر آنے والے امیدواروں کو بھی پیش ہونے کے نوٹس جاری کر دیے ہیں، ان میں ضلع غربی، کی پانچ یونین کونسل جبکہ ضلع شرقی کی ایک یونین کونسل شامل ہے۔

13. 18 جنوری 2023پاکستان ایران سرحد پر دہشتگردی کے حملے میں چار سیکورٹی اہلکار ہلاک: آئی ایس پی آر

    پاکستان کے شعبہ تعلقات عامہ آئی ایس پی آر نے کہا ہے کہ بدھ کو بلوچستان کے ضلع پنجگور میں چوکب سیکٹر پر پاکستان ایران سرحد سے دہشتگردوں کے حملے میں پاکستان کے چار سیکورٹی فورسز کے اہلکار ہلاک ہوئے ہیں۔

    آئی ایس پی آر کے مطابق دہشتگردوں نے پاکستانی سیکورٹی فورسز کے قافلے کو نشانہ بنانے کے لیے ایرانی سرحد کو استعمال کیا ہے۔

    آئی ایس پی آر کے مطابق ایران سے کہا گیا ہے کہ وہ اپنی طرف دہشتگردوں کے ٹھکانوں کا پتا چلائیں۔

14. 18 جنوری 2023ایسے انتخابات سے استحکام نہیں مزید انتشار پیدا ہو گا: عمران خان کا سندھ کے بلدیاتی انتخابات پر بیان

    سابق وزیراعظم عمران خان نے اپنے ایک ٹوئٹر تھریڈ میں کہا ہے کہ سندھ میں بلدیاتی انتخابات سے متعلق موصول ہونے والی خبروں سے یہ بات واضح ہے کہ پیپلز پارٹی کی صاف اور شفاف انتخابات کے انعقاد کے لیے کوئی عزم نہیں رکھتی ہے۔

    ان کے مطابق الیکٹرانک ووٹنگ مشین (ای وی ایم) شفافیت اور فوری انتخابی نتائج کی وجہ سے دھاندلی کے امکانات کو روکتی ہے۔ ان کے مطابق بلدیاتی انتخابات کے جو نتائج چند گھنٹوں میں آ جانے چاہیے تھے تو وہی اب تاخیر سے اور چند دنوں تک موصول ہو رہے ہیں، جس سے گڑ بڑ کے امکانات بڑھ جاتے ہیں۔

    سابق وزیراعظم نے مزید کہا ہے کہ اگر الیکشن کمیشن، ریاست اور حکمران اتحاد پی ڈی ایم اگر اس طرح کے انتخابات چاہتے ہیں تو پھر اس طرح استحکام نہیں آ سکے گا۔ ان کے مطابق ایسے دھاندلی شدہ انتخابات مزید احتجاج، تقسیم اور افراتفری کو جنم دیں گے۔

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام

15. 18 جنوری 2023میئر اور ڈپٹی میئر کے لیے ہماری ترجیح جماعت اسلامی سے بات کرنا ہے: پیپلز پارٹی

    

    ،تصویر کا ذریعہSindh Assembly

    سندھ کے صوبائی وزیر سعید غنی کا کہنا ہے کہ ہماری ترجیح جماعت اسلامی سے بات کرنا ہے۔ ان کے مطابق بات چیت کے ذریعے طے ہو سکتا ہے کہ میئر جماعت اسلامی سے ہو گا یا پیپلز پارٹی سے ہو گا۔

    کراچی میں پریس کانفرنس کرتے ہوئے سعید غنی کا کہنا تھا حافظ نعیم الرحمان تک جو اطلاعات پہنچائی جا رہی ہیں وہ درست نہیں ہیں، حافظ نعیم کے پاس 94 نشستیں جیتنے کی اطلاعات غلط ہیں۔

    ان کا کہنا تھا ہماری ترجیح جماعت اسلامی ہے، ہم ان سے بات کرنا چاہتے ہیں، زیادہ بہتر ہوگا جماعت اسلامی اور پیپلز پارٹی آپس میں بات کر لیں۔

    سعید غنی کے مطابق ان مذاکرات میں یہ طے ہو سکتا ہے کہ میئر جماعت اسلامی سے ہو گا یا پیپلز پارٹی سے لیکن یہ سارے معاملات بات چیت کے ذریعے ہی طے ہو سکتے ہیں۔

