انوشکا سب سے خوبصورت، شاہ رخ سب سے امیر

انوشکا بالی وڈ کی خوبصورت ترین اداکارہ منتخب

ایک معروف فیشن میگزن کے ایک سروے میں بالی وڈ اداکارہ انوشکا شرما کو سب سے خوبصورت اداکارہ منتخب کیا گیا ہے۔ اس سروے میں میگزین پڑھنے والوں نے ووٹ ڈالے اور سب سے زیادہ ووٹ انوشکا شرما کو ملے۔

انوشکا نے اس نتیجے پر اپنی خوشی کا اظہار کرتے ہوئے کہا کہ ’ایسا پہلی بار ہوا ہے کہ انھوں نے ایسے کسی مقابلے میں کامیابی حاصل کی ہے۔‘

بہر حال اس کے ساتھ انھوں نے یہ اعتراف کیا کہ ان کے مطابق انڈسٹری میں سب سے خوبصورت اداکارہ کرینہ کپور اور قطرینہ کیف ہیں۔

شادی تو خاموشی سے ہی کروں گا، جان ابراہم

جان ابراہم ریس ٹو میں اہم کردار ادا کر رہے ہیں

اپنی خاموش طبیعت کے لیے معروف اداکار جان ابراہم نے بی بی سی کے ساتھ ایک خاص بات چیت میں کہا کہ جب وہ شادی کریں گے تو اس کا اعلان کرنا پسند نہیں کریں گے۔

انھوں نے کہا کہ وہ خاموشی کے ساتھ ہی شادی کریں گے۔ انھوں نے کہا کہ: ’جب میں شادی کروں گا تو مجھے بہت خوشی ہوگی اور میں اپنے اس فیصلے کا احترام کروں گا، لیکن اس کا اعلان نہیں کروں گا، اور اگر کوئی پوچھے گا تو چھپاؤں گا بھی نہیں، بتا دوں گا۔‘

واضح رہے کہ جان ابراہم اس ہفتے ریلیز ہونے والی فلم ’ریس- ٹو‘ میں ایک اہم کردار نبھا رہے ہیں۔

سری دیوی اور شرمیلا ٹیگور کو اعزازات

سری دیوی نے پندرہ سال بعد فلموں میں واپسی کی ہے

بالی ووڈ کی جانی مانی اداکارہ سری دیوی اور شرمیلا ٹیگور کو اس سال یوم جمہوریہ کے موقعے پر پدم شری اور پدم بھوشن اعزازات کے لیے منتخب کیا گیا ہے۔ جبکہ آنجہانی اداکار راجیش کھنہ اور کھلاڑی راہول کو پدم بھوشن کے لیے منتخب کیا گیا۔

سری دیوی نے ٹوئیٹر کے ذریعے اپنے چاہنے والوں کا شکریہ ادا کرتے ہوئے کہا: ’میرے چاہنے والوں نے مجھ پر لگاتار بھروسہ کیا ہے اور میرا ساتھ دیا ہے۔ میں تہہ دل سے ان کی شکر گذار ہوں۔‘

سری دیوں کو ’نگینہ‘، ’مسٹر انڈیا‘، ’چالباز‘ اور ’چاندنی‘ جیسی فلموں کے لیے یاد کیا جاتا ہے۔ گذشتہ سال وہ فلموں سے پندرہ سال دور رہنے کے بعد فلم ’انگلش ونگلش‘ کے ساتھ دوبارہ انڈسٹری میں واپس آئیں تھی۔

سری دیوی کے علاوہ فلم شعلے کے ہدایت کار رمیش سپی کو بھی پدم شری سے نوازا گیا ہے۔

شاہ رخ سلمان سے زیادہ کماتے ہیں

شاہ رخ خان کی تازہ فلم جب تک ہے جاں ہے

بالی وڈ کے سپرسٹار کہے جانے والے شاہ رخ خان نے اکتوبر دوہزار گیارہ سے ستمبر دوہزار بارہ کے درمیان دو سو دو کروڑ روپے کمائے۔ ان کو فوربس میگزن نے بالی وڈ کے امیر ترین لوگوں میں شمار کیا ہے۔

اس فہرست میں سو لوگوں کا ذکر ہے اور سلمان خان اس میں دوسرے نمبر پر ہیں۔

اکشے کمار، امیتابھ بچن، کرینہ کپور اور قطرینہ کیف بھی ان سو امیر ترین لوگوں میں شامل ہیں۔