    سیعد غنی نے تحریک انصاف کے ساتھ اتحاد کے امکان کو خارج از امکان ہے۔ ان کے مطابق جماعت اسلامی کے ساتھ بیٹھ کر کراچی کے لیے اچھا سیٹ اپ لانے کے لیے تیار ہیں۔

16. 18 جنوری 2023پنجاب کے نگران وزیراعلیٰ کے انتخاب کی پارلیمانی کمیٹی کے لیے تحریک انصاف نے تین نام دے دیے

    

    ،تصویر کا ذریعہPUNJAB ASSEMBLY WEBSITE

    پنجاب کے نگران وزیراعلیٰ کے انتخاب کی پارلیمانی کمیٹی کے لیے تحریک انصاف نے تین نام دے دیے ہیں۔ پنجاب اسمبلی کے سپیکر سبطین خان نے میڈیا سے گفتگو کرتے ہوئے بتایا قائد ایوان اور قائد حزب اختلاف کے درمیان مذاکرات ناکام ہونے کے بعد اب معاملہ میرے پاس ہے۔

    ان کے مطابق تحریک انصاف نے میاں اسلم، راجہ بشارت اور مخدوم ہاشم جواں بخت پر مشتمل ایک کمیٹی تشکیل دی ہے، جو نگران وزیراعلیٰ سے متعلق مشاورت کے لیے ان کے پاس ملاقات کے لیے آ رہی ہے۔

    سبطین خان کے مطابق وہ آئین اور قانون کے مطابق پارلیمانی کمیٹی کے لیے دونوں اطراف سے دیے جانے والے ناموں کو نوٹیفائی کریں گے۔

    ان کے مطابق ہم سیاسی لوگ ہیں، امید ہے کہ معاملہ بات چیت سے حل ہو جائے گا اور اگر بدقسمتی سے ایسا نہ ہو سکا تو پھر یہ معاملہ الیکشن کمیشن کو چلا جائے گا اور پھر کمیشن نگران وزیراعلیٰ کا انتخاب کرے گا۔

17. 18 جنوری 2023پیپلز پارٹی جماعت اسلامی سے ترجیحی بنیادوں پر بات چیت کرنا چاہتی ہے: سعید غنی

    بلدیاتی انتخابات کے نتائج کے بعد رہنما پیپلز پارٹی اور سندھ کے صوبائی صدر سعید غنی نے کہا ہے کہ ان کی جماعت ترجیحی بنیادوں پر جماعت اسلامی سے بات چیت کرنا چاہتی ہے۔

    ایک پریس کانفرنس میں ان کا کہنا تھا کہ ’زیادہ بہترہوگا اگر جماعت اسلامی اور پیپلز پارٹی مل بیٹھ کر معاملات طے کر لیں۔‘

    انھوں نے کہا کہ مذاکرات کے ذریعے یہ طے ہو سکتا ہے کہ میئر جماعت اسلامی سے ہو گا یا پیپلز پارٹی سے ہو گا۔

    ان کا یہ بھی کہنا تھا کہ وہ ’جماعت اسلامی کے ساتھ بیٹھ کر کراچی کے لیے اچھا سیٹ اپ لانے کے لیے تیار ہیں۔‘

    سعید غنی نے کہا کہ قانون کے مطابق سیاسی جماعتوں نے جن نشستوں پر دوبارہ گنتی کی درخواستیں دی ہیں، اسے ہونے دیا جائے۔

18. 18 جنوری 2023بلوچستان میں دھماکے سے متاثرہ پائپ لائن پر مرمت کا کام شروع, محمد کاظم، بی بی سی، کوئٹہ

    بلوچستان کے ضلع کچھی میں دھماکے سے متاثر ہونے والے پائپ لائن کی مرمت کا کام شروع کردیا گیا۔

    کچھی کی ضلعی انتظامیہ کے ایک اہلکار کے مطابق 12 انچ قطر کی پائپ لائن کو ڈھاڈر کے علاقے سراج آباد میں نامعلوم افراد نے دھماکہ خیز مواد سے اُڑا دیا تھا۔

    کالعدم عسکریت پسند تنظیم بلوچ لبریشن آرمی نے اس واقعے کی ذمہ داری قبول کی ہے۔

    سوئی سدرن گیس کمپنی کے اہلکار صفدر حسین نے بتایا کہ متاثرہ پائپ لائن کی مرمت کا کام شروع کیا گیا ہے اور مرمت کا کام مکمل ہونے کے بعد اس سے گیس کی فراہمی شروع ہوجائے گی۔

    بلوچستان کے جن چند علاقوں میں گیس کی سہولت میسر ہے ان میں کوئٹہ، قلات، مستونگ، زیارت اور پشین کے علاوہ دیگرعلاقے شامل ہیں۔

    شدید سردی، گیس کی بندش اور پریشر میں کمی سے لوگوں کو پہلے ہی ان علاقوں میں مشکلات کا سامنا تھا۔

    سوئی سدرن گیس کمپنی کے حکام کے مطابق دھماکے سے متاثرہ پائپ لائن کی مرمت تک بعض علاقوں کومزید گیس کی کمی کا سامنا کرنا پڑے گا۔

19. 18 جنوری 2023وقت ضائع کیے بغیر اسمبلی تحلیل کی: گورنر خیبر پختونخوا

    گورنر خیبر پختونخوا غلام علی نے کہا ہے کہ انھوں نے وقت ضائع کیے بغیر وزیر اعلی کی طرف سے بھیجی گئی اسمبلی تحلیل کرنے کی سمری پر دستخط کر دیے ہیں۔

    انھوں نے پشاور میں صحافیوں سے بات چیت کرتے ہوئے کہا کہ ان کی کوشش تھی کہ وہ ’توڑنے توڑنے کی باتیں نہ کریں بلکہ جوڑنے اور جوڑنے کی بات کریں اور اب ایک مرتبہ پھر میں وزیر اعلی اور اکرم خان درانی سے اپیل کرتا ہوں کہ وقت ضائع نہ کریں اور صوبے اور ملک کی خاطر بیٹھ کر کسی ایک متفقہ شخصیت پر متفق ہو جائیں تاکہ نگران وزیر اعلی کا انتخاب کیا جا سکے۔‘

    گونر غلام علی نے کہا کہ ’ملک اور صوبے کو اقتصادی مسائل درپیش ہیں اور یہ وقت اختلافات کا نہیں بلکہ اتفاق کا ہے۔‘

    ان کے مطابق انھوں نے کوشش کی ہے کہ ’کسی طریقے سے حالات بہتر کیے جائیں۔‘

    ان کا کہنا تھا کہ ’کل رات انھیں عملے نے بتایا کہ سمری گورنر ہاؤس پہنچ گئی ہے لیکن اس وقت دیگر عملہ نہیں تھا۔ اس لیے سمری پر دستخط آج صبح کر دیا ہے تاکہ مزید وقت ضائع نہ کیا جائے۔‘

    نگران حکومت کے بارے میں ان کا کہنا تھا کہ اس حوالے سے مشاورت محمود خان اور اکرم خان درانی کے درمیان ہو گی۔ ’میں نے اپنا امتحان دے دیا ہے، سمری پر دستخط کر کے محمود خان اور اکرم خان درانی کیا فیصلہ کرتے ہیں، ان پر ہی انحصار ہے۔‘

20. 18 جنوری 2023’35 پی ٹی آئی ارکان کے استعفے منظور کرنے کا فائدہ؟‘

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام

    آئینی و پارلیمانی امور کے ماہر اور پلڈاٹ کے سربراہ احمد بلال محبوب کہتے ہیں کہ وہ سپیکر قومی اسمبلی کی جانب سے پی ٹی آئی کے استعفوں کی منظوری کو سمجھنے سے قاصر ہیں۔

    ٹوئٹر پر ان کا کہنا ہے کہ ’میں استعفے دینے والے پی ٹی آئی کے 125 ایم این ایز میں سے 35 کے استعفے منظور کرنے کی منطق سمجھنے سے قاصر ہوں۔

    ’اگر70 سے زائد PTI کے ارکان جو تکنیکی طور پر ابھی بھی رکن ہیں اسمبلی میں واپس آجائیں تو پارلیمانی پارٹی کے سربراہ اور قائد حزب اختلاف کے عہدے واپس لے سکتے ہیں۔پھر 35 استعفے منظور کرنے کا فائدہ؟‘